ஐக்கிய நாடுகள் சபையில் இரு முக்கிய ந்திப்புகள்

இரண்டாம் உலக மகா யுத்தத்தின் பின்னர் ஐக்கிய நாடுகள் சபை உருவாக்கப்பட்டது. கடந்த வாரம் இந்த உலக மகா சபையில் அங்கத்துவ நாடுகளின் வருடாந்த பொதுக்கூட்டம் நடைபெற்றது. இரண்டு விடயங்கள் இங்கு முக்கிய இடத்தினை வகித்தன. சிரியாவின் இரு வருட கால யுத்தமும் இஸ்லாமிய குடியரசான ஈரானின் அணுவிவகாரமுமே மேற்படி இரண்டு முக்கிய விடயங்களாகும். சர்வதேச விவகாரங்களில் அக்கறை செலுத்துபவர்கள் அமெரிக்க ஈரானிய ஜனாதிபதிகளின் நேரடி சந்திப்பு நடைபெறும் என நம்பினர். இப்படியான சந்திப்புக்கு ஈரானின் புதிய ஜனாதிபதி பல கடிதங்களை அமெரிக்க ஜனாதிபதிக்கு பல தடவை எழுதி அத்திவாரமிட்டார். பதில் கடிதங்களையும் அமெரிக்க தலைவர் அனுப்பியதாக நம்பப்படுகின்றது. எப்படியும் பொதுக்கூட்டத்தில் முதல் நாளிலேயே இரண்டு நாட்டு தலைவர்களும் பேசினர். ஆனால் நேருக்கு நேர் தனிப்பட்ட ரீதியில் இரண்டு நாட்டு தலைவர்களுக்கும் இடையிலே பேச்சுவார்த்தைகள் இடம்பெறவில்லை.

எனவே பேச்சுவார்த்தைகளை இடம்பெறச் செய்ய மீண்டும் இரு தலைவர்களும் கடிதங்களை எழுதலாம். சில நேரம் பல வருடங்கள் அல்லது பல மாதங்கள் கடிதங்களை எழுதுவார்கள் எனவும் சில செய்தி வட்டாரங்கள் கூறுகின்றன.

தமது உரையில் ஈரானிய ஜனாதிபதி ஹஸ்ஸான் ரூஹானி அணுவிவகாரம் தொடர்பாக பேசினார். ஈரானிய ஜனாதிபதியின் உரையினை ஜீரணிக்க முடியாத இஸ்ரவேலிய பிரதமர் பென்ஜமீன் நெதன்யாஹுவும் அவரது உதவியாளர்களும் வெளிநடப்பு செய்தனர். சபையினை விட்டு வெளிச்சென்றனர். தொடர்ந்தும் ஈரான் யூரேனியத்தினை அணு ஆயுத தயாரிப்புக்காக வளப்படுத்தி வருவதாக இஸ்ரவேல் பூரணமாக நம்புகிறது.

ஈரான் பிராந்தியத்திற்கும் உலக நாடுகளுக்கும் அச்சுறுத்தலாக அமையக்கூடிய பயங்கரமான அணு ஆயுதத்தினையோ குண்டையோ உருவாக்காது என்று பேசிய ரூஹானி இப்படியான முயற்சிகள் ஈரான் நடைமுறைப்படுத்திவரும் இஸ்லாமிய கொள்கைகளுக்கு மாறானது எனவும் தெளிவாக கூறினார்.

கொள்கையளவில் பேசிய ஈரானிய ஜனாதிபதி செயலில் எப்படி இருப்பார் என்பது சந்தேகம். இதுவரைக்கும் இந்த விடயத்தில் ஈரான் அடைந்துள்ள அபிவிருத்திகள் சமாதான நோக்கத்திற்காக என கூறப்படும் இலக்கினை பல வருடங்களுக்கு முன்னர் அடைந்தது. தற்போது திட்டவட்டமாக அணுவாயுத தயாரிப்பினை நோக்கியே ஈரானிய அரசு செல்கின்றது என்பதைக் காட்டுகின்றது.

2006 ஆம் ஆண்டு முதல் ஐக்கிய நாடுகள் சபையின் உயர்மட்ட அதிகாரிகளுடன் அணுவிடயம் தொடர்பாக சாதகமான முடிவுகளை எதிர்பார்த்துக் கொண்டு ஈரான் பேச்சுவார்தைகளை இன்று வரை நடத்தி வருகின்றது. இதே நேரம் தனது அணு விவகாரம் தொடர்ந்தும் முன் எடுத்துச் செல்லப்பட வேண்டும் என்பதிலும் அது அதிக அக்கறை கொண்டுள்ளது.

