வாக்களர்கள் தெரிந்து கொள்ள வேண்டிய

TNA யினரால் முன்வைக்கப்படும் பொய்மைகளும், அவைபற்றிய மெய்மைகளும்.

(அபிமன்யு)

பொய்மை 1

TNA யினரைத் தவிர்ந்த மற்றைய கட்சி வேட்பாளர்களைத் தெரிவுசெய்வது:

தமிழ்த்தேசியம், தமிழர்களின் சுயநிர்ணய உரிமை, தன்னாட்சி, ஆகியவற்றை கோராத தலைவர்களைத் தமிழர்கள் தெரிவுசெய்து விட்டார்கள் என்று கொள்ளப்பட்டு, தமிழர்களின் அரசியல் கோரிக்கைகளை மழுங்கடிப்பதாக ஆகி விடும்.

மெய்மை  

இதுதானே காலங்காலமாக அனைத்துத் தேர்தல்களிலும் இவர்கள் முன்வைக்கும் வாதங்கள்.

தனிநபர் அல்லது குழுக்கள் பற்றிய கண்மூடித்தனமான சார்பு நிலையை விலக்கி TNAயில் அங்கம் வகிக்கும் தலைவர்களதும், அவர்களால் முன்னிறுத்தப்படும் வேட்பாளர்களதும் உண்மையான கடந்த கால யோக்கியதைகளையும், நிலைப்பாடுகளையும் நாம் சிறிதளவாவது அறிவுபூர்வமாகப் பார்ப்போமானால்:

தமிழ்த்தேசியம், தமிழர்களின் சுயநிர்ணய உரிமை, தமிழர்களின் ஆட்சி என்ற இவர்களது வெற்றுக் கோஷங்களெல்லாம் மக்களை உசுப்பேத்தி, உணர்ச்சிவசப்படுத்தி, தேர்தல்களை வெல்லுவதற்காக, தம் பதவிகளைத் தக்கவைப்பதற்காக, அரசியல் சுகபோகங்களை அனுபவிப்பதற்காக, சமயங்கள் வரும்போது அவ்வப்போது அவர்கள் உபயோகிக்கும் தந்திரங்களேயன்றி, சொல் அலங்காரங்களேயன்றி, வேறொன்றும் இல்லை.

உண்மையில், இவர்கள் கூறும் அரசியல் தீர்வு  எப்படியான, எத்தகைய ஆட்சி அமைப்புகளைக் கொண்டிருக்கும், அதனை அடைவதற்கான வழிமுறைகள் என்ன என்பவற்றை என்றாவது தெளிவாக வரையறுத்து, தீர்க்கமாகக் கூறியிருக்கிறார்களா?.

“சிங்களப் பேரினவாதம் அதைச் செய்கிறது, இதைச் செய்கிறது” என்ற குற்றச்சாட்டுகளுக்கு அப்பால் எதுவுமே சொல்கிறார்கள் இல்லை

தேர்தலுக்கு இன்னும் பத்தொன்பது நாட்களே உள்ளன. தேர்தல் விஞாபனம் கூட இதுவரை வெளியிடவில்லை.

சில சமயம் தனித்தமிழீழத் தாயகம்’ என்பார்கள்.

வேறு சமயம், ஒன்றுபட்ட இலங்கைக்குள் வடக்கு-கிழக்கு இணைந்த  பிராந்திய அமைப்பு என்பார்கள்.

சில சமயம்,  பிரிக்கப்பட்ட வடக்கு –கிழக்கு மாகாண சபைத் தேர்தல்களில் அர்த்தமில்லை, போட்டியிமாட்டோம் என்பார்கள்,

பின்னர், போட்டியிடுவார்கள்.

13ம் திருத்தச் சட்டம் செல்லாக்காசு என நிராகரிப்பார்கள்,

இருபத்தைந்து வருடங்களின் பின்னர் 13வது திருத்தத்தில் காணி போலீஸ் அதிகாரம் எல்லாம் இருக்கிறது என்றும் ஒரு உயர் நீதியரசர் ஊடாக இது பற்றி கதைப்போம் என்பார்கள்.

அரசாங்கத்துடன் பேசிப் பயனில்லை என்பார்கள்,

ஆனாலும் பின்கதவால் அரசாங்கத்துடன் சமரசங்கள் பல செய்து கொள்வார்கள்.  

தமிழ் மக்களின் அரசியல் இலக்குகளை அடைய, வாழ்வாதாரங்களை வளம்படுத்த  என்ன வழிமுறைகள் என்று கேட்டால் காத்திரமான பதில் எதுவும் இல்லாது, தேர்தலில் தம்மை வெல்ல வைப்பதுதான் தமிழர்களுக்கு இருக்கும் ஒரே தேர்வு, ஒரே வழி என்பார்கள்.

எத்தனை காலந்தான் ஏமாற்றுவார்கள் இவர்கள்?

இவர்கள் ஏமாற்றுவது இவர்களை நம்பி வாக்குப் போட்டவர்களைத்தான்.

இவர்களின் அரசியல் வங்குரோத்தையும், கையாலாகத்தனத்தையும், பொதுநலன்களை மேவிய சுயநலங்களையும், உண்மைச் சொரூபங்களையும், சில்லறைத்தனமான பம்மாத்துக்களையும் நன்றாகவே தெரிந்து வைத்திருக்கும் சிங்கள அரசாங்கங்கள் இவர்களைக் கணக்கில் எடுப்பதில்லை.

