மொழித் தடையை நீக்க வேண்டும்

இலங்கையில் இனங்களுக்கிடையிலான நல்லுறவை வெகுவாகப் பாதித்த விடயங்களில் அரசகரும மொழிச் சட்டம் முக்கிய இடத்தை வகிக்கின்றது. சிங்களம் மட்டும் சட்டம் என அறி யப்பட்ட இச் சட்டம் நடைமுறைக்கு வந்த பின்னர் இனங்களுக்கு இடையிலான இடைவெளி காலத்துக்குக் காலம் விசாலித்து வரத் தொடங்கியது. அரசகரும மொழிச் சட்டம் நடைமுறைக்கு வருவதற்கு முன் இல ங்கை மக்களுக்கு அந்நியமான ஆங்கிலமே நிர்வாக மொழியாக இருந்த போதிலும், தமிழ் மொழி பேசுவோரில் கணிசமானோர் ஆங்கில மொழியறிவு உள்ளவர்களாக இருந்ததால் அம்மக்கள் நடைமுறையில் பெருமளவு கஷ்டங்களுக்கு உள்ளாகவில்லை. சிங் களம் நிர்வாக மொழியாகியதும் சிரமங்களை அவர்கள் எதிர் நோக்கினர். அரச அலுவலகங்களில் தங்கள் கருமங்களை ஆற்று விப்பதில் சிரமப்பட்டனர்.

இந்திய - இலங்கை ஒப்பந்தத்தின் விளைவாக நிறைவேற்றப்பட்ட பதின்மூன்றாவது அரசியலமைப்புத் திருத்தம் தமிழ் மொழியையும் அரசகரும மொழியாக அங்கீகரித்துள்ள போதிலும் இரண்டு தசாப் தங்கள் கழிந்த நிலையிலும் குறிப்பிட்டுக் கூறக்கூடிய அளவுக்கு மாற்றம் ஏற்பட்டதாக இல்லை.

இன்றைய அரசாங்கம் பதவிக்கு வந்த பின்னரே பிரதான இரு மொழிகளிலும் அரசாங்க ஊழியர் கள் தேர்ச்சி பெற்றிருக்க வேண்டும் என்ற அடிப்படையில் அரச ஊழியர்களுக்கான மொழிப் பயிற்சி வகுப்புகள் ஆரம்பிக்கப்பட் டன. இது வரவேற்கப்பட வேண்டிய வளர்ச்சிப்போக்கு.

சிங்களம் மட்டும் சட்டத்தினால் பொதுமக்கள் கூடுதலான பாதிப்புக்கு உள்ளாகிய துறை எனக் கூறுவதாயின் பொலிஸ் நிலையங்களைக் குறிப்பிடலாம். பொலிஸ் நிலையங்களிலுள்ள அதிகாரிகளுக்கும் பொது மக்களுக்குமிடையே மொழித் தடை இருக்குமாயின், பொலிஸ் நிலையங்கள் மூலம் பெறப்பட வேண்டிய சேவையைச் சரியான முறையில் பெறுவது சாத்தியமாகாது. பொலிஸ் நிலையங்க ளில் பொதுமக்கள் செய்யும் முறைப்பாடுகளைச் சரியான முறை யில் புரிந்துகொள்வதும் சரியாகப் பதிவு செய்வதும் அத்தியாவசி யமானவை. பொதுமக்கள் பேசும் மொழியில் பொலிஸ் அதிகாரிக ளுக்குத் தேர்ச்சி இருக்க வேண்டியது இதற்கு அவசியம்.

பொலிஸ் திணைக்களம் இவ்விடயத்தைக் கவனத்தில் எடுத்துத் தீர்வு காண முன்வந்திருப்பது மகிழ்ச்சியூட்டுகின்றது. தமிழ் மொழியில் கடமையாற்றுவதற்கான பயிற்சி பொலிஸ் உத்தியோகத்தர்களுக்கு அளிக்கப்படுகின்றது. இவ்வாறு பயிற்சி அளிக்கப்பட்ட 593 பொலிஸ் உத்தியோகத்தர்கள் டிசம்பர் மாதமளவில் தமிழ் மொழி மூலம் கடமையாற்றும் உத்தியோகத்தர்கள் தேவைப்படும் பொலிஸ் நிலையங்களுக்கு அனுப்பப்படுவார்கள் என்று பொலிஸ்மா அதிபர் கூறுகின்றார். வருடத்துக்கு 1200 பேர் என்ற வீதத்தில் ஐந்து வரு டங்களில் 6000 பேர் இவ்வாறு பயிற்சி அளிக்கப்படுவார்கள் என் றும் அவர் கூறுகின்றார்.

பொலிஸ் உத்தியோகத்தர்களுக்குத் தமிழ் மொழிப் பயிற்சி அளிக் கின்ற அதேவேளை கூடுதலான தமிழ் இளைஞர்களைப் பொலிஸ் சேவையில் சேர்த்துக் கொள்வது மொழி சார்ந்த பிரச்சினைகளுக் குத் துரித தீர்வைப் பெற உதவும். பொலிஸ் நிலையங்களிலும் ஏனைய அரச அலுவலகங்களிலும் தமிழ் மொழியில் கருமமாற்றக் கூடியவர்களின் பற்றாக்குறையே தமிழ் மொழியையும் அரசகரும மொழியாக நடைமுறைப்படுத்துவதில் பிரதான தடங்கலாக இருக் கின்றது. இப் பற்றாக்குறையை நீக்கும் பட்சத்தில் மொழித் தடை தானாக நீங்கும்.

(தினகரன்)