மூன்று மாதத்திற்கும் ஆறு மாதத்திற்கும் இடைப்பட்ட காலத்திற்குள் இந்த அணுவிவகாரத்திற்கான முடிவு காணப்பட வேண்டும் என ஈரான் கூறுகின்றது. இந்த முடிவினை அமெரிக்க ஜனாதிபதியும் ஆமோதித்துள்ளார்.

இரு நாடுகளின் வெளிவிவகார அமைச்சர்களும் இது தொடர்பாக பேச்சுவார்த்தை நடத்தி முடித்துள்ளதாகவும் வெளியாகும் செய்திகள் கூறுகின்றன. அமெரிக்க ராஜாங்க காரியதரிசி ஜோன் கேரியும், ஈரானிய வெளியுறவுத்துறை அமைச்சர் ஜவாட் ஸாரிபூம் ஐக்கிய நாடுகளின் சந்திப்பை தொடர்ந்தும் முன் எடுத்துச் செல்லும் என கூறியுள்ளனர்.

சிரியா நாட்டில் இரண்டு வருடங்களுக்கு மேலாக நடந்து வருகின்ற யுத்தத்தினை முடிவுக்கு கொண்டுவர முயற்சிகள் மேற்கொள்ளப்பட்டன. வாதப்பிரதிவாதங்கள் இங்கு நடந்தன. தற்போது முடிவு வரக் கூடிய நிலையில் அரச எதிர்தரப்புக்களுக்கிடையே மோதல்கள் உருவாகி இருப்பதாகவும் கூறப்படுகின்றது.

இரசாயன ஆயுத கிடங்குகளையும் அவற்றை தயாரிக்கும் இடங்களை பார்வையிடவும் ஐக்கிய நாடுகள் சபைக்கு இடம் வழங்கப்பட்டுள்ளது. பொதுமக்களுக்கு எதிராக சிரியா நாட்டு அரசாங்கம் ஆகஸ்ட் மாதம் கொடூரமான முறையில் இரசாயன ஆயுதங்களை உபயோகித்தது ஊர்ஜிதப்படுத்தப்பட்ட நிலையில் ஐக்கிய நாடுகள் அதிகாரிகள் அங்கு செல்ல அனுமதி வழங்கப்பட்டுள்ளது.

ஈரானின் அணுவிவகாரம் போன்று சிரியா விடயம் குறித்தும் பல நாடுகளில் உயர் மட்ட அதிகாரிகள் சந்தித்து பேச்சுவார்த்தை நடத்தியுள்ளனர். பாதுகாப்பு கவுன்ஸிலின் அங்கத்தவர்களான ரஷ்யாவும் சீனாவும் சிரியாவின் யுத்தத்திற்கு முடிவு காண்பதில் தடையாகவுள்ளன. இதற்கு ஆதரவாக ஈரானும் லெபனானில் இருந்து இயங்கும் ஹிஸ்புல்லாஹ் இயக்கமும் உள்ளன.

இதுவரைக்கும் சிரியா விவகாரத்தில் அமெரிக்க ரஷ்ய தலைவர்கள் எடுத்த நடவடிக்கைகளின் முடிவுகள் தனக்கு பாதகமாக அமையக்கூடும் என ஜனாதிபதி பஷார் அல் அஸாத் உணர்ந்துள்ளார். ஏனைய அரபு நாடுகளான ஈராக், லிபியா எகிப்து ஆகியவற்றிற்கு ஏற்பட்ட கதி தனக்கும் ஏற்படக் கூடும் என இவர் பயப்படுகின்றார். எனவே கிளர்ச்சியாளர்களுக்கிடையே கருத்து வேறுபாடுகளையும் மோதல்களையும் இறுதிக் கட்டத்தில் உண்டாக்கி விட்டு இவர் ஐக்கிய நாடுகள் சபையி னையும் தர்மசங்கடத்துக்குள்ளாக்கியுள்ளார். எனவே இந்த விடயத்திலும் தீர்க்கமான முடிவுகளை எடுக்க முடியாத நிலையில் உலக மகா சபையின் சந்திப்பு முடிவடையும் என கூறப்படுகின்றது.

ஈரான் ஜனாதிபதி ஐக்கிய நாடுகள் சபையில் பிரான்ஸ் ஜனாதிபதியை சந்தித்தார். சிரியா விடயத்தில் இவர்கள் இருவரும் மாறுபட்ட கருத்துக்களை கொண்டுள்ளனர். கிளர்ச்சிக்காரர்களை ஆதரிக்கும் பிரான்ஸ் ஜனாதிபதி சிரியா நாட்டு இராணுவத்தின் நடவடிக்கைகளை எதிர்கின்றனர். இதேநேரம் ஈரான் அரசாங்கம் சிரியாவின் தலைவர் பஷார் அஸாத் அவர்களின் ஆதரவாளனாக வுள்ளது.

(பஸ்லி எம். அவபு)