தமிழ் மக்களின் எதிர்காலத்தை தீர்மானிப்பது தமிழ்தேசிய கூட்டமைப்பா? அல்லது ஜனாதிபதியா?

அரசன் எவ்வழி மக்களும் அவ்வழி என்று கூறுவார்கள். ஒரு நாட்டை ஆட்சி செய்யும் தலைவர் அந்த நாட்டு மக்களுக்கு ஆற்றும் சேவையைப் பொறுத்து மக்களும் நாட்டுத் தலைவரோடு இணைந்திருப்பர். இந்த நாட்டில் புரையோடிப் போயிருந்த 30 வருட பயங்கரவாத சூழலை முடிவுக்கு கொண்டு வந்ததனால் தமிழ் மக்களுக்கு ஓரளவு நிம்மதியும் விடிவும் ஏற்பட்டன. இதனை ஏற்படுத்திக் கொடுத்தவர் ஜனாதிபதி மஹிந்த. இந்த அமைதியான சூழலை தமிழ் மக்கள் மிகவும் விரும்புகின்றனர். இந்த நிலைமை தொடர்ந்தும் இருக்க வேண்டும் என்ற ஆதங்கம் தமிழ் மக்களுக்கு உண்டு. யுத்தத்தால் மிகவும் பாதிப்படைந்த தமிழ் மக்களுக்கு யுத்தம் முடிவின் அமைதிச் சூழலின் அருமை புரியும். 2009ம் ஆண்டு யுத்தம் முடிவடைந்து ஒரு வருடத்தில் இடம்பெற்ற 2010 ஜனாதிபதி தேர்தலில் தமிழ்த் தேசிய கூட்டமைப்பு தமிழ் மக்களை பிழையாக வழிநடத்தியது.

இறுதிக்கட்ட யுத்தத்தை மூர்க்கமாக மேற்கொண்ட முன்னாள் இராணுவ தளபதி சரத் பொன்சேகாவை ஒரு வருட காலத்திற்குள் ஒரு நல்லவர் என்று அடையாளம் காட்டி அவருக்கு வாக்களிக்கும்படி தமிழ்த் தேசிய கூட்டமைப்பு தமிழ் மக்களை கேட்டது. தமிழ் மக்களும் கூட்டமைப்பு கூறியபடி வாக்களித்தனர். இதனால் வரலாற்று தவறொன்றை தமிழ் மக்கள் செய்து விட்டனர்.

யுத்தக் குற்றம் பற்றி பேசும் தமிழ்த் தேசிய கூட்டமைப்பு, எவ்வாறு சரத் பொன்சேகாவை மிகவும் நல்லவர் என்று அடையாளம் காட்டியது. நாம் சாதாரணமாக தேர்தலில் ஒருவருக்கு வாக்களிப்போமானால், அவரை நல்லவர் என்று கருதியே வாக்களிப்போம். இது எல்லோரும் அறிந்த உண்மை. அப்படியானால், சரத் பொன்சேகா மட்டும் நல்லவராக தென்பட காரணம் என்ன? இந்த தவறை தமிழ் மக்கள் நன்கு உணர்ந்துள்ளனர். அத்துடன் இறுதிக்கட்ட யுத்தத்தில் மிகவும் ஆவேசமாக போரிட்ட இராணுவத்தளபதியை, போர் முடிவடைந்து ஒரு வருட காலத்திற்குள் நல்லவர் என்று ஏற்றுக்கொண்டு, ஒட்டுமொத்த தமிழ் மக்களும் வாக்களித்ததனால் யுத்த குற்ற விசாரணை பற்றி தமிழ் தேசிய கூட்டமைப்பு பேச முடியாது?

உள்நாட்டில் இறுதிக்கட்ட யுத்தத்தால் யார் கூடுதலாக பாதிக்கப்பட்டனர் என்று உலகம் கூறியதோ (அதாவது தமிழ் மக்கள்) அதே தமிழ் மக்கள் சரத் பொன்சேகாவுக்கு வாக்களித்ததனால் இறுதிக்கட்டத்தில் யுத்த குற்றங்கள் எதுவும் இடம்பெறவில்லை என்று உறுதி செய்துள்ளனர். அடுத்த முறை ஜனாதிபதி தேர்தலில் தமிழ்த் தேசிய கூட்டமைப்பு பரிந்துரை செய்யும் ஒருவருக்கு தமிழ் மக்கள் ஒருபோதும் வாக்களிக்கப் போவதில்லை. நல்ல மாட்டுக்கு ஒரு சூடு.

