கோட்பாட்டு ரீதியான எதிர்ப்பல்ல

பதினெட்டாவது அரசியலமைப்புத் திருத்தம் அமோக ஆதரவுடன் பாராளுமன்றத்தில் நிறை வேறியிருக்கின்றது. மூன்றிலிரண்டு பெரும்பான்மைக்குத் தேவையான எண்ணிக்கையிலும் பார்க்கப் பதினொரு வாக்குகள் கூடுதலாகப் பெற்று நிறைவேறியிருக்கின்றது. மக்கள் மத்தியில் பொது விவாதத்துக்கு இடமளித்து அவர்களின் அபிப்பிராயத்தைப் பெறாமல் அவசரமாக நிறைவேற்றப்படுகின்றது என்ற எதிரணியின் குற்றச்சாட்டுக்குத் தகுந்த பதிலடியாக இத் திருத்தத்துக்கு ஆதரவாக இடம்பெற்ற ஆர்ப்பாட்டங்கள் அமைந்திருந்தன.

கொழும்பிலும் அதைச் சுற்றியுள்ள பிரதேசங்களிலும் மாத்திரமன்றி ஏனைய மாவட்டங்களிலும் ஏராளம் மக்கள் பதினெட்டாவது அரசியலமைப்புத் திருத்தத்துக்கு ஆதரவு தெரிவித்து ஆர்ப்பாட்டங்களில் ஈடுபட்டார்கள். மக்களின் அபிப்பிராயம் இந்த ஆர்ப்பாட்டங்களில் தெளிவாக வெளிப்பட்டது. அரசியலமைப்புத் திருத்தத்துக்கு ஆதரவாகப் பல்லா யிரக்கணக்கில் மக்கள் வீதியில் இறங்கி ஆர்ப்பாட் டம் செய்ததன் முக்கியத்துவத்தை எதிரணியினர் சரியாகப் புரிந்துகொள்ள வேண்டும். ஐக்கிய தேசியக் கட்சி அவசரமாக நிறைவேற்றிய அரசியலமைப்பே இன்று நடைமுறையில் இருக்கின்றது. இந்த அரசியலமைப்பில் பல மக்கள் விரோத சரத்துகள் உள்ளன.

இத்தகைய சரத்துகளில் ஒன்றுதான் 31 (2) வது சரத்து. இரண்டு தடவைகள் ஜனாதிபதியாகத் தெரிவு செய்யப்பட்ட எவரும் இன்னொரு தடவை தெரிவு செய்யப்படுவதற்குத் தகுதியுடையவரல்லர் என்பது இச் சரத்து. இது மக்களின் அடிப்படை உரிமையான வாக்குரிமைக்கு விலங்கு போடும் சர த்து. மூன்றாவது தடவையாகவோ அதற்கும் மேலாகவோ ஒருவரை ஜனாதிபதியாகத் தெரிவு செய்வத ற்கும் நிராகரிப்பதற்கும் மக்களுக்கு மாத்திரமே உரிமை உண்டு. அந்த உரிமையை அவர்கள் தேர்தலிலேயே பிரயோகிக்க முடியும். அதற்கு இடமளிக்காதிருப்பது மக்களின் விருப்பத்துக்கு மாறாக ஒருவரை அவர்கள் மீது ஜனாதிபதியாகத் திணிப்பதற்குச் சமன். இந்தச் சரத்தை அரசியலமைப்பின் கறுப்புச் சரத்துகளுள் ஒன்று எனக் கூறலாம். பதினெட்டாவது திருத்தத்தின் மூலம் இந்தக் கறுப்புச் சரத்து நீக்கப்பட்டிருக்கின்றது.

மீண்டுமொரு தடவை தான் ஜனாதிபதியாகத் தெரிவு செய்யப்படுவதற்குத் தடையாக இருந்த கட்டுப்பாட்டை வெனிசூலாவின் ஜனாதிபதி சாவெஸ் நீக்கியதை வரவேற்ற இடதுசாரிகளும் பதினெட்டாவது திருத்தத்துக்கு எதிராக வீதியில் இறங்கியது வியப்பாக இருக்கின்றது. ஜனாதிபதியொருவரின் பதவிக் காலம் தொடர்பான கட்டுப்பாட்டை நீக்குவது மக்களின் ஜனநாயக உரிமையை வலுப்படுத்துவதாக இருக்கையில், எதிரணியினர் அதற்குத் தெரிவிக்கும் எதிர்ப்பு கோட்பாட்டு ரீதியான எதிர்ப்பாக அல்லாமல் மஹிந்த ராஜபக்ஷ என்ற தனிநபர் மீதான எதிர்ப்பாகவே தோன் றுகின்றது. ஜனாதிபதி மஹிந்த ராஜபக்ஷவை எதிர்ப்பதற்குத் தேர்தல் களத்தைப் பயன்படுத்தாமல் மக்களின் அடிப்படை ஜனநாயக உரிமையைப் பணயம் வைப்பது முதிரா அரசியலின் வெளிப்பாடு.

(தினகரன்)