அமரர் எஸ்.டபிள்யூ. ஆர்.டி. பண்டாரநாயக்காவின் மறைவு

இலங்கையின் முதலாவது அரசியல் கொலை

 (சென்றவார தொடர்...)

இவருக்கு பொரளையில் ஆயுர்வேத கண் சிகிச்சை நிலையம் ஒன்றும் இருந்தது. இவர் பிரதம மந்திரியை சந்தித்து ஆயுர்வேத கல்லூரி எதிர்நோக்கியிருக்கும் கஷ்டங்களை நிவர்த்தி செய்வதற்கு அவரது உதவியை நாட விரும்பினார்.  1915ம் ஆண்டில் தல்துவ ரத்துகம ராலகே வேரிஸ் சிஞ்சோ என்ற பெயரில் சோமாராம தேரர் 1915ம் ஆண்டு ஆகஸ்ட் மாதம் 15ம் திகதி பிறந்தார். இவரது தந்தையின் பெயர் ரத்துமக ராலகே டேலிஸ் அப்புவாமி தாயாரின் பெயர் இசோ ஆமி. சோமாராம தேரர் தல்துவ இயல பாடசாலையிலும் தெஹியோவிட்ட பாடசாலையிலும் ஆரம்ப கல்வியை பெற்றார். 1929ம் ஆண்டு ஜனவரி 20ம் திகதி சாதாரண மனிதராக இருந்த இவர் தனது 14வது வயதில் கண்டியில் துறவறம் பூண்டார்.

பிரதம மந்திரி பண்டாரநாயக்க படுகொலை செய்யப்பட்ட தினத்தன்று காலையில் அவர் தனது ரோஸ்மிட் பிளேஸ் இல்லத்தின் முன்விராந்தையில் அமர்ந்து தன்னை சந்திக்க வருபவர்களிடம் பேசிக் கொண்டிருந்தார்.

விராந்தைக்குள் ஒரு சிலரே அனுமதிக்கப்பட்டனர். அவர்கள் பேசி முடிந்த பின்னரே மற்றவர்கள் விராந்தைக்குள் அனுமதிக்கப் பட்டனர்.

சோமாராம தேரரும் அமைதியாக தனது சந்தர்ப்பம் கிடைக்கும் வரை காத்திருந்தார்.

பிரதம மந்திரி பண்டாரநாயக்க நம் நாட்டு மக்கள் அவரது அரசாங்கத்தைப் பார்த்து எங்கள் அரசாங்கம் என்று அழைப்பதைக் கேட்டு மகிழ்ச்சி அடைவார்.

சோமாராம தேரரின் வலது பக்கத்தில் இன்னுமொரு பெளத்த பிக்கு அமர்ந்திருந்தார். இவர் பொலன்னறுவையைச் சேர்ந்த ஆனந்த தேரர் என்பவராவார்.

தன்னை சந்திக்க வரும் தேரர்களைப் பார்த்தவுடன் பண்டாரநாயக்க அவர்கள் எழுந்து அவருக்கு வணக்கம் தெரிவித்து அமர்ந்து கொள்வார். உங்களுக்கு என்னால் ஏதாவது உதவி செய்ய முடியுமா என்று பிரதம மந்திரி கேட்ட போது சோமாராம தேரர் சற்று பதற்றமாக இருந்ததாக அவருக்கு அருகில் இருந்த ஆனந்த தேரர் பொலிஸாருக்கு அறிவித்தார்.

ஆயுர்வேத கல்லூரிக்கு சில உதவிகளைச் செய்ய வேண்டும் என்று சோமாராம தேரர் கூறிய போது அது ஒரு சின்ன விசயம். நான் சுகாதார அமைச்சர் ஏ.பி.ஜயசூரியவுக்குக் கூறி அந்த உதவியை உங்களுக்கு செய்து தருகிறேன் என்று சொன்னார்.

அப்போது நேரம் காலை 9.45 தனது கையில் இருந்த பைலை திறந்து ஏதோ தேடுவதைப் போன்று அவர் இருந்ததாக ஆனந்த தேரர் கூறுகிறார். அந்த சந்தர்ப்பத்தில் சோமாராம தேரர் தனது காவி உடையில் மறைத்து வைத்திருந்த சுழல் கைத்துப்பாக்கியை வெளியில் எடுத்து பண்டாரநாயக்காவின் நெஞ்சுப் பகுதியில் வயிற்றிலும் மிக அருகில் இருந்தவாறு சுட்டார். பலத்து சத்தத்துடன் பண்டாரநாயக்கா அப்படியே கீழே சாய்ந்தார்.