தமிழ் மக்கள் 2010ஆம் ஆண்டு தாம் செய்த தவறை நன்கு உணர்ந்துள்ளனர். தமிழ்த் தேசிய கூட்டமைப்பின் தனிப்பட்ட நிகழ்ச்சி நிரலுக்காக தமிழ் மக்கள் பகடைக்காய்களாக பயன்படுத்தப்பட்டுள்ளனர். இதனை இலங்கை வாழ் தமிழ் மக்கள் அனைவரும் நன்கு உணர்ந்துள்ளனர். எனவே தமது விருப்பப்படி எதிர்காலத்தில் ஜனாதிபதி தேர்தலில் வாக்களிப்பர் என்று தமிழ் மக்கள் ஒருமித்த குரலில் தெரிவித்துள்ளனர். இது தமிழ்த் தேசிய கூட்டமைப்புக்கு ஒரு தலையிடியாக மாறியுள்ளது. எதிர்காலத்தில் தமது சொற்படி தமிழ் மக்கள் செயலாற்ற மாட்டார்கள் என்பதை கூட்டமைப்பு உணர்ந்துள்ளது.

மாகாண சபைகளுக்கு பொலிஸ் அதிகாரம் தேவையில்லை!-

சுப்பிரமணிய சுவாமி

வடக்கு மற்றும் கிழக்கு மாகாண சபைகளுக்கு பொலிஸ் அதிகாரம் வழங்கப்படக் கூடாது என்று கலாநிதி சுப்பிரமணிய சுவாமி வலியுறுத்தியுள்ளார்.

இந்திய ஆளும் கட்சியான பாரதீய ஜனதாக் கட்சியின் முக்கியஸ்தர் சுப்பிரமணிய சுவாமி வார இறுதி சிங்களப் பத்திரிகை ஒன்றுக்கு நேர்காணல் வழங்கியிருந்தார். அவர் தனது பேட்டியின் போது, இலங்கையின் வடக்கு மற்றும் கிழக்கு மாகாணங்களில் இன்னும் திருப்திகரமான சமாதான சூழல் கட்டியெழுப்பப்படவில்லை. இந்தியாவை எடுத்துக் கொண்டால் புதுடில்லி உள்ளிட்ட இன்னும் இரண்டு மாநிலங்களுக்கு பொலிஸ் அதிகாரம் வழங்கப்படவில்லை.

அப்படியிருக்க இலங்கையில் மாகாண சபைகளுக்கு அந்த அதிகாரம் தேவையில்லை. இலங்கைக்கு எதிரான நவநீதம்பிள்ளையின் விசாரணைக்குழுவை இந்தியாவின் தமிழ் நாட்டுக்கு அனுப்புமாறு கோரிக்கை வைப்பதற்கு வட மாகாண சபையின் உறுப்பினர்களுக்கு எந்த அருகதையும் இல்லை. மோடி அரசாங்கம் அதற்கெல்லாம் இடமளிக்காது. இலங்கைக்கு எதிரான விசாரணைக்குழுவே முறைகேடானது.

தமிழ்த் தேசியக் கூட்டமைப்பினர் பொதுமக்களின் இயல்பு வாழ்க்கையை விரும்புவதில்லை. அவர்கள் மீண்டும் விடுதலைப் புலிகளின் யுக வாழ்க்கைக்கு பொதுமக்களை இழுத்துச் செல்ல, முயற்சிக்கிறார்கள். இலங்கையில் சீன அரசாங்கத்தின் தலையீடு காரணமாக இந்தியாவின் பாதுகாப்புக்கு அச்சுறுத்தல் இல்லை. சீன இராணுவத்தினர் எவரும் இலங்கையின் இராணுவ முகாம்களில் இல்லை. அப்படியிருக்க, இந்தியாவின் பாதுகாப்பு அச்சுறுத்தல் தொடர்பாக பேசுவதற்கு தமிழ்த் தேசியக் கூட்டமைப்பினருக்கு தகுதி இல்லை. இவையெல்லாம் விரக்தி, கோபம், பொறாமை காரணமாகவே ஏற்படுகின்றன. தமிழ்நாடு முன்னாள் முதலமைச்சர் கருணாநிதிக்கு விடுதலைப் புலிகளுடன் தொடர்பு இருந்தது. இந்தியா தொடர்பான தகவல்களை அவர் விடுதலைப் புலிகளுக்கு வழங்கியிருந்தார். அதன் காரணமாக நான் சட்டத்துறை அமைச்சராக இருந்தபோது கருணாநிதியின் அரசைக் கலைத்துள்ளேன்.

