மக்களிடமிருந்து அந்நியமாகும் எதிர்க் கட்சி

பிரித்தானிய பாராளுமன்றத்தின் எதிர்க் கட்சித் தலைவரை மாட்சிமை தங்கிய மகாராணியின் மாற்றுப் பிரதமர் எனக் கூறுவது வழக்கம். பாராளுமன்ற ஜனநாயகத்தில் எதிர்க் கட்சியின் முக்கியத்துவத்தை வலியுறுத்துவதற்காகவே இவ்வாறு கூறுவர்.

பாராளுமன்ற அரசியலில் எதிர்க் கட்சி முக்கியமானது. அரசாங்க தரப்பிலிருந்து உறுப்பினர்கள் கட்சி மாறியதால் எத்தனையோ அரசாங்கங்கள் வீழ்ந்திருக்கின்றன. இலங்கையில் மாத்திரமன்றி உலக நாடுகள் பலவற்றில் இதற்கு உதாரணங்கள் உண்டு. இதனால், ஆளுங்கட்சி எப்போதும் எதிர்க் கட்சியை அச்சத்துடன் நோக்குவது வழமை. ஆனால் இலங்கையில் இன்று அந்த நிலை இல்லை. எதிர்க் கட்சியே ஆளுங்கட்சியை அச்சத்துடன் நோக்குகின்றது. அந்த அளவுக்கு எதிர்க் கட்சியிலிருந்து ஆளுங்கட்சிக்கு உறுப்பினர்கள் மாறிக்கொண்டிருக்கின்றார்கள். எதிர்க் கட்சிக்குத் தொடர்ச்சியாக ஏற்படுகின்ற இப்பின்னடைவு அரசறிவியல் அறிஞர்களின் ஆய்வுக்கு உட்பட வேண்டியது.

விரைவில் ஆட்சிக்கு வரமுடியும் என்ற நம்பிக்கை இருக்கும் வரை எதிர்க் கட்சி உறுப்பினர்கள் அரசாங்க தரப்புக்கு மாறப்போவதில்லை. எதிர்க் கட்சியில் எவ்வளவு காலம் இருந்தாலும் ஆட்சி க்கு வரப்போவதில்லை என்பது தெளிவாகிய நிலையிலேயே கட்சி மாறுவது பற்றிய சிந்தனை ஏற்படும்.

கடந்த இரண்டு பொதுத் தேர்தல்களில் ஐக்கிய தேசியக் கட்சி வேட்பாளர்களாகப் போட்டியிட்டு வெற்றியீட்டியவர்களில் முப்பதுக்கு மேற்பட்டவர்கள் அக்கட்சியிலிருந்து வெளியேறி அரசாங்கத்துடன் சேர்ந்திருக்கின்றனர். ஐக்கிய தேசியக் கட்சி ஆட்சிக்கு வரும் என்ற நம்பிக்கை இல்லாததாலேயே அவர்கள் வெளியேறினார்கள்.

பாராளுமன்ற உறுப்பினர்கள் மாத்திரமன்றி மக்களும் ஐக்கிய தேசியக் கட்சியில் நம்பிக்கை இழக்கி ன்றனர். தங்கள் பிரதிநிதியாகச் சரியான முறையில் செயற்படாததாலேயே மக்கள் இக் கட்சியில் நம்பிக்கை இழக்கின்றனர். பதினெட்டாவது அரசிய லமைப்புத் திருத்த விவாதத்தின்போது ஐக்கிய தேசியக் கட்சி நடந்துகொண்ட முறை இதற்கு உதாரணம்.

பதினெட்டாவது திருத்தத்தை எதிர்ப்பதென்றால் பாராளுமன்றத்தில் இருந்து அதற்கு எதிராகப் பேசியிருக்க வேண்டும். நேடியாகப் பிரச்சினைக்கு முகங்கொடுத்துக் கட்சியின் நிலைப்பாட்டில் நின்று விவாதிப்பது தான் உண்மையான எதிர்க் கட்சி. அதைவிட்டு, வெளியேற்றம் என்ற பெயரில் பிரச்சினையிலிருந்து ஓடி மறைவது மக்கள் பிரதிநிதித்துவத்தின் பண்பாகாது. இவ்வாறான செயற்பாடுகளாலேயே ஐக்கிய தேசியக் கட்சி மக்களிடமிருந்து துரிதகதியில் அந்நியமாகின்றது.

எதிர்க் கட்சியின் தலைமை நிதானமாகச் சிந்திக்க வேண்டும். மக்களிடமிருந்து அந்நியமாகுவதைத் தவிர்ப்பதற்கான நடவடிக்கைகளை எடுக்க வேண்டும். ஜனநாயகம் வலுவடைவதற்கு இது அவசியம்.

(தினகரன்)