விக்னேஸ்வரன் ஜனாதிபதியை சந்திப்பது பிரச்சினையை தீர்க்க நல்ல அறிகுறியாகும்

நாட்டில் பரபரப்பாக பேசப்பட்ட மூன்று மாகாண சபைகளின் தேர்தல்கள் ஆகக்குறைந்த வன்முறைகளுடன் மிகவும் அமைதி யான முறையில் நடைபெற்றது. தேர்தலை சிறப்பாக நடத்தி முடித்த மைக்காக நாம் முதலில் தேர்தல் ஆணையாளர் மஹிந்த தேசப்பிரியவுக்கும் பொலிஸ்மா அதிபர் என்.கே. இளங்ககோனுக்கும் எமது நன்றியைத் தெரிவித்துக் கொள்ள விரும்புகிறோம்.

தேசத் தலைவரான ஜனாதிபதி மஹிந்த ராஜபக்ஷ நாட்டின் தன்னிகரற்ற தலைவர் என்பதை ஊர்ஜிதம் செய்யக்கூடிய வகையில் தேர்தல்கள் வெற்றிகரமாக முடிவடைந்தன. ஜனாதிபதி அவர்களின் தலைமையிலான ஐக்கிய மக்கள் சுதந்திர முன்னணி மத்திய மாகாணத்திலும், வடமேல் மாகாணத்திலும் வெற்றிவாகை சூடியதன் மூலம் ஐக்கியத் தேசியக்கட்சியும், ஜே.வி.பி.யும் இந்தத் தடவை தேர்தலிலும் வழமையாக நடைபெறுவதைப் போன்று மக்களால் ஓரங்கட்டப்பட்டன.

ஜனாதிபதி அவர்கள் தான் ஒரு கனவான் என்பதை நிரூபிக்கக்கூடிய வகையில் இந்த தேர்தல் பிரசாரத்தின் போது ஐக்கியத் தேசியக்கட்சியின் தலைவர் ரணில் விக்கிரமசிங்கவை தனிப்பட்ட வகையிலோ, கட்சியின் தலைவர் என்ற முறையிலோ எந்தவொரு கூட்டத்திலும் கண்டிக்காமல் அரசாங்கத்தின் சாதனைகளை பற்றியே மக்களுக்கு எடுத்துரைத்தார்.

ரணில் விக்கிரமசிங்கவோ அரசாங்கத்தின் குற்றங்குறைகளை எடுத்துக்காட்டு வதில் கவனம் செலுத்தினாரே ஒழிய, மக்கள் பிரச்சினைக்கு தனது கட்சி வெற்றிபெற்றால் என்ன செய்யும் என்பதை சொல்லத் தவறிவிட்டார். இதுவும் அவரது கட்சியின் தோல்விக்கு இன்னுமொரு காரணமாகும்.

வடமாகாணத்தில் அரசாங்கம் அமைதியான முறையில் பொதுமக்களுக்கு அச்சுறுத்தல் இல்லாத வகையில் தேர்தலை வெற்றிகரமாக நடத்தியது. ஐந்தாண்டுகளுக்கு முன்னர் நாட்டில் வடமாகாணசபைத் தேர்தல் நடை பெறுமா என்று சிந்திக்க முடியாத அளவுக்கு வடமாகாணம் யுத்தத்தினால் சீர்குலைந்து போயிருந்தது.

2009ம் ஆண்டு மே மாதத்தில் எல்.ரி.ரி.ஈ. பயங்கரவாதத்திற்கு முற்றுப்புள்ளி வைத்த பின்னர் வடமாகாணத்தில் மீள்குடியேற்ற நடவடிக்கைகளும் ஏககாலத்தில் கண்ணிவெடிகளை அகற்றுதல், உட்கட்டமைப்பு வசதிகளை செய்தல், அபிவிருத்திப் பணிகளை மேற்கொள்ளுதல் போன்ற பலதரப் பட்ட நற்பணிகளை அரசாங்கம் வெற்றிகரமாக நாலாண்டுகளுக்குள் நடத்தியத னால் இன்று வடமாகாணம் வளம்பொருந்திய ஒரு பிரதேசமாக மாறியிருக்கிறது.

சுமார் 30 ஆண்டுகாலம் வாக்குரிமை அளிக்கும் வாய்ப்பு கிடைக்குமா என்று ஏங்கிக் கொண்டிருந்த வடமாகாண மக்களுக்கு மனித உரிமை சாசனத்தில் முதலிடம் பெறும் வாக்குரிமையை பயன்படுத்தும் வாய்ப்பையும் ஜனா திபதி அவர்கள் இந்தத் தேர்தலின் போது பெற்றுக் கொடுத்தார்.

வடமாகாணசபைத் தேர்தல் அமைதியான முறையில் நடைபெற்றது இன்றைய அரசாங்கத்திற்கும், ஜனாதிபதிக்கும், ஜனநாயகத்திற்கும் கிடைத்த மாபெரும் வெற்றியென்று அரசியல் விமர்சகர்கள் பாராட்டுத் தெரிவிக்கிறார்கள்.

