ஆசியப் பெண்களின் நம்பிக்கைச் சுடர்!

சுனிலா அபேசேகரா... சுனிலா சுந்தரி ஜானெட் அபேசேகரா...! 

ஆசியப் பெண்களுக்கு எதிரான அடக்கு முறைகளுக்கு எதிராகவும் உரிமைகளுக்காகவும் போராடிய சிங்களப் பெண். இலங்கையில் தமிழர்கள் வாழும் வடபகுதியில் தொடங்கி, உகாண்டா வரை, பாதிக்கப்படும் பெண்களுக்காக கடந்த 30 ஆண்டுகளாக ஒலித்த குரல் சுனிலா அபேசேகராவினுடையது. 61 வயதான சுனிலாவை கடந்த சில வருடங்களாகவே தொந்தரவு செய்துகொண்டிருந்த புற்று நோய், கடந்த செப்டம்பர் 9-ம் தேதி அவரை மரணிக்க வைத்துவிட்டது!

1952-ல் இலங்கையின் கொழும்பு நகருக்கு அருகில் பிலியண்டாலா என்ற ஊரில் பிறந்தவர் சுனிலா. அடிப்படையிலேயே மார்க்ஸிய கொள்கைகளைப் பின்பற்றும் குடும்பம். பள்ளி, கல்லூரிகளில் படிக்கும்போது சுனிலாவின் வாழ்நாள் ஆசையே சினிமா இயக்க வேண்டும், பாட வேண்டும் என்பதுதான். நூற்றுக்கணக்கான மேடை நாடகங்களில் நடித்திருக்கிறார். 1971-ல் தன் 19-வது வயதில் கல்லூரிப் படிப்பு முடித்து வேலைக்கு சென்றுகொண்டிருந்த நேரம் அது. அப்போது, கொழும்புவில் மார்க்சிஸ்ட் ஆதரவாளர்களின் கை சற்று ஓங்கி ஒலிக்க, அரசுக்கு எதிராக தங்கள் உரிமைகளுக்காகக் குரல் கொடுத்துக்கொண்டிருந்தனர். 'ஏன் இவர்கள் போராடுகிறார்கள்’? என்று சுனிலாவுக்குத் தோன்றிய ஒற்றைக் கேள்வியும் அதற்கு கிடைத்த பதிலும், அடுத்த சில மாதங்களிலேயே அந்த இளம்பெண்ணை அரசியலுக்குள் இழுத்துவந்து போராளியாக்​கியது. ஆரம்பத்தில் போராட்ட பாடல்கள் எழுதியும் அதைப் பாடியும் வந்தவருக்கு, 'இது நமக்கான வேலை அல்ல’ என தோன்ற... வெளியே வந்து பெண்கள் அமைப்பு ஒன்றை ஏற்படுத்தி தனியாக பெண் உரிமைகளுக்காகப் போராட ஆரம்பித்தார்.

பெண்களுக்கு சமஉரிமை வேண்டும் என்ற கொள்கைக்காகப் போராட ஆரம்பித்த சுனிலா, பெண்கள் மீதான பாலியல் வன்முறை, குடும்பங்களில் சமூகத்தில் அவர்களுக்கு மறுக்கப்படும் உரி மைகள். திருநங்கைகளுக்கான உரிமைகள், பாலியல் தொழிலில் ஈடுபடும் பெண்களின் பாதுகாப்பு, மறுவாழ்வு, ஹெச்.ஐ.வி. நோயால் பாதிக்கப்பட்டவர்கள்... எனப் பரந்து விரிந்து, குஜராத் கலவரத்தில் பாதிக்கப்பட்ட இஸ்லாமியப் பெண்களுக்கு ஆதரவாகக் குரல் கொடுப்பது வரை வளர்ந்தது. குஜராத் மட்டுமல்லாமல் வட இந்தியா முழுக்க ராணுவச் சட்டத்தால், சமூக அடக்குமுறையால் பாதிக்கப்பட்ட பல மாநிலப் பெண்களுக்காக ஐ.நா. வரை சென்று குரல் கொடுத்தவர் சுனிலா.

பெண்களுக்கு எதிரான வன்முறைகளை எதிர்க்கும் போராளிகளுக்கு இலங்கையில் ஏகப் பட்ட கொலை மிரட்டல்கள். அரசு ஆவணமே ஏறக்குறைய 30,000 பெண்கள் பல்வேறு வன்முறைகளால் பாதிக்கப்பட்டிருக்கிறார்கள் என அறிக்கையளிக்க, கொந்தளித்த பெண்கள் அமைப்பினர் வீதிக்கு வந்து போராடினர். பெண் உரிமைக்காகப் போராடிய பெண்களில் சிலர் கடத்தப்பட, பலர் மிரட்டப்பட அந்த இக்கட்டான சூழலிலும் நிறைமாத கர்ப்பிணியாக கடைசி வரை வீதியில் நின்று குரல் கொடுத்தவர் சுனிலா. இலங்கையில் தமிழர் பகுதியில் விடுதலைப் புலிகளுக்கும் சிங்கள ராணுவத்துக்கும் போர் நடக்கும்போது இருபக்க நியாயத்துக்காக பல ஆண்டுகள் போராடினார். முகாம்களில் அடைக்கப்பட்ட பெண்கள், குழந்தைகள் என சிங்கள அரசுடன் மல்லுக்கட்டி நின்ற சமூக ஆர்வலர்களில் சுனிலா முதன்மைப் போராளி.

இலங்கையில் சுனிலாவின் சேவையைப் பார்த்த ஐ.நா. சர்வதேச அமைதிக்கான அமைப்பு, சுனிலாவை ஆசிய நாடுகளுக்கான அமைதித் தூதுவராக நியமித்து, உள்ளூர்ப் போராளியை உலகப் போராளியாக்கியது. சுனிலாவின் சேவையைப் பாராட்டிய ஐ.நா. கடந்த 1999-ல் ஆசிய நாடுகளில் சிறப்பாக பணியாற்றியதற்காக 'மனித உரிமைகளுக்கான சர்வதேச விருது’ அளித்து கௌரவித்தது.

இப்போதும் இலங்கை கல்லூரி மாணவர்​களுக்கு சுனிலா ஒரு ரோல்மாடல். கொழும் புவில் பிறந்து வளர்ந்திருந்தாலும் சிங்கள அரசை கடுமையாக விமர்சிக்கும் சுனிலா, ''அடிப்படை உரிமைகள் மக்களிடம் இருந்து பறிக்கப்பட்டிருக்கின்றன. ஆயுதக் கலாசாரம், பாதுகாப்பு என்ற பெயரில் தீவிரவாதம் எங்கும் பரவி அதன் நிழல் எல்லா இலங்கை மக்களின் மேலும் படர்ந்திருக்கிறது'' என்று எல்லா மேடைகளிலும் தைரியமாக முழங்குவார். ஆறு குழந்தைகளுக்கு தாய், ஐம்பதை கடந்த வயது என்றபோதும்... 2009-ல் இலங்கையில் நடந்த இறுதி யுத்தத்தின்போது இலங்கையின் தவறுகளை தைரியமாக தட்டிக்கேட்ட பெண் போராளி சுனிலா.  

சுனிலா பிறக்கும்போது ஒரு சிங்களப் பெண். இறக்கும்போது ஆசியா முழுவதும் ஒடுக்கப்படும் பெண்களுக்கான ஒரு நம்பிக்கைச் சுடர்.

(ஆ. அலெக்ஸ் பாண்டியன்)