க.பொ.த. உயர்தரத்தில் இலக்கை அடைய ஆசிரியரும் பெற்றோருமே வழிகாட்டிகள்

யாழ். குடாவில் பரீட்சைப் பெறுபேறு வீழ்ச்சிக்கான காரணங்கள் ஆராயப்பட வேண்டியவை

க.பொ.த உயர்தரப் பெறுபேறு வீழ்ச்சிக்கான முக்கிய காரணங்களில் ஒன்றாக கருதப்படும் மாணவர்கள் சரியான பாடத் தெரிவினை மேற்கொள்ளாமையேயாகும். பாடத் தெரிவினை மேற்கொள்ப வர்கள் மாணவர்களும் அவர்களது பெற்றோருமேயாவர். மாணவர்கள் தங்களது விருப்பத் திற்கேற்ப பாடத் தெரிவினை மேற்கொள்ள பெற்றோர் அனுமதிக்க வேண்டும். ஊரில் உள்ள மற்றைய பிள்ளைகளுடன் ஒப்பிட்டு உங்கள் பிள்ளையை கட்டாயப்படுத்தக் கூடாது. அதே வேளை மாணவர்களும் தங்களுக் குப் பிடித்த தங்களால் படித்து முடிக்கக் கூடிய பாடத் தெரிவினை மேற்கொள்ள வேண்டும். பெரும்பாலான பெற்றோர் தங்கள் பிள்ளைகள் மீது கண்டிப்பாக இருப்பதில்லை. ஏனெனில் பல பெற்றோர் 5 ஆம் தர புலமைப் பரிசில் பரீட்சையில் பிள்ளைகளுக்குக் கொடுக்கும் ஊக்கமும் கண்டிப்பும் க. பொ. த உயர்தரத்தில் பிள்ளைகளுக்கு கொடுப்பதில்லை. இதனால் சில மாணவர்கள் வீட்டுக்கு அடங்காத பிரச்சினைக்குரியவர்களாக மாறுகின்றார்கள்.

அத்துடன் சில பெற்றோர் மாணவர்களுக்கு அதிகளவில் கொடுக்கும் பணம் காரணமாக அவர்கள் தவறு விடக் கூடும். சில மாணவர்கள் பல தனியார் நிலையங்களுக்குச் செல்வார்கள். இதனால் வீணாகுவது பெற்றோரின் பணம். மற்றையது அவர்களின் பொன்னான நேரம்.

இதனைப் பெற்றோர் கவனித்து அவர்களை ஒரு தனியார் கல்வி நிலையத்திற்கு அனுப்பி வைத்தால் போதும், சில மாணவர்கள் தனியார் கல்வி நிலையங்களுக்குச் சென்று சந்தோஷமாக நேரத்தைக் கழித்துவிட்டு தன்னையும் ஏமாற்றி பெற்றோரையும் ஏமாற்றுகின்றனர்.

சில மாணவர்கள் தனியார் கல்வி நிலையம் முடிந்தவுடன் வந்து வீட்டில் இரவு உணவு அருந்தி விட்டு உறக்கத்துக்கு செல்கின்றனர். யாழ்ப்பாணத்து மாணவர்களின் சுய கல்விச் செயற்பாடு பெரிதும் மழுங்கடிக் கப்பட்டுள்ளது. தங்களுடைய ஊரில் உள்ள ஆசிரியரை மதிக்காது நகர்ப்பகுதியில் உள்ள ஆசிரியரிடம் வந்து நேரத்தை வீணடிப்பவர்களும் உள்ளார்கள்.

சில பெற்றோர் தொடர் நாடகங்களுக்கு அடிமையாகி அதனை இரவு வேளையில் பார்த்துக் கொண்டிருப்பார்கள். இத்தகைய அசமந்தப் போக்கால் பாதிக்கப்படுவது மாணவர்களினு டைய எதிர்காலமேயாகும்.

13 வருட கல்வி வாழ்க்கையில் அடையக் கூடிய உன்னதமான நிலையான பல்கலைக்கழக அனுமதிக்கான போட்டிப் பரீட்சையே இதுவாகும். ஆகவே பெற்றோர் உணர்ந்து பிள்ளையின் படிப்புக்கு உதவ வேண்டுமே தவிர அவர்களின் நன்மைக் கெதிராக தொலைக்காட்சி நிகழ்ச்சிகளைப் பார்ப்பதை தவிர்க்க வேண்டும்.

சில மாணவர்களும் பெற்றோ ரும் பாடசாலை ஆசிரியரை நம்புவதில்லை. இலவசக் கல்வி என்பதாலோ தெரியவில்லை. ஆனால் தனியார் கல்வி நிறுவனங்களுக்கு பெருமளவு பணத்தை அள்ளிக்கொடுப்பர்.

