சகலரதும் கவனத்தையும் ஈர்த்துள்ள கிழக்குத் தேர்தல்

இன்று சகலரது பார்வை யும் நீந்திச் செல்லும் வகையில் கிழக்கின் மாகாண சபையின் தேர்தல் நிலவரம் மாறியுள்ளது. நாட்டில் சமாதானச் சூழல் ஏற்பட்டதன் பிற்பாடு இடம்பெறும் முக்கியமான தேர்தல் இந்த தேர்தலாகும். கிழக்கு மாகாண சபைக்கு திருகோணமலை, மட்டக்களப்பு, அம்பாறை ஆகிய மாவட்டங்களில் இருந்து பல கட்சிகளை சார்ந்தவர்கள் போட்டியிடுகின்றனர். இருந்த போதும் சில கட்சிகளின் வேட்பாளர்களும், அவர்களுக்கு ஆதரவு தெரிவித்து மேடையில் பேசும் சில அரசியல் கட்சிகளின் பிரதிநிதிகளும் வெளியிடும் வார்த்தைப் பிரயோகங்களும் நவீன அரசியல் கலாசாரங்களின் வெளிப்பாடாகவே இருக்கின்றன. கட்சிகள் என்பது மக்களின் உரிமைகளுக்காகவும், அவர்களது இலக்கை தேசிய ரீதியில் அடைந்துகொள்வதற்கான ஒரு வழியாகவே மக்கள் பார்த்து வந்தனர். ஆனால் துரதிஷ்டம் இன்று அந்த நிலை தலைகீழாக மாறி வெறும் இனப் பிளவுகளுக்கான சண்டைகளாகவே மாறியுள்ளன.

கட்சிகள் எதை மக்களுக்கு செய்கின்றன. தேர்தல் காலங்களில் எதனை செய்ய வேண்டும் என்பது பற்றி எவ்வளவு தான் பாடங்களை சொல்லிக் கொடுத்தாலும் அது செவிடன் காதில் ஊதும் சங்கு எப்படியானதோ அதேபோன்ற ஒரு நிலைக்கு தள்ளப்பட்டுவிட்டது. இன்றைய சூழ்நிலை இலங்கை தேசத்தின் அபிவிருத்தியும், மக்களின் நல்வாழ்வும் பற்றி சிந்திக்க, பார்க்க, ஆராய வேண்டிய தார்மீக பொறுப்பு கொண்டதாக இருக்க வேண்டும் என்பது தான் யதார்த்தமாகும். தமது அரசியல் கட்சியின் பிரபல்யத்துக்காக ஒரு பிச்சைக்காரன் தனது காலில் உள்ள புண்ணைக் காட்டி பிச்சை எடுப்பது போன்ற நிலைக்கு ஐக்கிய தேசிய கட்சியும், ஸ்ரீ லங்கா முஸ்லிம் காங்கிரஸ¤ம், தமிழ் தேசிய கூட்டமைப்பும் வலிந்து சென்றுள்ளன.

கிழக்குத் தேர்தல் மேடையில் இனவாத கருத்தை பகிரங்கமாக தெரிவித்து மீண்டும் பெரும்பான்மை சமூகத்தின் உணர்வுகளை சீண்டி, அதன் மூலம் வேண்டத்தகாத பிரச்சினைகளுக்கு தளம் அமைக்கும் அந்த செயற்பாட்டை புத்திஜீவிகளும், பொது அமைப்புக்களும் வன்மையாக கண்டித்துள்ளன. இது இவ்வாறு இருக்க இந் நாட்டில் நிரந்தர சமாதானத்தை ஏற்படுத்த முயற்சிக்கும் ஜனாதிபதியை சர்வதேச நீதிமன்றில் நிறுத்த வேண்டும் என்று, தமிழ் தேசிய கூட்டமைப்பு தமிழ் மக்களுடன் ஆணையை கேட்டு நிற்கின்றனர். அதேபோல் முஸ்லிம்களை அவமானப்படுத்தும் இந்த அரசு என்று கூறிய ஸ்ரீலங்கா முஸ்லிம் காங்கிரஸ், தமிழ் கூட்டமைப்புடன் இணைந்து ஆட்சியை அமைக்க அனுமதி தருமாறு கிழக்கில் முஸ்லிம்கள் மத்தியில் விடுக்கும் அறைகூவல் பெரும் பாதக சூழ்நிலையினை தமிழ் முஸ்லிம் மக்களுக்கு ஏற்படுத்தியுள்ளது என்பதை தெளிவாக நாம் புரிந்துகொள்ள வேண்டும்.

