புலிகளும் முதலில் இழந்தது கிழக்கைத்தான், தமிழ்க் கூட்டமைப்புக்கும் அந்நிலை வருமா?

சொந்த வாழ்வு செழிக்க அரசிடம் தஞ்சம்; பொது மக்கள் தேவைக்கு மட்டும் கபட எதிர்ப்பு அரசியல்

கிழக்கு மாகாண சபைத் தேர்தலின் முடிவுகளின் பிரகாரம் தமிழ் மக்களின் எதிர்காலத்தைப் பற்றிச் சிறிதளவும் கருத்திற்கொள்ளாது தமது பிடிவாதமான ஒன்றுக்குமே உதவாத தமிழ்த் தேசியக் கொள்கையைக் காரணம் காட்டி மீண்டுமொரு தடவை தமிழ்த் தேசியக் கூட்டமைப்பு தமிழ் மக்களை ஏமாற்றியுள்ளதாக அவர்களுக்கு வாக்களித்த மக்கள் குற்றம் சாட்டியுள்ளனர். தேர்தல் காலத்தில் வடக்கிலிருந்து படையெடுத்து வந்த கூட்டமைப்பின் பாராளுமன்ற உறுப்பினர்கள் கிழக்கிலங்கை மக்களுக்கு மாகாண ஆட்சியை ஏற்படுத்தித் தருவதாகக் கூறி வாக்கு வேட்டையாடினர். ஆனால் கிழக்கில் இன்று தமக்குச் செல்வாக்கு முன்னொரு காலம் போலில்லை என்பதை நன்கறிந்திருந்தும் பொய்யான வாக்குறுதிகளை வழங்கி மக்களைப் பகடைக்காய்களாக்கி இன்று தமிழ்க் கூட்டமைப்பு அம்மக்களை ஏமாற்றியுள்ளது.

அரசாங்கத்திற்கு எதிராக அறிக்கை விடுவதும், ஆர்ப்பாட்டம் செய்வதையுமே தொழிலாகக் கொண்டிருக்கும் தமிழ்க் கூட்டமைப்பு தமது தமிழ் மக்களின் எதிர்காலம் பற்றி இப்போது துளியளவும் சிந்திப்பது கிடையாது. எதிர்ப்பு அரசியல் நடத்தினால் வெளிநாடுகள் வந்து தமக்கு தனிநாட்டைப் பெற்றுத்தந்து விடுமெனவும், அந்நாட்டிற்கு சம்பந்தன் ஜனாதிபதியாக வரலாம் என்பதுவுமே அவர்களது பகற் கனவாக உள்ளது.

விடுதலைப் புலிகள் அமைப்பு ஆயுத ரீதியாகவும், சர்வதேச ரீதியாகவும் பலமாக இருந்தபோதும் இத்தகையதொரு மன நிலையிலேயே தமிழ் மக்களை வைத்திருந்தது. ஆனால் இறுதியில் நடந்தது என்ன? முள்ளிவாய்க்காலில் அவர்கள் மடிய அவர்களை நம்பியிருந்த தமிழ் மக்கள் நட்டாற்றில் விடப்பட்டனர். அன்று அம்மக்களது அவலக் குரல் ஆகாயத்தைப் பிளக்கையில் எந்தவொரு சர்வதேசமும் திரும்பிப் பார்க்கவில்லை. புலிகளுக்கு தீனி போட்ட உலக நாடுகள் அப்புலிகள் இறந்து மடியும்வரை வாயே திறக்கவில்லை.

இந்த கசப்பான ஆனால் உண்மையான உண்மைகளை நன்கு தெரிந்திருந்தும் தமிழ்க் கூட்டமைப்பு இன்னமும் புலிகளின் அதே பாணியில் சர்வதேசத்தை நம்பியிருப்பது போன்ற முட்டாள்தனம் வேறெதுவுமாக இருக்க முடியாது. வடக்கு கிழக்கு வாழ் தமிழ் மக்களைப் பணயம் வைத்து தமிழ்க் கூட்டமைப்பின் உறுப்பினர்கள் சிலர் அரசியல் நடத்தி வருவது இப்போது பல சந்தர்ப்பங்களில் வெட்ட வெளிச்சமாகி வருகிறது.

