9/11 ஐ விட அதிகமாக மிரட்டும் 1/6...!!

சன்னி என்பவர் இரவில் தங்குவதற்கு இடமில்லாமல் தவித்துக் கொண்டிருக்கிறார். கடைசியாக தங்குவதற்கு அவர் வசம் இடமிருந்தது சுமார் 12 மாதங்களுக்கு முன்புதான். ஆனால் அமெரிக்காவின் அதிகாரபூர்வ புள்ளிவிபரங்களின்படி பார்த்தால் சன்னி என்ற தனிநபர் மட்டும் இந்த துயரமான நிலையைச் சந்தித்துக் கொண்டிருக்கவில்லை. ஏராளமான நபர்கள் அவரைப் போலவே நெருக்கடியில் உள்ளனர். இரவில் தங்குவதற்கு இடமில்லாதவர்கள் என்ற பெயர் இவர்களுக்கு சூட்டப்பட்டுள்ளது. அதற்குக் காரணம், பகலில் வேலைக்குச் சென்று விடுவார்கள் என்பதல்ல. பகலில் எங்கேயாவது சுற்றிக் கொள்ளலாம் என்று அரசே சொல்கிறது. இவர்களில் கணிசமான பகுதியினரின் வசம் வீடு இருந்து, கடந்த இரண்டு ஆண்டுகளில் இதை இழந்தவர்களாவர்.

பத்தாண்டுகளுக்கு முன்பாக அமெரிக்காவின் இரட்டைக் கோபுரங்களைத் தகர்த்ததன் நினைவை(9/11)  அண்மையில் அனுசரித்தனர். பயங்கரவாதத்தின் கோரக்கரங்களிலிருந்து அமெரிக்கா இன்னும் விடுபடவில்லை என்று அந்நாட்டின் அதிபர்களும், அமைச்சர்களும், அரசு வட்டாரமும் தொடர்ந்து கூறிக் கொண்டிருக்கின்றனர். ஆனால், சமூக ரீதியான நோக்கில் பார்த்தால் இந்த பயங்கரவாத ஆபத்தைவிட, வறுமையில் வாடும் அமெரிக்கர்களின் எண்ணிக்கை அதிகரித்துக் கொண்டே போவதுதான் பெரிய ஆபத்தாக உள்ளது என்கிறார்கள் அமெரிக்க மனிதவளத்துறை வல்லுநர்கள். நடுத்தர வர்க்கத்தைச் சேர்ந்த மக்கள் ஏழைகளாகிக் கொண்டிருக்கிறார்கள் என்பதுதான் அரசு சார்பாக மேற்கொண்ட ஆய்வு தரும் அதிர்ச்சிகரமான தகவலாகும்.

ஆறில் ஒருவர்(1/6) வறுமைக்கோட்டிற்குக் கீழே வாழ்ந்து கொண்டிருக்கிறார்கள் என்று அமெரிக்காவின் கணக்கெடுப்புத்துறை வெளியிட்டுள்ள அறிக்கை தெரிவிக்கிறது. தொடர்ந்து நான்கு ஆண்டுகளாகக் கணிசமான எண்ணிக்கையில் வறுமைக் கோட்டில் வாழ்பவர்கள் அதிகரித்து வருகிறார்கள்.

பொருளாதார நெருக்கடி சாதாரண மற்றும் நடுத்தர மக்களைக் கடுமையாகப் பாதித்துள்ளது. 2009 ஆம் ஆண்டில் வறுமைக் கோட்டிற்குக் கீழ் வாழும் அமெரிக்கர்களின் எண்ணிக்கை மக்கள் தொகையில் 14.3 விழுக்காடாக இருந்தது. அதாவது, 4 கோடியே 36 லட்சம் பேர் இதில் அடங்குவர். 2010 ஆம் ஆண்டில் இந்த எண்ணிக்கை 4 கோடியே 62 லட்சமாக உயர்ந்துள்ளது. அதாவது 15.1 விழுக்காடாக இந்த எண்ணிக்கை உள்ளது.