தற்போது இலங்கையில் வருவதற்கு பிரதமர் மோடி மற்றும் பாரதீய ஜனதாக் கட்சியின் அனுமதி பெற்றே வந்துள்ளேன். இலங்கையுடனான உறவில் தமிழ்நாட்டின் எதிர்ப்பை நாங்கள் பொருட்படுத்துவதில்லை. விடுதலைப் புலிகளுடனான இறுதி யுத்தத்தில் பொதுமக்கள் கொல்லப்பட்டுள்ளதாக குற்றம் சுமத்துகின்றார்கள். அப்படியெனில் நடைபெற்ற இரண்டு உலகப் போர்களிலும் பொதுமக்கள் கொல்லப்படவில்லையா? உலக நாடுகளுக்கிடையிலான போர்களில் பொதுமக்கள் கொல்லப்படவில்லையா?

எங்களது அரசாங்கம் அதிகப் பெரும்பான்மையைக் கொண்ட அரசாங்கம். இலங்கைக்கு எதிரான எந்தவொரு செயற்பாட்டையும் நாங்கள் அனுமதிக்க மாட்டோம். இது விடயத்தில் தமிழ் நாட்டின் கருத்துக்களுக்கு செவிசாய்க்கும் அவசியம் எங்களுக்கில்லை என்றும் கலாநிதி சுப்பிரமணிய சுவாமி மேலும் தெரிவித்துள்ளார். இதே விடயத்தையே அண்மையில் கொழும்பில் இடம்பெற்ற பாதுகாப்பு மாநாட்டில் இடம்பெற்ற விசேட கலந்துரையாடலில் கலாநிதி சுப்ரமணிய சுவாமி எனக்கு தெளிவாக தெரிவித்தார்.

கூட்டமைப்பினர் எங்கு சென்றாலும் இறுதியில் என்னிடமே வரவேண்டும்:

ஜனாதிபதி கடுமையாக தெரிவிப்பு

இந்தியாவுக்கு சம்பந்தன் தலைமையிலான தமிழ்த் தேசிய கூட்டமைப்பு குழுவினர் சென்றமை குறித்து ஜனாதிபதி மஹிந்த ராஜபக்ஷ கடும் சீற்றமடைந்ததாக தெரிவிக்கப்படுகிறது. இது குறித்த தனது கடும் அதிருப்தியை பிரதிநிதி ஒருவர் மூலமாக ஜனாதிபதி, சம்பந்தனிடம் தெரிவித்தார்

இது தொடர்பாக மேலும் தெரியவருவதாவது,

இந்த விஜயம் குறித்து அரசாங்கத்திற்கு தகவல் எதுவும் தெரிவிக்கப்படாதது குறித்த தனது கடும் ஏமாற்றத்தை ஜனாதிபதி தனது பிரதிநிதி ஊடாக வெளிப்படுத்தியுள்ளார். “தமிழ்த் தேசிய கூட்டமைப்பின் இந்திய விஜயம் என்னையும் அரசாங்கத்தையும் நெருக்கடிக்குள் தள்ளு வதை நோக்கமாக கொண்டது. கூட்டமைப்பினர் அரசாங்கத்தை மாற்ற விரும்புகின்றனர். அரசாங்கத்திற்கும் தமிழ்த் தேசியக் கூட்டமைப்பிற்கும் இடையிலான முறுகல் நிலைக்கு இதுவும் ஒரு காரணம்.

வட மாகாண சபை அரசாங்கத்தை மாற்ற வேண்டும் என்ற தீர்மானத்தை நிறைவேற்றியதாலேயே நான் ஆளுநரை மாற்றவில்லை. சம்பந்தனும் அவரது கட்சியினரும் எங்கு சென்றாலும் இறுதியில் என்னிடமே வரவேண்டும். என்னிடம் வராவிட்டால் அவர்களால் தீர்வுகள் குறித்து பேச முடியாது” என தன்னுடைய பிரதிநிதி ஊடாக ஜனாதிபதி தெரிவித்துள்ளார்.

எனினும் கூட்டமைப்பின் தலைவர் சம்பந்தன், ஜனாதிபதியின் இந்த குற்றச்சாட்டுகளை மறுத்துள்ளதாக தெரிவிக்கப்படுகிறது.