குறிப்பாக கூட்டமைப்பிலுள்ள பாராளுமன்ற உறுப்பினர்கள் பலரும் வர்த்தகர்கள். அவர்கள் தமது வர்த்தகத்தை விருத்தி செய்வதற்காக அரசாங்கத்துடன் நல்லுறவைப் பேணி அமைச்சர்கள் சிலரைத் தனிப்பட்ட முறையில் கைகளுக்குள் போட்டுக்கொண்டு தமது காரியத்தைச் சாதித்து வருகின்றனர். இவர்களது பிள்ளைகள் வெளிநாடுகளில் உயர் படிப்புக்களை அரசாங்கத்தின் புலமைப்பரிசில் பெற்றுப் பயின்று வருகின்றனர். தமது உறவினர்களுக்கு அரசாங்கத்தின் துணையுடன் விசாக்களைப் பெற்று வருகின்றனர். ஊரிலுள்ள தமதும் தமது நெருங்கிய உறவினர்களினதும் வீடுகளை அரச செலவில் திருத்தி மின்சார வசதிகளையும் பெற்று அரச நிறுவனங்களுக்கே வாடகைக்கு விட்டுச் சம்பாதித்தும் வருகின்றனர். ஆனால் இதை அரசாங்கம் தானாக முன்வந்து தமிழ் மக்களுக்குச் செய்யும்போது எமக்கு அபிவிருத்தி தேவையில்லை, அரசியல் தீர்வே தேவை என்று பொய்யாகக் குரல் கொடுக்கின்றனர். ஏன் இந்தக் கபட எண்ணம். உங்கள் வீடுகள் திருத்தப்பட வேண்டும். உங்கள் வீட்டுக்கு வரும் பாதைகள் புனரமைக்கப்பட வேண்டும். உங்கள் வீட்டுக்கு மின்சார இணைப்பு வழங்கப்பட வேண்டும். ஆனால் இதையே தமிழ் மக்களுக்கு அரசாங்கம் வழங்கினால் குற்றம்.

இந்த நிலை மாற வேண்டும். முன்னொரு காலத்தில் தமிழனுக்குப் பிடிவாதம் இருந்தது அதில் நியாயமும் இருந்தது. பலமும் இருந்தது. இன்று யாரை நம்பி எதை நம்பி சண்டித்தனம் காட்டுவது. உங்களுக்கு ஊதுகுழலாக இருக்கும் சில தமிழ்ப் பத்திரிகைகள் கையை விரித்தால் உங்கள் பாடு அதோகதிதான். அவ்வாறு உண்மையை விழித்த உங்களுக்கு புத்திமதி கூறிய ஒரு வார இதழின் பத்திரிகை ஆசிரியருக்கு ஆப்புவைத்த கதை இப்போது தமிழ் மக்களுக்கு நன்கு தெரியும். துதி பாடினால் மட்டுமே வரவேற்பு. உள்ளதைச் சொல்லி அறிவுரை கூறினால் வெளியேற்றும்வரை ஒற்றைக் காலில் நிற்பது. தமிழ்க் கூட்டமைப்பைப் பொறுத்தவரை இனி இவ்வாறான சில்லறை விடயங்களைக் கைவிட வேண்டும். உங்களைப் போலவே ஒவ்வொரு தமிழ் மகனுக்கும் அவனது இருப்பிடம், வாழ்வாதாரம் என்று பல பிரச்சினைகள் உள்ளன. அவற்றைத் தீர்த்து வைப்பது உங்களது கடமை. தலைவர் எப்போது இறப்பார், பதவி எப்போது கிடைக்கும் என்பதற்காக அறிக்கை விட்டு அந்தஸ்த்தைத் தேடக் கூடாது.

கிழக்கில் தமிழ் மக்கள் தமிழ்க் கூட்டமைப்பை நிராகரித்துள்ளமை தெட்டத் தெளிவாகியுள்ளது. ஆட்சியமைக்க முடியாத நீங்கள் அரசாங்கத்துடன் சாணக்கியமாகப் பேசி அதிகாரத்தைக் கைப்பற்றியிருக்கலாம். அதன் மூலம் மாகாணத்தின் அபிவிருத்தியை மேற்கொண்டிருக்கலாம். பதினொரு ஆசனங்களைக் கைப்பற்றி யிருப்பினும் அதற்குக் காரணமான தமிழ் மக்களுக்கு அதனால் என்ன பிரயோசனம் வரப்போகின்றது? இதைவைத்து வெளிநாடுகளுக்கு இனியும் உங்களது பலத்தைக் காட்டுவதனால் எந்தவிதமான பிர யோசனமும் கிடைக்கப் போவதில்லை.

