உலக ஓசோன் தினம் இன்று

பூமியின் நண்பர்களாவோம்!

(எஸ்.எம். மன்சூர்)

மனிதன் வாழ்வதற்கு படைக் கப்பட்டதாக கருதப்பட்டு வந்த புவிச்சூழல் (பூமி) அண்மைக்காலமாக பல்வேறு பாதிப்புக்களைச் சந்தித்து வருகிறது. “மனிதன் சூழலைப் பாதுகாத்தால் சூழல் மனிதனைப் பாதுகாக்கும்” என்கிற ஒரு வாசகத்தின் அடிப்படை யில் பார்க்கின்ற போது மனிதன் சூழலைப் பாதுகாப்பதிலிருந்து தவறி விடுகின்றான் என்பதையே இக்கூற்று விளக்குகின்றது.

இருந்தும் கடந்த பல வருடங்களு க்கு முன்னர் மனிதனின் செயற் பாடுகளின் இயற்கைக்கு மாற்றமாக சில வெளிப்பாடுகள் ஏற்பட்ட போதுதான் இந்த ஓசோன் என்கிற வளிமண்டலத்தில் காணப்படுகின்ற ஒரு படையின் செயற்றிறனின் அதிமுக்கியத்துவத்தை அனைவரும் உணர்ந்து கொண்டனர்.

அப்போதுதான் உலகமும் விழித்துக் கொண்டது ஓசோன் படலத்தைப் பாதுகாக்கும் எண்ணத்துடன் உலகளாவிய ரீதியில் 1980 ஆம் ஆண்டில் ஓசோனில் ஓட்டை விழுந்திருக்கின்ற விடயத்தைக் கண்டுகொண்டனர் அறிஞர்கள்.

அதன்பிற்பாடு ஓசோனின் முக்கியத்துவம் அறியப்படலாயிற்று. அந்தவகையில் ஓசோனைப் பாதுகாக்கும் எண்ணம் கொண்ட சூழலியற் அறிஞர்கள் ஐக்கிய நாடுகளின் ஒத்துழைப்புடன் இதனைப் பாதுகாக்கும் தினத்தை ஏற்படுத்தி வருடந்தோறும் இதன் முக்கியத்துவம் உலகளாவிய ரீதியில் ஏற்படுத்தப்பட்டு வருகின்றமை குறிப்பிடத்தக்கதாகும்.

ஓசோனைப் பாதுகாக்கும் உலக சுற்றாடல் நிபுணர்களின் ஒன்றுகூடல் 1985 ஆம் ஆண்டில் மார்ச் 22 இல் ஒஸ்ரியாவின் தலைநகரான வியன்னாவில் நடைபெற்றது. அங்கு ஓசோனைப் பாதுகாப்பதன் முக்கியத்துவம் பற்றி விரிவாக ஆராயப்பட்டதன் பிற்பாடு மேற்கொள்ளப்பட்ட முக்கியத்துவமிக்கதாக இணக்கம் காணப்பட்டது.

1987 செப்டெம்பர் 16 இல், அதன் முதற்கட்டமாக ஐக்கிய நாடுகளின் சுற்றாடல் நிகழ்ச்சித் திட்டத்தினால் கனடாவின் மொன்றியல் நகரில் ஓசோனைப் பாதுகாக்கும் சாசனம் ஒப்பமிடப்பட்டு, அது மொன்றியல் சாசனம் எனப்படலாயிற்று. அதனைத் தொடர்ந்து ஒவ்வொரு வருடமும் இத்தினத்தை மக்கள் முன் விழிப்பூட்டுவதற்காக அனுஷ்டிக்கப்பட்டு வருகின்றது.

பொதுவாக வளிமண்டலத்தில் காணப்படுகின்ற காபனீரொட்சைட்டு, நைதரசன் ஒட்சைட்டுக்கள், நீராவி ஆகியன பச்சைவீட்டு வாயுக்கள் எனவும் அழைக்கப்படுகின்றன. பூமியின் வெப்பநிலை பச்சை வீட்டு வாயுக்களால்தான் நிர்ணயிக்கப்படுவதாக கூறப்படுகின்றது.

புவியின் கடல் மட்டத்திலிருந்து பதினைந்து தொடக்கம் முப்பது கிலோ மீற்றர் வரையான உயரத்தில் காணப்படுகின்ற ஓசோன் வாயுப்படலத்தில் சூரியனிலிருந்து பூமியை அதாவது வளிமண்டலத்தை நோக்கியதாக வருகின்ற கதிர்வீச்சில் காணப்படுகின்ற ஊதாக்கதிர்கள் வளியிலுள்ள ஒட்சிசனைத் தாக்கி ஓசோனை உருவாக்குகின்றன.

ஓசோன் ஓட்டைகள் விசாலமாகி வருவதை உணர்ந்ததன் விளைவு விஞ்ஞானிகளினால் 1920 ஆண்டு காலப்பகுதியில் தயாரிக்கப்பட்ட சில வகையான இரசாயனப் பதார்த்தங்கள் காரணமென கண்டறிந்தனர். இதில் முக்கியமானதுதான் குளோரோ புளோரே காபன்களாகும்.

ஓசோன் படலம் அரிப்புறுமானால் மனிதனுக்கு மட்டுமன்றி புவியில் காணப்படுகின்ற அனைத்துவகை உயிரினங்களுக்கும் பாரிய பாதிப்பு ஏற்படும் என்பதையும் விஞ்ஞானிகள் எச்சரிக்கை விடுத்துள்ளனர். இவ்வாறு பாதிப்புக்குளாகின்ற ஓட்டையின் ஊடாக புவியில் விழுகின்ற ஊதாக்கதிர்வீச்சின் அளவு அதிகரிப்பதனால் தோல் புற்றுநோய், கண்நோய்கள், தாவரங்களின் ஒளித் தொகுப்பு பாதிக்கப்படுவதுடன் அதன் உற்பத்திகளும் குறைவடைதல் அல்லது குன்றுதல், கடல் தாவரங்களின் வளர்ச்சியும் குன்றி மீன்கள் விகாரமடைந்து காணப்படும். எனவேதான் புவியைப் பாதுகாத்து பின்சந்ததிக்கு இதனை ஒப்படைக்கின்றபோது மனிதன் வாழுவதற்கேற்றவாறு வழங்குதல் அவசியமாகும் என்பதை உணர்ந்தபடியினால்தான் இத்தினம் ஒரு விழிப்புணர்வை ஏற்படுத்தும் நோக்கம் சுற்றாடல் ஆர்வலர்களிடம் காணப்படுகிறது.

எனவே இன்று பலராலும் பேசப்படுகின்ற ஓசோன் படையைப் பாதுகாப்பதற்கு எம்மால் என்னென்ன நடவடிக்கைகளை மேற்கொள்ள முடியுமோ அவற்றை தலைமேல் பாரமாக எடுத்து செயற்படுத்துகின்ற போது ஓட்டை விழுவதிலிருந்து உலகத்தைப் பாதுகாத்து, நம்மையும், நமது பிற்சந்ததியினரையும் பாதுகாப்பான உலகிற்கு அழைத்துச் செல்ல இன்றே புவியின் பாசமிகு உறவினராக நம்மை நாம் பிரகடனப்படுத்தி மனவுறுதி எடுப்போமானால் இயற்கையின் அழிவிலிருந்து மீண்டுகொள்ளலாம் என்பது திண்ணம்.