யாழ்.மாவட்டத்தில் உற்பத்தி செய்யப்படும் பழங்களின் இழப்புகளும் அவற்றை நிவர்த்திப்பதற்கான வழிமுறைகளும்

(சென்ற சனிக்கிழமை தொடர்)

5. பழுக்க வைக்கும் முறைகள்

பொதுவாக புகையூட்டலின் மூலமே வாழைப்பழங்கள் பழுக்க வைக்கப்படுகின்றன. முன்னைய காலங்களில் நிலத்தின் கீழ் அமைக்கப்படும் கிடங்குகளில் வாழைக் குலைகள் அடுக்கப்பட்டு புகையூட்டப்பட்டு வந்தன. ஆயினும் தற்போது பழுக்க வைத்தலுக்காகப் கீழ் காட்டப்பட்டுள்ள பல்வேறு பழுக்க வைக்கும் முறைகள் விவசாயிகளாலும் சந்தை வியாபாரிகளாலும் உபயோகிக்கப்படுகின்றன.

அ. புகையூட்டும் பெட்டிகளில் பழுக்க வைத்தல்

இங்கு வாழைக் குலைகள் பழுக்க வைக்கும் பெட்டிகளில் அடுக்கப்பட்டு ஊதுபத்திக் குச்சியின் புகையூட்டப்பட்டபின் பெட்டி மூடி வைக்கப்படுகின்றது. இம்முறை மூலம் குலைகள் 36 – 40 மணித்தியாலங்களில் பழுக்க வைக்கப்படுகின்றன. மருதனார்மடம், சுன்னாகம், திருநெல்வேலி, நெல்லியடி, பருத்தித்துறை, வல்வெட்டித்துறை, சாவகச்சேரி, கொடிகாமம், சங்கானை சந்தைகளில் இம்முறை மூலம் வாழைக்குலைகள் பழுக்க வைக்கப்படுகின்றன.

ஆ. சீமெந்துத் தரையில் பழுக்க வைத்தல்

இங்கு சீமெந்து தரையில் வாழைக்குலைகள் அடுக்கப்பட்டு ஊது பத்திக் குச்சியின் புகையூட்டப்பட்டபின் குலைகள் படங்கால் மூடி வைக்கப்படுகின்றன. இம்முறை மூலம் குலைகள் 36 – 40 மணித்தியாலங்களில் பழுக்க வைக்கப்படுகின்றன. சுன்னாகம் சாவகச்சேரி சந்தைகளில் இம்முறை மூலம் வாழைக் குலைகள் பழுக்க வைக்கப்படுகின்றன.

இ. பரல்களில் புகையூட்டி பழுக்க வைத்தல்

சில்லறை விற்பனை மேற்கொள்ளப்படும் சந்தர்ப்பத்தில் பரல்களில் வாழைக் குலைகள், வாழைச் சீப்புக்கள் அடுக்கப்பட்டு ஊதுபத்திக் குச்சியின் புகையூட்டப்பட்டபின் பரல் மூடிவைக்கப்படுகின்றது. மருதனார்மடம், சுன்னாகம், திருநெல்வேலி, நெல்லியடி, பருத்தித்துறை, வல்வெட்டித்துறை, மந்திகை, சாவகச்சேரி, கொடிகாமம், சங்கானை சந்தைகளில் இம்முறை மூலம் வாழைக் குலைகள் பழுக்க வைக்கப்படுகின்றன.

ஈ. பழுத்த பழங்களை உபயோகித்து பரல்களில் பழுக்க வைத்தல்

பரல்களில் முற்றிய பழங்களுடன் பழுத்த பழங்களும் வைக்கப்பட்டபின் பரல்கள் ஒரு நாளைக்கு இறுக்கமாக மூடி வைக்கப்படுகின்றன. இம்முறை மூலம் பழுக்க வைக்கப்படும் போது பழுத்த பழங்களில் இருந்து வெளிவிடப்படும் எதிலீன் வாயு மூலம் முற்றிய பழங்களின் பழுத்தல் செயன்முறை தூண்டப்படுகின்றது. இம்முறை பழுக்க வைத்தலுக்கு உகந்த முறையாகும்.

உ. அறையில் வாழைக்குலைகளைப் பழுக்க வைத்தல்

இங்கு வாழைப்பழங்கள் பழுக்க வைப்பதற்கென தனியான அறையொன்று அமைக்கப்பட்டுள்ளது. இவ்வறையினில் 100 வாழைக்குலைகளை அடுக்கப்படுகின்றது. இக்குலைகளைப் பின் துணியொன்றால் மூடிய பின் அறையின் கதவு மூடப்பட்டு கதவிடுக்குகள் சாணம் கொண்டு இறுக்கமாக பூசப்படுகின்றது. அடிப்பாகத்தில் துளையிடப்பட்ட மண்பானையொன்றில் வாழைச் சருகுகள் இடப்பட்டு அறையின் துளையிடப்பட்ட மேற்பகுதியில் வைக்கப்படுகின்றது.

