பெண்கள் இல்லாத தமிழகம்?

எதிர்கால இந்தியா சந்திக்கும் பெரிய பிரச்சினை இதுதான் என்று எச்சரிக்கிறார்கள் ஆய்வாளர்கள். இந்தியாவில் ஆண்களின் எண்ணிக்கையை விட பெண்களின் எண்ணிக்கை வெகுவாய்க் குறைந்து வருகிறது. இந்த நிலை நீடித்தால் 2020இல் திருமணம் செய்து கொள்ள பெண் கிடைக்காமல் மூன்று கோடி ஆண்கள் இருப்பார்களாம்!

குழந்தைகளின் இறப்பு விகிதாசாரத்தைக் குறைக்கவும், அவர்கள் கருவிலே முழுமையாக உருப்பெறுவதற்கு முன் உடலிலுள்ள குறைபாடுகளைக் கண்டுபிடித்து ஏற்ற சிகிச்சையளித்து கருவிலேயே சீர்செய்து ஊட்டச் சத்துள்ள குழந்தைகளை ஈன்றெடுக்கும் நோக்கோடும் கொண்டுவரப்பட்டதுதான் ஸ்கேனிங்கருவி. ஆனால் இன்றைய பெற்றோர்களோ குழந்தையின் ஆரோக்கிய பரிசோதனையை புறம்தள்ளிவிட்டு, கருவில் இருப்பது ஆணா பெண்ணா என்று கண்டறிந்து கொள்வதிலேயே ஆர்வம் காட்டுகின்றனர். கருவிலுள்ளது பெண் என்றால் அதனை கருவிலேயே சிதைத்துவிடும் கொடூர பழக்கங்கள் அதிகரித்து விட்டன. இப்படியான சிசுக் கொலைகளில் இந்தியாவில் உத்தரப்பிரதேசமே முதலிடம் வகிப்பதாக அண்மையில் “ஹிந்து” நாளிதளில் வெளியான கட்டுரையொன்றில் தெரிவிக்கப்பட்டுள்ளது. கருக்கலைப்பில் இரண்டாவது இடம் தமிழகத்துக்காம்.

பிறந்தது பெண் குழைந்தையென்றால் கள்ளிப்பாலையோ, நெல்மணியையோ, அல்லது இளநீரையும் நல்லெண்ணெயையும் கலந்தோ தொண்டைக்குழிக்குள் விட்டுக் கொன்று விடுகிற பழக்கம் 1980களில் தீவிரமாயிருந்தது. இப்போது அதுமாறி விட்டது. ஸ்கேன் இயந்திரத்தில் பார்த்து நவீன முறையில் கருக்கலைப்பைச் செய்து விடுகிறார்கள். பெண் குழந்தையை சுமையாய் நினைக்கிற போலி கெளரவத்திற்கு ஆண்டுதோறும் இந்தியாவில் ஐந்து இலட்சம் பெண் குழந்தைகள் கொல்லப்படுகின்றார்களாம்.

ஸ்கேனிங் மூலம் கண்டுபிடிப்பு, மற்றும் சிகிச்சை நிலையங்களை முறைப்படுத்தும் சட்டத்திருத்தத்தை 1994இல் இந்திய அரசு கொண்டுவந்த பின்பும் பெரும்பாலான ஸ்கேனிங் நிலையங்கள் கருக்கொலை நிலையங்களாகவே இயங்குகின்றன. இதனால் விழுப்புரம், சேலம், தர்மபுரி, சிவகங்கை, தேனி மற்றும் மதுரை மாவட்டங்களில் தோன்றியுள்ள சட்டவிரோத ஸ்கேனிங் நிலையங்களைப் பற்றி தகவல் கொடுப்போருக்கு சன்மானமும் அறிவிக்கப்பட்டிருக்கிறது. இம்மாவட்டங்களில் பெண்களின் இறப்பு விகிதாசாரம் அதிர்ச்சியளிக்கும் விதத்தில் குறைந்து வருவதுதான் இதற்குகாரணம்!