உங்களுடன் மேடைகளிலும், ஆர்ப்பாட்டங்களிலும் தமிழ்த் தேசியம் பேசும் மனோ கணேசன் சப்ரகமுவ மாகாணத்தில் சாணக்கியமாகச் செயற்பட்டுள்ளார். தனது சமூகப் பிரதிநிதி ஒருவர் அச்சபையில் மேலதிகமாக வர அவர் காரணமாக இருந்துள்ளார். அவர் ஒரு முழு நேர அரச எதிர்ப்பாளர். அரசை எப்படியெல்லாம் எதிர்த்து அறிக்கைவிடலாம் என்பதற்காக அலைந்து திரிந்து கரு தேடுபவர். நித்திரையில்கூட அரசாங்கத்தை ஏசுபவர். அத்தகைய ஒருவர் சாணக்கியமாகச் செயற்பட்டதை ஏன் தமிழ்க் கூட்டமைப்பு முன்னுதாரணமாகக் கொள்ளக்கூடாது?

எனவே இனியும் தமிழ்க் கூட்டமைப்பு தமிழ் மக்களை ஏமாற்ற முனையக் கூடாது. 1977 ஆம் ஆண்டிலிருந்து எதிர்ப்பு அரசியலை நடத்தி வந்தமையால் இன்றுவரை தமிழ்ச் சமூகம் கண்ட பலன் என்ன? தமிழ் இளைஞர்களை உசுப்பேற்றி ஆயுதங்களைத் தூக்க வைத்து அவர்கள் போராடிய காலத்தில் நீங்கள் வெளிநாடுகளில் தஞ்சமிருந்துவிட்டு இன்று அவர்கள் அழிந்ததும் அரசியல் நடத்த வந்துள்ளார்கள்.

கூட்டமைப்பிலுள்ள தமிழரசுக் கட்சியின் எந்தவொரு உயர்பீட அங்கத்தவரது குடும்பமாவது போராளியாகி குடும்பத்தில் இருந்துள்ளதா? அல்லது மாவீரர் குடும்ப அந்தஸ்து பெற்றதா? அல்லது கைதிகள் குடும்பத்தில் இணைந்துள்ளதா, அல்லது காணாமற் போனோர் பட்டியலிலுள்ள குடும்பத்தில் உள்ளதா? எதுவுமே இல்லை. பின்னர் ஏன் இந்தப் போலி அரசியல். அரசுடன் இணையுமாறு தமிழ் மக்கள் கேட்கவில்லை. சாணக்கியமாகப் பேசி காரியத்தைச் சாதிக்குமாறே மக்கள் கேட்கிறார்கள். இதய சுத்தியுடன் உண்மையாக அரசுடன் பேசுவதையே மக்கள் எதிர்பார்க்கிறார்கள்.

அதற்கு மக்களுக்கு நீங்கள் விரைவான பதிலை வழங்கா விட்டால் கிழக்கு மாகாணத்தை இழந்தது போலவே வடக்கையும் தமிழ்க் கூட்டமைப்பு இழக்க நேரிடும். யுத்தத்தில் விடுதலைப் புலிகளும் முதலில் கிழக்கையே இழந்தனர். பின்னர்தான் வடக்கையும் இழந்தனர். அந்த நிலை வருவதை தமிழ்க் கூட்டமைப்பு தவிர்க்க வேண்டுமாயின் உண்மையான பேச்சுவாத்தையில் ஈடுபட்டு தீர்வினைக் கண்டு இனியாவது தமிழ் மக்களை நிம்மதியாக வாழ வைப்பதே. இல்லையேல் அரசியலுக்கு முடிச்சுப் போட்டுவிட்டு ஏதாவது பெறுமதியான பரிசுகளைப் பெற்றுக்கொண்டு நாட்டைவிட்டு வெளியேறி அரச செலவில் மேலைத்தேய நாடுகளில் ஆங்கிலம் பேசி சொகுசாக வாழும் உங்கள் உறவுகளுடன் இணைந்து கொள்ளுங்கள். அரசாங்கம் தமிழ் மக்களை நன்கு பார்த்துக்கொள்ளும்.

(க.சிவராசா)