“நான் தமிழ் தேசியக் கூட்டமைப்பின் தலைவர், நாங்கள் அரசியல் தீர்வொன்றிற்காக பாடுபடுகிறோம், இந்திய அரசாங்கத்தின் அழைப்பின் பேரில் எங்களுடைய நிலைப்பாட்டை தெளிவுபடுத்துவதற்காக நாங்கள் அங்கு செல்கிறோமே தவிர ஓர் இறுதித் தீர்வை வலியுறுத்தியல்ல” என அவர் குறிப்பிட்டுள்ளார். இருந்தபோதிலும் நாட்டு தலைவருக்கு எதனையும் கூறாமல் வெளிநாடு சென்று உள்நாட்டு விவகாரம் தொடர்பில் கலந்துரையாடியமை பிழை என்றே கூற வேண்டும்.

கேட்டால், உள்நாட்டில் நாம் கேட்டவற்றை தந்தால் நாம் வெளிநாடு செல்லவேண்டிய நிலைமை ஏற்பட்டிருக்காது என்று திரு. சம்பந்தன் கூறுவார். ஆனால் திரு. சம்பந்தன் ஒன்றை மட்டும் புரிந்துகொள்ள வேண்டும். அன்று எல்.ரி.ரி.ஈ யினர் இருந்த காலம் அல்ல இது. இப்போது கள நிலவரம் வேறு. எனவே அதே கோரிக்கைகளை முன்வைக்காமல், தமிழ் மக்கள் மத்தியில் மீண்டும் பிரிவினை எண்ணத்தை தூண்டாத தீர்வை முன்வைக்க வேண்டும். மேலும் தமிழ் மக்கள் மத்தியில் பிராந்திய உணர்வை வளர்க்காமல் தேசப்பற்றை வளர்க்கும் ஒரு தீர்வை, அரசாங்கத்திடம் முன்வைக்க வேண்டும். விட்டுப்போன தேசப்பற்றை தமிழ் மக்கள் மத்தியில் மீண்டும் உருவாக்க வேண்டும். நாட்டில் ஒரு பிரச்சினை இருந்தால், அதனை தீர்க்கும்போது நாடு மேலும் ஒன்றுபட வேண்டும்.

நாட்டுப்பற்று மேலும் வளர வேண்டும். தேசப்பற்றை ஊக்குவிக்காத எந்த ஒரு தீர்வும் நாட்டுக்கும் சமூகத்திற்கும் நன்மை பயக்காது. அதனை திரு. சம்பந்தன் நன்கு ஞாபகத்தில் வைத்துக்கொள்ள வேண்டும். அதனை விடுத்து, விதண்டாவாதம் பேசுவதில் அர்த்தமில்லை. இதனை பிழையாக எடை போடக் கூடாது. தமிழ் மக்களின் எதிர்காலத்தை தீர்மானிக்கும் கணிசமான சக்தி திரு. சம்பந்தன் தரப்பினரிடம் வழங்கப்பட்டுள்ளது. அதனை நல்ல முறையில் பயன்படுத்துங்கள். புத்திசாலித்தனமாக பயன்படுத்துங்கள்.

இல்லாவிட்டால் தமிழ் மக்கள் மாற்று கட்சிகளை நம்பும் காலம் வெகு தூரத்தில் இல்லை என்பதையும் கூட்டமைப்பினருக்கு ஞாபகப்படுத்த விரும்புகிறோம். யுத்த குற்ற விசாரணை எனும் விடயத்தை காட்டி ஜனாதிபதியையோ அல்லது அரசாங்கத்தையோ மண்டியிட வைக்கலாம் என்று கனவு காண வேண்டாம். எந்த சவாலையும் எதிர்கொள்ளக் கூடிய தலைவரே ஜனாதிபதியாக ஆட்சியில் தற்சமயம் உள்ளார் என்பதை நினைவில் வைத்துக்கொள்ளுமாறும் கேட்டுக்கொள்கிறோம்.

தனிப்பட்ட குரோதங்கள் கோபங்களை ஒரு புறம் தள்ளி வைத்துவிட்டு, தமிழ் மக்களுக்கு நல்லதொரு எதிர்காலத்தை ஏற்படுத்தும் நோக்கத்தில், சேவை செய்ய முன்வாருங்கள் என்று திரு. சம்பந்தனிடம் அன்பாக கேட்டுக்கொள்கிறோம்.

ஜெயரஞ்சன் யோகராஜ்
சிரேஷ்ட ஊடகவியலாளர்