2001ஆம் ஆண்டு எடுக்கப்பட்ட சனத்தொகைக் கணக்கெடுப்பின் படி பெண்களைவிட ஆண்கள் 3.4 கோடிப்பேர் அதிகமிருந்தனர். இப்போது அது 5 கோடியாக உயர்ந்துள்ளது. இந்நிலை நீடித்தால் காலகதியில் பல ஆண்கள் ஒரு பெண்ணுக்காக போட்டி போடுகிற சூழ்நிலை உருவாக நேரிடும். பெண்ணுக்கான போட்டாபோட்டிகளும் வன்முறைகளும் நிகழும். எடை குறைவாகவும் சத்துக்குறைவாகவும் பிறக்கும் குழந்தைகளில் 75 வீதமானவை பெண் குழந்தைகளே, பெண்கள் மத்தியில் எழுத்தறிவும் 39 சத வீதந்தான் உள்ளது. பெண் கொடுமை நீங்குவதற்கு, முதலில் கருக்கொலை நீங்கவேண்டும்.

பெண் குழந்தை பிறந்தால் பருவம் வரும்போது அவளுக்கு அதிக வர தட்சணை கொடுத்தே திருமணம் செய்விக்கவேண்டும். அவளுக்கு கஷ்டப்பட்டு உயர்கல்வியூட்டினாலும் அது கல்யாணம் என்றபெயரில் இன்னொருவரை வாழவைக்கவே பயன்படப்போகிறது. என்பன போன்ற கருத்துக்களால் பிறந்த சமூகச் சீர்கேடுகளே இக்கொடுமை களுக்குக் காரணம். இதனால் தான் உத்தரப்பிரதேசததில் பல ஊர்களிலும் “எதிர்காலத்தில் உங்களுக்கு ஐந்து இலட்சம், அல்லது பத்து இலட்சம் லொத்தர் பரிசுகள் கிடைக்கவேண்டுமா? அப்படியானால் இன்றே எம்மை நாடுங்கள்!” என்று ஸ்கேனிங் மருத்துவ சிகிச்சை நிலையங்கள் பெரிதாக விளம்பரம் செய்கின்றன. இதன் அர்த்தம் யாதெனில், கருவிலுள்ளது பெண் குழந்தையென்று கண்டுபிடித்து சிதைத்துவிட்டால், அக்குழந்தை பிறந்து வளர்ந்து ஆளாகி சீதனம் என்ற பெயரால் ஏற்படுத்தப்போகும் பெரும் செலவை சொற்பசெலவில் தங்களிடம் கருக்கலைப்பு செய்து கொள்வதன் மூலம் தவிர்த்துக் கொள்ளமுடியும் என்பதாகும்.

பொருளாதாரத்தில் மிகவும் பின்தங்கி வறுமைச் சூழலில் வாழும் கிராமப்புற ஏழைப் பெண்கள் மட்டுமே பெண் சிசுக்கொலையில் ஈடுபடுகிறார்கள் என்பதில்லை. வீட்டில் பெண் குழந்தைகள் இருந்தால் சமுதாயத்தில் தங்களுக்கு மரியாதை கிடைக்காது என்று கருதி படித்த பணக்காரர்களும் சிசுக் கொலையில் ஈடுபடுகிறார்கள். பாலினத்தை அறிந்து கொள்வதையும், பெண் குழந்தையென்றால் ஈவிரக்கமின்றிக் கருவிலேயே கொல்வதையும் தடுக்க கடுமையான சட்டங்கள் கொண்டுவரப்படவேண்டும். அத்துடன் வாழ்வில் பெண்களின் முக்கியத்துவம் குறித்து விழிப்புணர்வையும் ஏற்படுத்தவேண்டும் என்கிறார் தமிழக மகளிர் மேம்பாட்டு ஆணைக்குழுவின் தலைவியான குத்சியா காந்தி.

பெண்களுக்காக ஆண்கள் அலைந்து, ஒரு பெண்ணுக்கு ஐந்து கணவர்கள் என்ற மகாபாரதத்து பாஞ்சாலியின் நிலை நாட்டில் வருவதற்குள் பாரதத்து பெண் சிசுக்களைக் காப்பாற்றி சமுதாயம் அதன் இயல்பான ஒழுங்கில் செல்ல வழிசமைக்க வேண்டுமென்பது அவரது மேலான வேண்டுகோளாகும்.

(எஸ். ஜோன்ராஜன்)