சிறுநீரக நோய்கள் நீங்க சித்த மருந்துகள்

இடுப்புக்குச் சற்று மேலே முதுகுத் தண்டுக்கு இரு பக்கங்களிலும் பக்கத்திற்கு ஒன்றாக ஏறக்குறைய நான்கு அங்குல நீளமும், இரண்டு அங்குல அகலமும், ஒரு அங்குலப் பருமனும் கொண்டதாக இருக்கும். இதன் உட்பகுதி முழுவதும் மயிரிழை போன்ற மிகச் சிறிய இரத்தக் குழாய்கள் குறுக்கும் நெடுக்குமாய் பின்னப்பட்டு வலை போலக் காணப்படும் அமைப்பே சிறுநீரகமாகும். இதை நம் உடலின் வடிகால் என்று கூறலாம்.

இருதயத்திலிருந்து பம்ப் செய்யப்பட்ட சுத்த இரத்தமானது உடல் முழுவதும் சென்று அவைகளுக்கு வேண்டிய சக்தியை அளித்து அங்குள்ள வேண்டாத கழிவுகள், தேய்ந்த அழிந்த பொருட்களை எடுத்து வரும் ரத்தம் இந்த வடிகாலான சிறுநீரகத்தை அடைகிறது. அங்கு மிக விரைவாக வேண்டாத பொருட்களையும், நீரையும் பிரித்துவிட்டு இரத்தத்தை இருதயத்திற்கு அனுப்புகிறது. கழிவுப் பொருட்களை ஒரு வாய்க்காலின் மூலமாகச் சிறுநீர் பைக்கு அனுப்புகிறது. சிறு நீர்ப்பை அடி வயிற்றின் கீழ்ப்பாகத்தில் இருக்கிறது. அங்கு கழிவு நீர் சொட்டுச் சொட்டாய் வந்து சேரும்.

சிறுநீர்ப்பை பாதி நிறைந்ததும் சிறுநீர் கழிக்க வேண்டும் என்ற உணர்ச்சி ஏற்படும். இந்தச் சிறுநீரில் 95 சதவீதம் நீரும், 5 பங்கு பிற கழிவுப் பொருட்களும் இருக்கும். அதில் பாதி அளவு தசைகளும் எலும்புகளும் அழிவதால் ஏற்படும் கழிவுப் பொருட்களாகிய யூரியாவும் மீதியில் நாம் உண்ணும் உணவில் உள்ள உப்பு சல்பேட் போன்றவை இருக்கும்.

பிட்யூட்டரி, தைராய்டு, கல்லீரல், பாங்கிரியான் இவற்றில் ஏதேனும் ஒன்றில் நோயோ, பாதிப்போ ஏற்பட்டால் அது சிறுநீரகத்தையும் பாதிக்கும்.

சிறுநீரகக் கல்

சிறுநீர் போக வேண்டும் என்ற உணர்ச்சி ஏற்பட்டதும் சிறுநீர் கழிக்க வேண்டும். அவ்வாறு போகாமல் அடக்கி வைப்பது, கடின நீர், உப்புச் சத்தான நீர் குடிப்பது போன்றவற்றால் சிறு மணல் போன்ற உப்புகள் சிறுநீரகத்தில் தோன்றும். அதிகம் சுத்தமான நீர் குடித்தல், யோகாசனம் செய்தல் போன்றவற்றால் இதனை நீக்கலாம். அவ்வாறு செய்யாது இருந்தால் அந்த மணல் ஒன்று சேர்ந்து உறைந்து கற்களாக மாறும். சிறு நீர் போகும் வழியை அடைக்கும் பொறுக்க முடியாத வலி ஏற்படும்.

சிறு நீரக நோய்கள் நீங்க சித்தர்கள் பல்வேறுபட்ட மருந்துகளை சொல்லியுள்ளார்கள்.

1. ரோஜாப் பூவை ஊற வைத்த தண்ணீரில் முள்ளங்கியின் சாறு விட்டு தினம் நான்கு வேளை குடிக்க நீர்ச்சுருக்கு நோய் ஒழியும்.

2. நன்னாரி வேர், கொத்துமல்லி, சிறுநெருஞ்சி தலா 50 கி. எடுத்து நசுக்கி 2 லீட்டர் தண்ணீரில் இட்டுக் கொதிக்க வைத்து வடித்து தினம் மூன்று வேளை நூறு மில்லி வீதம் சாப்பிட்டு வர நீர் எரிச்சல் தணியும்.

3. கொத்தமல்லியும், புளியங்கொட்டைத் தோறும் வறுத்துப் பொடித்து காபி போன்று கசாயமிட்டுக் குடித்தால் நீர்க்கடுப்பு தீரும்.

4. ஆடுதீண்டாப்பாளை, கருஞ்சீரகம் இவற்றை அளவாக எடுத்து நீர் விட்டரைத்து தொப்பிளின் கீழ் பூச நீரடைப்பு விலகும்.

5. வாழைக்கிழங்கில் ஊறும் நீருடன் நெல்லிக்காய் அளவு சுண்ணாம்பு சேர்த்து சாப்பிட மூத்திர அடைப்பு அகலும்.

6. வாழைத்தண்டை சிறு துண்டுகளாக்கி தயிரில் கலக்கி தாளிக்க தயிர் பச்சடியாக உண்ண நீர் இறங்கும்.

7. வெங்காயத்தை அரைத்து விழுதாக்கி 100 கிராம் வீதம் உட்கொள்ள மூத்திரத் தாரையில் உண்டாகும் கல் கரையும். கருஞ் சீரகத்தைத் தேனுடன் கலந்து சாப்பிட்டு வர கல் கரையும்.

8. பொட்டிலுப்பு 100 கிராம், வெங்காரம் 100 கிராம், சிலாசத்து 100 கிராம் இவை மூன்றையும் நெல்லிக்காய்ச் சாறு, கற்றாழைச்சாறு, முள்ளங்கிச் சாறு, வாழைத்தண்டுச் சாறு இவை மூன்றையும் முறையே ஒவ்வொரு நாளாக விட்டு அரைத்து வில்லைத் தட்டி புடமிட வேண்டும். புடம் ஊறிய பிறகு எடுத்துக் கல்வத்தில் இட்டு அரைத்துப் புட்டியில் எடுத்து ¨வைத்துக்கொண்டு 20 மில்லி கிராம் மோரில் கலந்து சாப்பிட்டு வர கல்லடைப்பு நீங்கும்.

9. வெங்காரம் சிலாசத்து, நண்டுக்கால் இவற்றை 20 கிராம் எடுத்து கற்றாழைச் சாறு விட்டு அரைத்து புடமிட்டு எடுத்துக் கல்வத்திலிட்டு அரைத்து எடுத்து வைத்துக்கொண்டு காலை, மாலை சிறிய அளவு எடுத்து நெய்யில் கலந்து சாப்பிட வேண்டும் சிறுநீர் மோர் கலந்தது போல் வெளியாவது நிற்கும்.

10. முடக்கொத்தான் ஒரு பிடி வெள்ளப்பூண்டு, இரண்டையும் அரைத்து மூன்று நாட்கள் உட்கொள்ள சிறுநீர்க்கட்டு இறங்கும்.