அரசியல் நாற்காலிகளைக் கெட்டியாகப் பிடித்துக் கொண்டு “வைக்கோல் பட்டடை நாய்கள்” போல் தாங்களும் நல்லது செய்யமாட்டார்கள், மற்றவர்களையும் நல்லது செய்ய விடமாட்டார்கள்.

பொய்மை 2

சிங்களப் பெரும்பான்மை அரசியல்வாதிகள் ஒருவரையும் நம்ப முடியாது- நம்பக் கூடாது. சிங்களப் பேரினவாதத்தில் அவர்கள் மூழ்கி இருக்கிறார்கள்.

மெய்மை

தமிழ்ப் பெரும்பான்மை அரசியல்வாதிகள் மட்டும் என்ன?  தேர்தல்களில் இனவாதம் மாத்திரம் தானே பேசுகிறார்கள்.

இவர்கள் என்றாவது சிங்கள அரசியல்வாதிகளின் முற்போக்கான கூறுகள் எவற்றையாவது அங்கீகரித்திருக்கிறாரகளா?.  

அடித்தட்டு  மக்களின் வாழ்வாதாரப் பிரச்னைக்கான எந்த முற்போக்குக் கொள்கைகளிலோ, வழிமுறைகளிலோ, நடவடிக்கைகளிலோ, எவற்றிற்காவது பக்கபலமாகக் கைகொடுத்தார்களா?

தமிழ்த் தேசியத்தை தாம் ஏதோ தனிக்குத்தகை எடுத்தவர்கள் போல் பெயரளவில் தமிழ்த் தேசியத்தை வைத்துக் கொண்டு, தமிழ் தேசிய வாதம் என்ற போர்வையில் குறுந்தமிழ்தேசியத்தை முன்னெடுத்து தமிழ் இன வாதத்தை வளர்த்தவர்கள் அல்லவா?

இன்னமும் தொடர்ந்து அதே பாணியில் தேர்தல்களில் போட்டியிட்டு  வெல்வதைத் தவிர, பாராளுமன்ற ஆசனங்களைக் கைப்பற்றுவது தவிர, அவர்களது அனைத்து நகர்வுகளும் உண்மையில் தமிழர்களின் தேசிய நலனக்கு ஒத்திசைவானதல்ல-- மாறாக விரோதமானவையே.

இவர்களை வைத்தே சிங்களப் பேரினவாதிகள், சிங்கள, தமிழ் முற்போக்கு அரசியல் மற்றும் சமூக அக்கறையுள்ளோர்களின் குரல்களை ஓரங்கட்டி, TNA யினர் மூலமாகவே நாசூக்காக தமிழினத்தின் வாழ்வை நசித்து  வருகின்றனர் என்பதுதான்  சரித்திரம் எமக்குத் தரும் பாடம்.   

பொய்மை - 3

வடக்கு மாகாண சபைத் தேர்தலில் அதிக எண்ணிக்கையான பிரதிநிதிகளைப் பெற்றால்தான், அதன் மூலம் கிடைக்கும் பலத்துடன் தமிழர்களின் பிரச்னைகளைத் TNA தீர்த்து வைக்க முடியும். 

மெய்மை

இப்பொழுது கூட இலங்கைப் பாராளுமன்றத்தில் தமிழர் தரப்பின் பிரதிநிதிகளில் அதிக எண்ணிக்கையானோர் TNAயினரே. அந்தப் பலத்துடன் தமிழர்களின் பிரச்னைகள் எதனையாவது அவர்கள் தீர்த்து வைத்திருக்கிறார்களா?

மாறாக, அரசியல் அபிலாஷைகள் மட்டுமல்ல, தமிழர்களின் வாழ்வாதாரம் முழுவதுமல்லவா சீர்கெட்டுச் சிதைந்து போய்விட்டது.

தமிழ்ப் பிராந்தியங்களின் நகர சபைகளிலும் அதிக எண்ணிக்கையான பிரதிநிதிகள் TNAயினரே.

அந்தப் பலத்தினால் அவர்களைத் தேர்ந்தெடுத்த தமிழ் வாக்காளர்களுக்கு எதுவித நன்மையும் கிட்டியிருக்கிறதா?. அவற்றின் நிர்வாகங்கள் எதுவித ஆக்கபூர்வமான செயல்களையும் மேற்கொள்ளாது  நைந்து நாறிக் கிடக்கின்றனவே!.

அதெப்படி வடமாகாண சபைத் தேர்தலில் மட்டும் அதிக எண்ணிக்கையைப் பெறும் பலம், நலன் தரும்?.

“கேட்கிறவன் கேணையனாக இருந்தால், எருமை மாடும் ஏரோப்பிளேன் ஓடும்” என்று சொல்வார்களே—அப்படியானால் தமிழர்கள் கேணையர்கள் என்பது தானே TNA யினரின் அனுமானம்

எதிர் வரும் 21ம் திகதி கூட்டமைப்பிற்க்கு வாக்களித்து எருமை மாடு என்றோ ஒருநாள் எரோப்பிளேன் ஓட்டும் என்ற தமது நம்பிக்கையை தமிழர்கள் மீண்டும் காட்டுவார்களா? என்பதே பொதுஅறிவு உள்ளவர்களின் கேள்வியாகும்.