அவல வாழ்வுக்கு விடிவு நெருங்குகிறது

மலையகப் பெருந்தோட்டங்களில் பணிபுரியும் தொழிலாளர்கள் தொன்றுதொட்டு அனுபவித்து வரும் இருப்பிடப் பிரச்சினைக்கு காத்திரமான தீர்வினைக் காண்பதற்கான திட்டங்கள் வகுக்கப்பட்டுள்ளன. மலையகப் பெருந்தோட்ட வரலாற்றைப் பொறுத்தவரை உத்தேச வீடமைப்புத் திட்டமானது சரித்திரத்தில் இடம்பெறப் போகிறதென்பதை மறுக்க முடியாது. பரம்பரை பரம்பரையாக ‘லயன்’ என்றழைக்கப்படுகின்ற சிறு குடியிருப்புகளில் அடிப்படை வசதிகளின்றி வாழ்ந்து வரும் அம்மக்கள் எதிர்காலத்தில் தங்களுக்கென்ற தனித்தனி வீடுகளில் வசிக்கும் வாய்ப்பைப் பெறப் போகிறார்கள். தோட்டத் தொழிலாளர்களைப் பொறுத்தவரை இதனை விட மகிழ்ச்சியான செய்தி அவர்களுக்கு இருக்கவே முடியாது. ஏனெனில் ‘லயன்’ குடியிருப்புகளில் வாழ்கின்ற அவலமானது அவர்களுக்கு மட்டுமே புரியும்.

சிதைந்து போன, நூற்றுக்கணக்கான வருடங்கள் பழைமை வாய்ந்த, அடிப்படை வசதிகளே இல்லாத, சிறு குடிசை போன்ற இருப்பிடங்களில் வாழ்கின்ற குடும்பங்கள் எதிர்கொள்கின்ற வேதனைகள் வார்த்தைகளால் விபரித்து ஏனையோருக்குப் புரிய வைக்க முடியாதவை. அந்நியர் ஆட்சிக் காலத்தில் பெருந்தோட்டத் தொழிலுக்காக தென்னிந்தியாவிலிருந்து இலங்கைக்கு வந்து சேர்ந்த தொழிலாளர் சமூகம் இன்று பல தலைமுறைகளைக் கடந்து வந்த நிலையில் உள்ளது. ஆனாலும் லயன் வாழ்க்கையென்பது அவர்களுக்கு எழுதப்பட்ட விதியாகவே இதுகாலவரை தொடர்ந்து வந்துள்ளது.

லயன் வாழ்க்கை முறை ஒழித்துக் கட்டப்பட வேண்டுமென்ற விழிப்புணர்வை மலைகத் தோட்டங்களில் உருவாக்கிய பெருமை ஸ்ரீலங்கா சுதந்திரக் கட்சி தலைமையிலான அரசாங்கத்தையே சாரும். இந்த ஆட்சிக் காலத்திலேயே அங்கு ஓரளவாவது அடிப்படை வசதிகளுடனான சிறுசிறு வீடுகள் நிர்மாணிக்கப்படத் தொடங்கின. ஆனாலும் லயன் குடியிருப்புகளிலேயே பெருமளவான தொழிலாளர்கள் இன்னும் வசிக்கின்றனர். கதவு, யன்னல், கழிப்பறை, நீர் வசதி போன்ற அடிப்படை வசதிகளில்லாத குடியிருப்பொன்றில் ஒன்றுக்கு மேற்பட்ட குடும்பங்கள் வாழ்கின்ற பரிதாபமும் அங்குதான் நிலவுகிறது.

இத்தகைய துன்பங்களுக்கு முடிவு கட்டுவதற்கான காலம் தற்போது நெருங்கியிருக்கிறது. மலையகத் தோட்டங்களில் காணப்படும் ‘லயன்’ குடியிருப்புகள் அனைத்தையும் இல்லாதொழித்து அங்கு தனித்தனி வீடுகளைக் கொண்ட கிராமங்களை உருவாக்குவதற்கு நடவடிக்கை எடுக்கப்பட்டு வருவதாக இலங்கை தொழிலாளர் காங்கிரஸ் தலைவரும் பொருளாதார அபிவிருத்தி பிரதியமைச்சருமான முத்து சிவலிங்கம் தெரிவித்திருக்கிறார்.

இந்திய அரசாங்கத்தின் உதவியுடனேயே இத்திட்டம் மேற்கொள்ளப்படவிருக்கிறது. இத்திட்டத்தின் முதல் கட்டமாக இந்தியா ஆறாயிரம் வீடுகளை நிர்மாணிக்கவுள்ளது.

மலையகப் பெருந்தோட்டங்களுக்கு மத்தியிலேயே தோட்டத் தொழிலாளர்களின் லயன் குடியிருப்புகள் தற்போது உள்ளன. புதிய திட்டத்தின் மூலம் தொழிலாளர்களின் வீடுகள் வேறிடத்திலும் தொழில் புரியும் இடங்கள் மற்றொரு இடத்திலும் அமையவுள்ளன.

‘லயன்’ என்ற பதம் இல்லாதொழிக்கப்படுவது ஒருபுறமிருக்க, அவர்களது வாழ்க்கைத் தரமும் உயர்வதற்கு இத்திட்டத்தின் வாயிலாக வழியேற்படப் போகிறது. அம்மக்கள் தோட்டங்களிலேயே பிறந்து தோட்டங்களுக்காகவே தங்களை அர்ப்பணித்து வாழ்ந்து இறுதியில் எந்தப் பலனுமேயின்றி மறைந்து போகிறார்களென்ற வேதனைமிகு நிலைமை இனிமேல் இருக்காது.

அவர்கள் நிம்மதியாக வாழ்வதற்கான இல்லம் கிடைக்குமிடத்து இன்றைய துன்பத்தில் பாதி மறைந்து போய் விடும். அரசாங்கத்தின் அபிவிருத்தித் திட்டங்களுக்கு இந்தியா அளித்துவரும் பல்வேறு உதவிகளின் ஓர் அம்சமாக தோட்டத் தொழிலாளர்களுக்குக் கிடைக்கப் போகின்ற வீடமைப்பு உதவியைக் குறிப்பிடலாம். உரிய இருப்பிடமின்றி அவலத்தில் வாழும் தோட்டத் தொழிலாளர்களுக்குக் கிடைக்கவிருக்கும் இந்த வாய்ப்பு உண்மையிலேயே மகிழ்ச்சிக்குரியதாகும்.

(தினகரன்)