பானையின் துவாரத்தினூடு எரியூட்டப்பட்ட கயிற்றினை செலுத்தி பானையிலுள்ள வாழைச் சருகுகள் புகையூட்டப்படுகின்றன. அறையினு உள்ள புகையின் அளவு அறையின் ஒரு பகுதியில் அமைக்கப்பட்டுள்ள கண்ணாடியினூடு அவதானிக்கப்படுகின்றது. மாலை 3.00 மணிக்கு இவ்வாறு புகையூட்டப்படும் வாழைக்குலைகள் அடுத்தநாள் காலை 9.00 மணிக்கு அறையிலிருந்து வெளியே எடுக்கப்படுகின்றன.

ஊ. இரசாயனங்களைப் பயன்படுத்தி பழங்களை பழுக்க வைத்தல்

அத்துடன் விரைவாகப் பழுக்க வைப்பதற்காக அளவுக்கதிகமாக பாவிக்கப்படும் இரசாயனங்கள், சிபார்சு செய்யாத நச்சு இரசாயனங்களையும் பாவிப்பதும் அவதானிக்கப்பட்டுள்ளது. இதனால் நுகர்வோர் பாதிக்கப்படும் அபாயம் உள்ளது. ஆகவே பழ உற்பத்தியாளர்கள் மற்றும் பழ வியாபாரிகள் சுகாதாரக் கேடற்ற, தரத்தைப் பாதிக்காத முறையை பழுக்க வைத்தலுக்கு உபயோகித்தல் மூலம் தரமான பழங்களை சந்தைப்படுத்தல் வேண்டும்.

வியாபாரிகள் எதிரல் இரசாயனத்தை தமது தேவைக்கேற்ற செறிவுகளில் தயாரித்து கைத்தெளிகருவி மூலம் பழங்கள் மீது நேரடியாக விசிறுகின்றனர். சிலர் இரசாயனத்தை பழங்கள் மீது பூசியும் பழுக்க வைக்கின்றனர்.

இக்காரணங்களுள் தவறான பழுக்க வைக்கும் முறைகள் பழங்களின் தரத்தை குறைப்பதுடன் நுகர்வோரின் ஆரோக்கியத்திலும் பெரிதும் தீங்கிழைக்கின்றது.

பழங்கள் பழுக்கும் போது எதிலீன் வாயு வெளிவிடப்படுகின்றது. இவ்வாயுவே பழங்களின் இழையங்களைத் தூண்டி பழங்களில் பெளதீக, இரசாயன மற்றும் உடற்தொழிலியல் மாற்றங்களை ஏற்படுத்துகின்றது. இதன் விளைவாகவே விரும்பத்தக்க சுவை மணம் கொண்ட பழங்கள் உருவாகின்றன. பழுக்க வைத்தல் செயன் முறையை நடைபெற உதவுகின்றது.

புகையூட்டல் செயன்முறையின் போதும் எதிலீன் வாயு உற்பத்தி செய்யப்பட்ட போதும் எதிலீன் வாயுவுடன் நச்சுத்தன்மையான பல வாயுக்களும் உற்பத்தியாக்கப்படுகின்றன. இப்பழங்களை தொடர்ச்சியாக உண்ணும் நுகர்வோர் இவ்வாயுக்களின் செறிவால் எதிர்காலத்தில் பக்கவிளைவுகளை எதிர்நோக்க வேண்டி ஏற்படும்.

எனவே விவசாயத் திணைக்களத்தால் சிபார்சு செய்யப்பட்டுள்ள கீழ் காட்டப்பட்டுள்ள முறையை உபயோகிப்பதன் மூலம் இயற்கை முறையில் பழுத்தலுக்கு ஒப்பான வகையில் பழங்கள் பழுக்க வைத்து தரமான பழங்களை சந்தைப்படுத்த முடியும்.

விவசாயத்திணைக்களத்தால் சிபார்சு செய்யப்பட்ட பழுக்க வைத்தல் முறை

தேவையான இரசாயனங்கள்

* ஐதான எதபோன் கரைசல் 1 மீ. லீ. எதபோன்/ 1 லீற்றர் நீர்

எதபோன் இரசாயனத்தினை வெவ்வேறு இரசாயனப் பெயரில் சந்தையில் பெற்றுக்கொள்ள முடியும். எதபோன் இரசாயனத்தில் 1 மீ. லீ. இனை அளந்தெடுத்து 1 லீற்றர் நீரில் அதனை கலந்து சூரிய ஒளி உட்புகாத கறுப்புப் போத்தல் அல்லது பொருத்தமான பாத்திரத்தில் சேமித்தல் வேண்டும். உபயோகிக்கும் கொள்கலனின் கொள்ளவிற்கு ஏற்றவாறு திரீல் கரைசலைத் தயாரித்தல் வேண்டும்.