சந்தர்ப்பவாத அரசியலுக்காக சமூகத்தை காட்டி கொடுத்து, சமூக உணர்வுகளை மழுங்கடித்து கண்மூடித்தனமான அரசியல் காய் நகர்த்தல்களை செய்யும் இந்த கட்சிகளின் பின்னணியில் நோர்வே ஒளிந்திருப்பது தெள்ளத் தெளிவான உண்மையாகும். வங்குரோத்து அரசியல் கட்சிகள் இந்த நோர்வேயை ஒரு கொழுகொம்பாக பிடித்து மீண்டும் மக்களின் உணர்வுகளில் கலந்து விடலாம் என நப்பாசை கொண்டு பணியாற்றுவதும் தெரியாத விடயமல்ல.

இதனை உணர்ந்துகொண்ட அரசாங்கம் இனவாத கருத்துக்களை மேடைகளில் பேசுவதை தவிர்த்து தமது மக்கள் நலன் குறித்து கருத்துக்களை கூறுமாறு பகிரங்கமாக இக்கட்சிகளின் தலைமைகளிடம் வேண்டுகோளொன்றைவிடுத்துள்ளதை காணலாம். குறிப்பாக கிழக்கை பொறுத்த வரையில் இனவாத அரசியலுக்கு இடமில்லையென்பதற்கான கள ஆய்வுகள் புடம் போட்டு காட்டுகின்றன. மக்களுக்கு எவரால் நன்மைகள் நடக்கின்றதோ அவர்களை தான் ஆதரிக்க வேண்டும் என்பதை அம்மக்கள் தெளிவாக புரிந்துவைத்துள்ளனர். திருமலை மாவட்டத்தை பொறுத்தவரையில் அப்பகுதி மக்களின் பல்வேறு தேவைகளை தேர்தல் காலம் வருவதற்கு முன்னரே அங்கு சென்று பெற்றுக் கொடுத்த பெயரை பெற்ற கட்சியாக அமைச்சர் றிசாத் பதியுதீனை தேசிய தலைவராக கொண்ட அகில இலங்கை மக்கள் காங்கிரஸ் காணப்படுகின்றது. அப்பிரதேச தமிழ், முஸ்லிம் மக்களின் பல்வேறு தேவைகளை அரசுடனும், ஏனைய நிறுவனங்களுடனும் பேசி பெற்றுக் கொடுத்துள்ளது. இந்த தேர்தலில் தமது கட்சி சார்பில் வெற்றிலை சின்னத்தில் இரு வேட்பாளர்களை நிறுத்தியுள்ளது. அதில் ஒருவர் கடந்த உள்ளூராட்சி மன்றத் தேர்தலில் வெற்றிலை சின்னத்தில் போட்டியிட்டு கிண்ணியா நகர முதல்வராக தெரிவாகியுள்ள டாக்டர் ஹில்மி மஹ்ரூப், மற்றையவர் பிரபல தொழிலதிபரும், சிறந்த சன்மார்க்க பாசறையில் வளர்க்கப்பட்ட, பல்வேறுபட்ட சமூக நலன் அமைப்புக்களை உருவாக்கப்பட்டுவரும் தோப்பூர் அப்துல் ரஸாக் (நZமி) அவர்கள், இவர்களின் வெற்றியினை திருமலை மாவட்ட மக்கள் உறுதிப்படுத்தும் வகையில் அமைச்சர் றிசாத் தலைமையில் பிரதி அமைச்சர் ஹிஸ்புல்லா, பாராளுமன்ற உறுப்பினர் ஹுனைஸ் பாருக் மற்றும் பிரதேச சபை தலைவர்கள் களத்தில் நின்று உண்மையினை சொல்லி வாக்குகளை பெறும் முயற்சியினை மேற்கொண்டுவருகின்றனர்.

அதேபோன்று மட்டக்களப்பு மாவட்டத்தில் முன்னாள் அமைச்சர் அமீர் அலி, முன்னாள் கிழக்கு மாகாண அமைச்சர் சுபைர், பொறியியலாளர் சிப்லி பாருக் ஆகியோரும், அம்பாறை மாவட்டத்தில் முன்னாள் பிரதி அமைச்சர் எம்.நிஜாமுதீனும் அமைச்சர் றிசாத் பதியுதீன் தலைமையிலான அகில இலங்கை மக்கள் காங்கிரஸின் வேட்பாளர்களாக களத்தில் குதித்துள்ளமை குறிப்பிடத்தக்கது.

(அபூ அஸ்ஜத்)