பின்னர் மிகவும் கஷ்டப்பட்டு எழுந்து தனது அறைக்குள் செல்ல எத்தனித்தார். இந்த சந்தர்ப்பத்தில் சோமாராம தேரர் ஆனந்த தேரோவை நோக்கி கைத்துப்பாக்கியை நீட்டிய போது அவர் அம்மோ என்று பயந்து அலறி ஓடினார்.

பிரதம மந்திரியை விரட்டிச் சென்ற சோமாராம தேரர் மேலும் நான்கு தடவை சுட்டார். அதில் ஒரு குண்டு பிரதம மந்திரியின் கையை காயப்படுத்தியது. இன்னுமொரு குண்டு பிரதம மந்திரியை பார்க்க வந்திருந்த ஆசிரியர் குணரத்னவையும் காயப்படுத்தியது. மூன்றாவது குண்டு அங்கிருந்த கண்ணாடி ஜன்னலை உடைத்து நொறுக்கியது. நான்காவது குண்டு வராந்தாவில் இருந்த மலர் ஜாடியை சுட்டு தகர்த்தது.

இவ்விதம் தனது சுழல் துப்பாக்கியில் இருந்த 6 குண்டுகளையும் சோமாராம தேரர் சுட்டுத் தீர்த்தார். துப்பாக்கிச் சூடு கேட்டு அந்த வீட்டின் முற்றத்தில் இருந்தவர்கள் ஓட ஆரம்பித்தனர். இந்த நேரத்தை வீணாக்காமல் வெளியில் சென்ற ஆனந்த தேரர் ஒரு பொலிஸ் உத்தியோகத்தரிடம் பிரதம மந்திரியை ஒரு பெளத்த பிக்கு சுடுகிறார் என்று கூறினார்.

அதைக்கேட்டு வந்த பொலிஸ் உத்தியோகத்தர் சோமாராமதேரரை நோக்கி துப்பாக்கிப் பிரயோகம் செய்தார் அந்த குண்டு அவரது தொடையில் பட்டு காயப்படுத்தியது. தன்னைக் கட்டிப்பிடித்துக் கொண்டவர்களைப் பார்த்து ஆவேசமடைந்த நிலையில் நான் நாட்டையும், சிங்கள இனத்தையும், பெளத்த மதத்தையும் காப்பாற்றுவதற்காகவே பிரதம மந்திரி மீது துப்பாக்கிப் பிரயோகம் செய்தேன் என்று கூறினார்.

தன்னை துப்பாக்கியால் சுட்ட அந்த பிக்குவை அடித்து துன்புறுத்த வேண்டாம் என்று இரத்த வெள்ளத்தில் உயிருக்காக போராடிக் கொண்டிருந்த திரு. பண்டாரநாயக்கா அங்கிருந்தவர்களிடம் வேதனையுடன் கேட்டுக் கொண்டார்.

அங்கிருந்து கைது செய்யப்பட்ட அந்த பிக்கு துறைமுக பொலிஸ் நிலையத்துக்கு பலத்த பாதுகாப்புடன் கொண்டு செல்லப்பட்டார். கொழும்பு பெரியாஸ்பத்திரியின் சத்திர சிகிச்சை நிலையத்துக்கு பிரதம மந்திரி அவசரமாக எடுத்துச் செல்லப்பட்டார்.

தன்னை எவருமே துன்புறுத்து மாட்டார்கள் என்று அசையாத நம்பிக்கை கொண்டிருந்த திரு. பண்டாரநாயக்கா தனது பாதுகாப்பு குறித்து சிறிதளவேனும் கவலைப்படவில்லை. இன்று அரசியல் வாதிகளுக்கு உயர் பொலிஸ் அதிகாரிகள் உட்பட பலர் பாதுப்பு உத்தியோகஸ்தர்களாக இருக்கிறார்கள்.