* சுண்ணாம்புக் கரைசல் 100 கிராம் / 1 லீற்றல் நீர்

100 கிராம் சுண்ணாம்பை 1 லீற்றர் நீரில் கரைத்து அதனை போத்தல் அல்லது பொருத்தமான பாத்திரத்தில் சேமித்தல் வேண்டும். உபயோகிக்கும் கொள்கலனின் கொள்ளவிற்கு ஏற்றவாறு சுண்ணாம்பு கரைசல் கரைசலைத் தயாரித்தல் வேண்டும்.

பரிகரணப் படிமுறைகள்

* பழுக்க வைக்க உபயோகிக்கும் கொள்கலனின் கொள்ளளவை கணித்தல் வேண்டும் (‘V’ கன அடி)

* நன்கு முற்றிய பழங்களைக் கொள்கலனில் 2/3 பகுதியில் அடுக்குதல் வேண்டும். அடுக்கும் போது கொள்கலனின் 1/3 பகுதி வாயுக்களின் ஓட்டத்திற்காக வெறுமையாக விடப்படல் வேண்டும்.

* தேவையான இரசாயனத்தின் அளவைக் கணித்தல் வேண்டும்.

ஒரு கன அடிக்கு : 3 - 4 மி. லீ.

‘V’ கன அடிக்கு : V (3 - 4) மி. லீ.

* எதபோன் கரைசலைக் கொள்கலனில் வைத்தல் வேண்டும்

* அதேயளவு சுண்ணாம்புக் கரைசலை எதிரல் கரைசலினுள் ஊற்றி கலக்குதல் வேண்டும்

* கொள்கலனை உடனடியாக மூடி விடுதல் வேண்டும்.

* கொள்கலனின் வெப்பநிலை அண்ணளவாக (18) சாரீரப்பதன் அண்ணளவாக (18) இருப்பின் எதீலின் வெளியேற்றம் உத்தமமாக இருக்கும்

* கொள்கலனை 24 மணித்தியாலம் மூடியபடி விடுதல் வேண்டும்

* பழுத்தல் செயன்முறையின் போது வெளியேற்றப்படும் காபனீரொட்சையிட் வாயு, மீதமாகவுள்ள எதிலீன், வெப்பம் என்பவற்றை வெளியேற்றுவதற்காக கொள்கலனைத் திறந்து காற்றோட்டமாக்கல் வேண்டும்

* பரிகரிக்கப்பட்ட பழங்கள் வெளியே எடுத்து 2 நாட்களில் இயற்கையாகப் பழுத்த பழங்களை ஒத்ததாகப் பழுக்கும்.

எதபோன் கரைசலில் சுண்ணாம்புக் கரைசலைச் சேர்க்கும் போது வெளிவிடப்படும் எதிலீன் வாயு பழங்களின் இழையங்களைத் தூண்டி பழுக்க வைத்தல் செயன்முறை நடைபெற உதவுகின்றது. இதன்போது தீங்கற்ற வாயுக்கள் உற்பத்தியாக்கப்படமாட்டாது. அத்துடன் பெறப்படும் பழங்களும் சுவை மிக்கதாகவும் தரமானதாகவும் இருக்கும். இம்முறையை உபயோகிப்பதற்கான உற்பத்திச் செலவு ஒப்பீட்டளவில் மிகவும் குறைவானதாகும்.

‘எனவே பழ உற்பத்தியாளர்களே பழ வியாபாரிகளே தங்களையும் தங்கள் சந்ததியின் ஆரோக்கியத்தினைக் கருத்திற் கொண்டு மேற்குறித்த முறையை உபயோகித்து சுகாதாரக்கேடற்ற, சுவை மிக்கதாகவும் தரமானதாகவும் பழங்களை உற்பத்தி செய்யுங்கள் சர்வதேச சந்தை வரை சந்தை வாய்ப்பைப் பெற்றிடுங்கள்.’

பழ மரங்களின் உற்பத்தித் திறனை அதிகரித்தல் மற்றும் அறுவடையின் பின்னான முகாமைத்துவம் தொடர்பான மேலதிக விபரங்கள் தேவைப்படுவோர் தங்கள் பகுதி விவசாயப் போதனாசிரியருடன் தொடர்பு கொண்டு பயிற்சிகளைப் பெற்றுக் கொள்ள முடியும்.

திருமதி கிருபவதனி சிவதீபன்
விவசாய கண்காணிப்பு
உத்தியோகத்தர்