“2010 ஆம் ஆண்டுக்கான வருவாய், வறுமை மற்றும் மருத்துவக்காப்பீடு” என்ற தலைப்பின் கீழ் அமெரிக்க அரசு அறிக்கை வெளியிட்டுள்ளது. மருத்துவக்காப்பீடு இல்லாதவர்களின் எண்ணிக்கையும் அதிகரித்துக் கொண்டே செல்கிறது. 2009 ஆம் ஆண்டில் மருத்துவக் காப்பீடு இல்லாத அமெரிக்கர்களின் எண்ணிக்கை 4 கோடியே 90 லட்சமாக இருந்தது. ஒரு ஆண்டில் மேலும் ஒன்பது லட்சம் பேர் இந்த மருத்துவக்காப்பீடு இல்லாதவர்களின் பட்டியலில் இணைந்திருக்கிறார்கள். குறிப்பாக, குழந்தைகளுக்கு காப்பீடு செய்யப்படாத நிலை அதிகரித்துள்ளது. வரும் காலத்தில் இது பெரிய பிரச்சனையாக உருவாகும் வாய்ப்புள்ளது என்று கூறப்படுகிறது.

வறுமைக்கோட்டில் வாடும் குழந்தைகளின் எண்ணிக்கை அமெரிக்காவின் ஹாலிவுட் படங்களுக்கு இணையான திகில் காட்சிகளைக் கொண்டதாக அமைகிறது. 18 வயதிற்குக்கீழ் உள்ளவர்களில் 22 விழுக்காட்டினர் வறுமையில் வாடுகின்றனர். 2009 ஆம் ஆண்டில் இந்த எண்ணிக்கை 20 விழுக்காடாக இருந்தது. 2010 ஆம் ஆண்டில் 1 கோடியே 64 லட்சம் பேர் (18 வயதிற்குக் கீழுள்ளவர்கள்) வறுமைக் கோட்டிற்குக்கீழ் வாழ்கிறார்கள். 2009 ஆம் ஆண்டில் இந்த எண்ணிக்கை 1 கோடியே 55 லட்சமாக இருந்தது. பொருளாதார நெருக்கடிதான் மக்களைப் பெரிதும் பாதித்தது என்பதைத் தனது அதிகாரபூர்வமான அறிக்கையிலேயே ஒப்புக் கொண்டிருக்கிறது. பொருளாதார நெருக்கடியிலிருந்து அமெரிக்கா மீள்வதற்கான வாய்ப்புகள் இப்போதைக்கு இல்லை என்பதால், வறுமை அதிகரிக்கும் என்பதுதான் தற்போதுள்ள நிலைமையாகும்.

1960கள் மற்றும் 1970 களோடு அமெரிக்க அரசு ஒப்பிட்டுக் கொண்டு திருப்திப்படும் அளவுக்கு நிலைமை மோசமாகியிருக்கிறது. வறுமைக்கோட்டிற்குக்கீழ் உள்ள மக்களின் எண்ணிக்கை கடந்த 27 ஆண்டுகளில் இல்லாத அளவிற்கு எகிறியிருக்கிறது. வேலையில் உள்ளவர்களின் மருத்துவக்காப்பீடு வசதியும் சிறிது, சிறிதாகப் பறிக்கப்பட்டு வருகிறது. பொருளாதார நெருக்கடியைச் சுட்டிக்காட்டி இந்த வசதியை ஊழியர்களுக்குத் தர முடியாது என்று அந்நாட்டு முதலாளிகள் மறுத்து வருகிறார்கள். மேலும் பல்வேறு சலுகைகளை வெட்டியதன் மூலம் அவர்களின் வருமானம் குறைந்திருக்கிறது. வேலை பார்ப்பவர்களே வறுமைக் கோட்டிற்குக்கீழ் செல்லும் அபாயம் உருவாகி வருகிறது என்று எச்சரிக்கிறார்கள் மனிதவள மேம்பாட்டுத்துறை வல்லுநர்கள்.