ஆனால் அன்று பண்டாரநாயக்காவுக்கு 55 வருடங்களுக்கு முன்னர் ஒரு பொலிஸ் சார்ஜன்ட் மாத்திரமே மெய்க்காப்பாளராக இருந்தார். துப்பாக்கி சூடு நடைபெற்ற நேரத்தில் அந்த பொலிஸ் சார்ஜனும் ஒரேயொரு பொலிஸ்காரர் மாத்திரமே முன்வாயில் கேட்டுக்கு அருகில் கடமையில் ஈடுபடுத்தப்பட்டிருந்தார். பிரதம மந்திரியின் பாதுகாப்புக்கு ஒரு திறமைமிக்க மெய்க்காவலர் நியமிக்கப்பட வேண்டும் என்று சிரேஷ்ட பொலிஸ் உத்தியோகத்தர்கள் கேட்டுக் கொண்டதை அடுத்து பிரதம மந்திரி அரைமனதுடன் ஒரு பொலிஸ் சப்இன்ஸ்பெக்டரை தனது மெய்ப்பாதுகாப்பாளராக நியமிப்பதற்கு சில நாட்களில் பிரதம மந்திரி இந்த பொலிஸ் உத்தியோகத்தருக்கு என்னைப் பாதுகாப்பதை விட பாரிய கடமைகள் இருக்கின்றன என்று கூறி அவரையும் திருப்பி அனுப்பிவிட்டார்.

அதையடுத்து பொலிஸ் மா அதிபர் விரும்பினால் ஓரிரு பொலிஸ் கான்ஸ்டபிள்களை தனது பாதுகாப்புக்கு அனுப்பலாம் என்றும் பிரதம மந்திரி கூறினார். மக்களின் தலைவர் என்று தன்னை பெருமையோடு அழைத்துக் கொண்ட திரு. எஸ். டபிள்யு. ஆர். டி. பண்டாரநாயக்கா தன்னை பாதுகாப்பதற்கு பெருமளவு பொலிஸார் சேவையில் ஈடுபடுத்தப்படுவது தமக்கு தர்மசங்கடமான நிலையை ஏற்படுத்துகிறது என்று நினைத்து அத்தகைய பாதுகாப்பை விரும்பவில்லை.

பிரதம மந்திரி பண்டாரநாயக்கா துப்பாக்கியால் சுடப்பட்ட செய்தி கிடைத்த போது பாராளுமன்றக் கூட்டத்தொடர் நடைபெற்றுக் கொண்டிருந்தது. அப்போது கல்வியமைச்சராக இருந்த டாக்டர் டபிள்யு. தஹாநாயக்கா பிரதம மந்திரியின் மறைவுக்குப் பின்னர் நாட்டின் பிரதம மந்திரி பதவியை ஏற்க வாய்ப்பைப் பெற்றார்.

அடுத்த பிரதம மந்திரியாக நியமிக்கப்படுவதற்கு சகல தகுதிகளையும் பெற்றிருந்த சி.பி.டி.சில்வா நோய்வாய்ப்பட்டு லண்டனில் வைத்தி சிகிச்சை பெற்றுக் கொண்டிருந்த காரணத்தினால் தான் அவருக்கு கிடைக்க விருந்த பிரதம மந்திரி பதவி டாக்டர் தஹாநாயக்காவுக்கு கிடைத்தது.

டாக்டர் தஹாநாயக்கா பாராளுமன்ற கூட்டத் தொடரை முடிவுக்கு கொண்டு வர வேண்டும் என்று விடுத்த வேண்டுகோளை அன்று பாராளுமன்றத்தில் இருந்த பெரும்பான்மையான உறுப்பினர்கள் ஏற்க மறுத்தார்கள்.

அப்போது எதிர்க்கட்சித் தலைவராக இருந்த டாக்டர் என். எம் பெரேரா இந்த சம்பவம் குறித்து நாம் அச்சம் கொள்ள அவசியமில்லை என்று எவரையும் பதற்றம் அடையாமல் இருக்குமாறு கேட்டுக் கொண்டார்.

துப்பாக்கிச் சூடு செய்தி கேட்டவுடன் பல சிரேஷ்ட அமைச்சர்களும் பாராளுமன்ற உறுப்பினர்களும் கொழும்பு பெரியாஸ்பத்திரியை முற்றுகையிட்டனர்.

(தொடரும்...)

(தினகரன்)