இப்படிச் செய்யாது பெற்றோர் பாடசாலை ஆசிரியரிடம் சென்று ஒவ்வொரு தவணை முடிவிலும் தங்களது பிள்ளையின் கல்வி முன்னேற்றம் தொடர்பாக ஆராய வேண்டும். சில பாடசாலை ஆசிரியர்களில் தங்களது பாடசாலை மாணவர்களுக்கும் ஏனைய வறிய மாணவர்களுக்கும் இலவசமாக கல்வி கற்பிப்பவர்களும் உண்டு.

யாழ்ப்பாணத்தில் பிரபலமான பாடசாலைகளில் ஒரு பாடமும் சித்தியடையாத மாணவர்களின் எண்ணிக்கை அதிகரித்து வருகின் றது. இது வருத்தத்திற்குரியது. இதனை மாணவர்களும் ஆசிரியர்களும் சிந்திக்கவேண்டும்.

கல்வியில் ஓரளவு குறைந்த மாணவர்களை இனங்கண்டு அவர்களுக்குத் தனியாக விளங்கக் கூடிய விதத்தில் ஆசிரியர்கள் கற்பிக்க வேண்டும். இதற்கு மாணவர்களும் அவர்களது பெற் றோரும் ஒத்துழைப்பு வழங்க வேண்டும். இச்செயற்பாட்டைச் செய்ய ஆசிரியர்கள் விரும்புகின்ற போதிலும் மாணவர்கள் ஒத்து ழைப்புக் கொடுப்பதில்லை. இதுவே அவர்களின் சிறந்த பெறு பேறின்மைக்கான காரணம் ஆகும்.

க.பொ.த உயர்தர பரீட்சைக்கு ஒரு மாதத்திற்கு முன்னரான காலப் பகுதியில் சில பல்கலைக்கழக மாணவர்களினால் நடத்தப்படும் பரீட்சையின் காரணமாக அவர்கள் மன உழைச்சலுக்கு உள்ளாகக் கூடும். ஏனெனில் அவர்களது பரீட்சை வினாத்தாள்கள். க. பொ. த. உயர்தரப் பரீட்சை வினாத்தாள் போன்று இருப்பதில்லை.

அதனைவிட சில ஆசிரியர்கள் கொழும்பில் இருந்து சில விரிவுரையாளர்களை அழைத்து வந்து பரீட்சைக்கு முன்னரான எதிர்பார்ப்பு வினாக்கள் என்று கூறி மாணவரின் நேரத்தை வீணடிப்பார்கள். இதனை உணர்ந்து மாணவர் செயற்பட வேண்டும்.

இதனைவிட குழுவாகப் படிப்போம் என்று சேர்ந்து நேரத்தை வீணடிப்பவர்களும் உண்டு. ஒவ்வொரு மாணவனும் குழுச் செயற்பாட்டினைத் தவிர்த்து சுயகற்றலில் ஈடுபடுவது சிறந்தது.

இங்கு பரீட்சையில் ஒவ்வொரு மாணவனின் தனித்திறமையே எதிர்பார்க்கப்படுகின்றது. கிராமத்து மாணவர்களில் சிலர் யாழ்ப்பாணம் நகர்ப் பகுதிக்குச் சென்று தங்கிப் படிப்பவர்களும் உண்டு.

தற்போது அதிகரித்து வரும் இணைய பாவனையாலும், முகநூல் காரணமாகவும் நேரத்தை வீணடிக்கின்றார்கள். அதனைவிட சில மாணவர்கள் ஆபாசப் படங்கள் பார்த்தல், மதுபானம் அருந்துதல், புகைப்பிடித்தல் போன்ற தீய பழக்க வழக்கங்களுக்கு அடிமையாகி தன்னையும் ஏமாற்றி தன்னை நம்பி இருப்போரையும் ஏமாற்றுகின்றார்கள்.

சில மாணவர் குறிப்பிட்ட ஒரு பாடத்திற்காக பல்வேறு தனியார் கல்வி நிலையங்களுக்குச் செல்வார்கள். இதனால் ஒரு பகுதி விளங்கவில்லை என்றால் மற்ற ஆசிரியரிடம் புரியும் என்று நினைத்து ஏமாறுவதுண்டு. எனவே யாழ்ப்பாணத்தில் உள்ள ஒவ்வொரு மாணவனும் உணரவேண்டிய நேரமிது. ஏனெனில் எதிர் காலச் சந்ததியினருக்கு கல்வியை எடுத்துக்கொண்டு செல்பவர்கள் நீங்களே. அதை உணர்ந்து பெற்றோரின் பணத்தை வீணாக்காமல் தீய பழக்கங்களுக்கு அடிமையாகாது உங்களைச் சுற்றி இருப்போரையும் மகிழ்வாக வைத்திருங்கள்.

(சி. விக்னேஸ்வரன்
பொறியியல் பீடம்
பேராதனை பல்கலைக்கழகம்)