இராணுவத்தினர் மூலம் தேர்தலுக்கு அச்சுறுத்தல் ஏற்படும், மக்கள் அச்ச மின்றி வாக்களிக்க இடமிருக்காது என்றெல்லாம் தேர்தலுக்கு முன்னர் போலிப் பிரசாரங்கள் செய்யப்பட்ட போதிலும், தேர்தலன்று மக்கள் சுதந்திரப் பறவைகளாக வாக்குச்சாவடிகளுக்கு சென்று தங்கள் வாக்குகளை பதிவு செய்தார்கள். இதனால்தான் வடமாகாணத்தில் 68 சதவீதமான வாக்குகள் பதிவாகின.

இலங்கை தமிழரசுக்கட்சியின் முதன்மை வேட்பாளராக போட்டியிட்டு 132,255 விருப்பு வாக்குகளுடன் வெற்றியீட்டி, முதலமைச்சர் பதவியை பொறுப் பேற்கவிருக்கும் திரு. சீ.வி.விக்னேஸ்வரன் ஒரு கல்விமான். அவர் சட்ட த்திற்கும் நீதிக்கும் முதலிடம் அளிக்கும் ஒரு நீதியரசர் என்ற முறையில், தனது பிரதேச மக்களின் நல்வாழ்வுக்கான நல்ல முடிவுகளை எடுத்து அரசாங்கம் கடந்த நான்காண்டுகளாக மேற்கொண்டு வந்த வடக்கின் வசந்தம் அபிவிருத்தி திட்டத்தை சிறப்பான முறையில் நடைமுறைப்படு த்துவார் என்று நம்புகிறோம்.

ஜனாதிபதி அவர்களை நான் சந்தித்து பேசத்தயாராக இருக்கிறேன் என்று திரு.விக்னேஸ்வரன் தெரிவித்திருக்கும் கருத்து உண்மையிலேயே பாராட் டப்பட வேண்டியதாகும். எதிர்ப்பு அரசியலை நடத்தாமல் இணக்கப்பாட்டு அரசியலின் மூலமே நல்லெண்ணத்தை வலுப்படுத்தி, வடபகுதியின் வளர்ச்சிக்கு உதவ முடியுமென்ற திரு.விக்னேஸ்வரனின் நிலைப்பாட்டின் காரணமாகவே ஜனாதிபதியை சந்தித்து பேசவிரும்புவதாக கூறியிருக்கிறார் என்று அரசியல் அவதானிகள் பாராட்டு தெரிவித்துள்ளனர்.

வடமாகாண மக்களின் தீர்ப்புக்கு நாம் மதிப்பளிக்கிறோம் என்று பொருளாதார அபிவிருத்தி அமைச்சரும் சிறிலங்கா சுதந்திரக்கட்சியின் தேசிய அமைப் பாளருமான திரு. பசில் ராஜபக்ஷவும் அறிவித்திருக்கிறார். புதிதாக தெரிவு செய்யப்பட்டுள்ள வடமாகாண சபைக்கு மத்திய அரசாங்கம் தனது பூரண ஒத்துழைப்பை வழங்கத்தயாராக இருப்பதாகவும் அவர் கூறியுள்ளார்.

வடக்கின் வசந்தம் வேலைத்திட்டம் தேர்தலை இலக்காக வைத்து மேற் கொள்ளப்பட்ட வேலைத்திட்டமல்ல. அரசாங்கத்தின் அபிவிருத்தி செயற் பாடுகளின் ஒரு பகுதியாகவே வடக்கின் வசந்தத்தை நடைமுறைப்படுத்தி னோம் என்றும் அமைச்சர் பசில் ராஜபக்ஷ மேலும் தெரிவித்தார்.

நம்நாட்டுப் பிரச்சினைகளை இனிமேல் வடமாகாணசபைக்கு தெரிவு செய்யப் பட்ட முதலமைச்சரும் அவரது கட்சியும் ஜனாதிபதி அவர்களுடன் பேசி சுமுகமான தீர்வுகளை ஏற்படுத்துவதில் கவனம் செலுத்துவதன் மூலம் நாட்டின் அபிவிருத்தியும், பொருளாதார முன்னேற்றமும் இனங்களிடையே நல்லி ணக்கப்பாடும் வலுப்பெறும் என்பதை நாம் சுட்டிக்காட்ட விரும்புகிறோம்.

இந்த சந்தர்ப்பத்தில் தமிழ்நாட்டின் முதலமைச்சர் ஜெயலலிதா, திராவிட முன்னேற்றக் கழகத் தலைவர் கலைஞர் கருணாநிதி, வைகோ போன்ற இலங்கையின் இனப்பிரச்சினைக்கு தூபமிட்டு, தமிழ்நாட்டில் அரசியல் நடத்திக் கொண்டிருக்கும் வேடதாரிகளை நம்பி வடமாகாணத்தின் தமிழரசுக்கட்சித் தலைவர்கள் மீண்டும் ஏமாந்து போகலாகாது.

அவர்கள் எந்தவொரு சந்தர்ப்பத்திலும் இலங்கைத் தமிழர்களுக்கு எவ்வித உதவிகளையும் மனதார செய்யமாட்டார்கள். அவர்கள் எப்போதும் இலங்கைத் தமிழர்களின் பிரச்சினையை வைத்துக் கொண்டு அரசியல் இலாபமீட்டும் முயற்சிகளிலேயே ஈடுபடுகிறார்கள் என்பதை நம்நாட்டு தமிழ்த் தலைவர்கள் இப்போதாவது உணர்ந்து கொள்ள வேண்டும்.