இலவச மருத்துவ சேவையின் மகத்துவம்

நாட்டு மக்களின் சுகாதார மேம்பாட்டுக்காக அரசாங்கம் பெருந்தொகை நிதியைச் செலவிட்டு வருகிறது. மக்க ளுக்கான அடிப்படை சுகாதார வசதிகளை ஏற்படுத் துவதற்காகவும் மருத்துவ வசதிகளை அளிப்பதற்காகவும் வருடாந்தம் வரவு செலவுத் திட்டத்தில் பெருந்தொகை நிதியை அரசாங்கம் ஒதுக்குகிறது.

உலகில் இலவச மருத்துவ வசதி வழங்கப்படுகின்ற நாடுகளில் இலங்கையை சிறப்பாகக் குறிப்பிட முடியும். அரசாங்க வைத் தியசாலைகளுக்குச் செல்கின்ற ஒவ்வொரு நோயாளருக்கும் அளிக்கப்படும் சிகிச்சைக்குரிய செலவினம் சாதாரணமான தல்ல. எமது நாட்டு அரசினர் வைத்தியசாலைகளில் கிடைக் கின்ற மருத்துவ சிகிச்சையின் தரமும் உயர்வானது. உலகில் மருந்துப் பொருட்களின் விலைகள் அதிகரித்துள்ள இன்றைய நிலையில் மருந்துகளுக்காகவும் மருத்துவ பரிசோதனைகளுக் காகவும் கூடுதல் பணத்தை அரசாங்கம் செலவிட வேண்டி யுள்ளது.

இலவச மருத்துவத்தினால் தங்களுக்குக் கிடைக்கும் வாய்ப்புக் குறித்து நாட்டு மக்களில் அநேகமானோர் சிந்தித்துப் பார்ப் பது குறைவு. அதேசமயம் வைத்தியசாலைகளில் கடமை புரிகின்ற ஊழியர்களில் சிலரும் இதனையிட்டு சிந்தித்துப் பார்ப்பதில்லை. மக்களுக்கான இலவச மருத்துவத்துக்காக அரசாங்கம் பெருந்தொகைப் பணத்தைச் செலவிடுகையில் அச்சலுகையை மக்களுக்கு திறம்பட வழங்குவதற்கான பொறுப்பு வைத்தியசாலை ஊழியர்களுக்கு உண்டு. அவர்கள் தங்களது கடமையில் அலட்சியமாக இருப்பார்களானால் இல வச மருத்துவத்தின் பலாபலன்களை மக்கள் அனுபவிக்க முடியாமல் போய்விடும்.

அரசாங்க வைத்தியசாலைகளை பொதுவாக எடுத்து நோக்குவோ மானால் அங்கு கடமையாற்றுகின்ற டாக்டர்கள் தொடர்பான மனக்குறைகளைப் பார்க்கிலும் அங்குள்ள மருத்துவ தாதிகள் மற்றும் சிற்றூழியர்கள் சிலர் தொடர்பாகவே கூடுதலான புகார்கள் பொதுமக்கள் தரப்பிலிருந்து தெரிவிக்கப்படுகின்றன. பொதுமக்கள் கூறுகின்ற இப்புகார்களில் உண்மை இல்லா மலில்லை.

பிரசவ விடுதிகளில் அனுமதிக்கப்படும் கர்ப்பிணிப் பெண்கள் மீது எரிந்து விழுதல், வார்ட்டுகளில் தங்கியிருந்து சிகிச்சை பெறும் நோயாளர் மீது உரிய கவனம் செலுத்தாமை, வெளி நோயாளர் பிரிவுக்கு சிகிச்சை பெற வரும் நோயாளரை அவமதிக்கும் போக்கில் நடந்து கொள்ளல் போன்ற பல்வேறு வகையான புகார்கள் வைத்தியசாலைத் தாதிகள் சிலர் மீது நோயாளர்களால் தெரிவிக்கப்படுகின்றன. வைத்தியசாலைகளில் கடமையாற்றும் ஊழியர்களில் கூடுதலானோர் தங்களது பணியில் பொறுப்புடன் நடந்து கொள்கின்ற போதிலும் அலட் சியப் போக்கும் கடமைப் பொறுப்பற்ற தன்மையும் கொண்ட ஒரு சில ஊழியர்களால் அவ்வைத்தியசாலைக்கே அவப் பெயர் ஏற்படுகிறது.

இத்தகைய பொறுப்பற்ற ஊழியர்கள் மீது கண்காணிப்பு செலுத்தி உரிய நடவடிக்கை மேற்கொள்வது உயர் அதிகாரிகளின் கடமையாகும். அப்போதுதான் இலவச மருத்துவ சேவையின் பலாபலன்களை நாட்டு மக்கள் சரிவர அனுபவிக்க வழியேற்படும்.

கிழக்கு மாகாண சுகாதார அமைச்சர் எம்.எஸ். சுபைர் மேற் கொண்டிருக்கும் நடவடிக்கையொன்றை சிறந்ததொரு முன் னுதாரணமாக இங்கு குறிப்பிடலாம். மாகாண சபையின் கீழ் இயங்குகின்ற வைத்தியசாலைகளில் திடீர் சோதனைகளை மேற்கொண்டு அங்கு நிலவும் குறைகளை அறிந்து கொள் வதற்காக குழுவொன்றை நியமித்திருக்கிறார் மாகாண அமைச் சர் சுபைர். கிழக்கு மாகாண சுகாதார அமைச்சின் செயலா ளரான யு.எல்.ஏ. அர்ஸ் தலைமையில் மேற்படி திடீர் சோதனைக் குழு இயங்கி வருகிறது.

வைத்தியசாலைக் குறைபாடுகளைக் கண்டறிவதில் இதுபோன்ற தொரு கடுமையான நடவடிக்கை மிகவும் அவசியமாகும். அதேசமயம் தேசிய வைத்தியசாலைகள் மீதும் இது போன்ற கண்காணிப்புகள் செலுத்தப்படுவது பொருத்தமாகும். மட்டக் களப்பு, அம்பாறை மாவட்டங்களைப் பொறுத்தவரை அங்கு ள்ள மக்களின் மருத்துவத் தேவையைக் கவனிக்கும் முக்கிய மருத்துவமனையாக மட்டக்களப்பு போதனா வைத்தியசாலை விளங்குகிறது. இவ்வைத்தியசாலையின் மருத்துவ தாதிகள் ஒரு சிலரின் பொறுப்பற்ற தன்மை தொடர்பாக ஏனைய ஊழியர்களுக்கும் வைத்தியசாலைக்கும் அவப்பெயர் ஏற்படு வதாக நோயாளர் தரப்பிலிருந்து தொடர்ச்சியாகப் புகார்கள் வருகின்றன. இதுபோன்ற பொறுப்பற்ற ஒரு சில ஊழியர்கள் மீது உரிய நடவடிக்கை மேற்கொண்டு வைத்தியசாலை மீது மக்களின் நம்பிக்கையைப் பெறுவது சம்பந்தப்பட்ட அதி காரிகளின் பொறுப்பாகும்.

இலவச மருத்துவத்துக்காக அரசாங்கம் பெருந்தொகைப் பணத் தைச் செலவிடும் போது அரசின் நல்ல நோக்கத்தைச் சீர் குலைக்க எவருக்கும் இடமளிக்க முடியாது.

(தினகரன்)