பெண்களுக்கு ஆடுகள்

வழித்தேங்காயை தெருப்பிள்ளையாருக்கடித்தார் ஐங்கரத்தார்!

அளவெட்டி சைவமகாசபை மண்டபத்தில் கடந்த செவ்வாய்க்கிழமை பெண்களைத் தலைமைத்துவமாகக் கொண்ட குடும்பங்களுக்கு ஆடுகள் வழங்கப்பட்டன. இந்த நிகழ்வு சைவமகாசபைத் தலைவர் சுப்பிரமணியம் தலைமையில் நடைபெற்றது. வடமாகாணத்தில் பெருந்தலை என்று போற்றப்படும் முன்னாள் நீதியரசரும் தற்போதைய முதலமைச்சருமாகிய க.வி.விக்னேஸ்வரன் இந்த ஆடுகளைக் கையளித்தார். இந்த நிகழ்வில் விவசாய அமைச்சு அதிகாரிகளும் கலந்துகொண்டனர். ஆனால் ஆடுகளுக்குரிய பணத்தை வளங்கியவர்கள் ஒரு மூலையில் அமர்ந்து நிகழ்வில் திருப்தியுற்றனர்.

ஏன் ஐயா, இந்த வேண்டாத வேலை. யாரோ பணம் வழங்க அதை நீங்களே வழங்குவது போல பீலாக் காட்டுவது எதற்கு?   உங்கள் ஒவ்வொருவருக்கும் 40 லட்சமும் அமைச்சர்களுக்கு அதற்கு மேலாகவும் கட்டடம் அமைக்க வந்த காசை உங்கள் இஷ;டப்படி ஒதுக்கினீர்களே! இதற்கு வடக்கு மாகாண மக்கள் உங்களிடம் கேள்வி கேட்டார்களா? அந்தக் காசில் நீங்கள் இவ்வாறான திட்டத்தை நீங்கள் வழங்குவதுபோல் முன்னெடுங்களேன்!

 யார் உங்களைத் தடுத்தது? அல்லது தடுப்பதற்கோ தட்டிக் கேட்பதற்கோ எவர்க்கு அதிகாரம் உண்டு? அல்லது உங்களை கேட்க எவர்க்கு நெஞ்சுரம் உண்டு? உங்களுக்கு ஒதுக்கின பணத்தில் 40 ஆயிரம் 30 ஆயிரம் என்று எல்லா மக்களையும் திருப்திப்படுத்தவேண்டும் என்று எண்ணி பிச்சுப் பிச்சு மக்களுக்கு பிச்சை போடுகின்றியளே! செய்கின்ற வேலையை ஒழுங்காக எமது மக்களுக்கு பிரயோசனமுள்ளமாதிரி - மக்களுக்குப் பயன்படத் தக்கவகையில் செய்யுங்களேன்.

கைத்தொழில் பேட்டை ஒன்றை வடக்கு மாகாணசபை ஊடாக ஆரம்பிக்கலாம். அதனூடாக பல இளைஞர், யுவதிகளுக்கு வேலைவாய்ப்பை வழங்கலாம். இன்றைக்கு எமது சகல வருமானங்களும் தெற்குக்குத்தான் செல்கின்றன. உதாரணத்துக்கு கற்பூரம் என்றாலும் சரி, பனடோல் என்றாலும் சரி சந்தைப்படுத்தல் கூடிய பொருள்கள் அனைத்தும் தெற்கிலிருந்தே வருகின்றன. இவற்றை வடமாகாணசபை ஊடாக - அவர்களின் நிதி ஒதுக்கீட்டில் மேற்கொண்டு மக்களுக்கு ஆக்கபூர்வமான செயற்பாடு எதனையும் மேற்கொள்ளலாமே!

வடக்கு மாகாண எல்லைக்குள் ஆரம்பித்து வடக்கு மாகாண எல்லைக்குள் முடிவடைகின்ற அனைத்து பெருந்தெருக்களும் மாகாண சபைக்குரியவை. நீங்கள் பதவிக்கு வந்து - ஆட்சிப்பீடம் ஏறி - ஒருவருடம் அண்மித்த நிலையில் எத்தனை வீதிகளைப் புணரமைத்தீர்கள்? மாகாண சபையில் நீங்கள் (நீங்கள் என்பது ஒட்டுமொத்த சபை உறுப்பினர்கள் முதலமைச்சர், அமைச்சர்கள், அவைத் தலைவர் உட்பட) சாதித்தவை என்ன என்பதை ஒருகால் உங்கள் மனச்சாட்சியைத் தொட்டு சிந்தித்துப் பாருங்களேன்! ஆளுநரையும் விஜயலட்சுமியையும் வசைபாடியதைத் தவிர வேறெதுவும் நீங்கள் சாதித்ததில்லை என்பது உங்களுக்கே புரியும்.

முதலமைச்சரின் வாசஸ்தலத்துக்கு மாதம் 4 லட்சம் வாடகை. போக்குவரத்துக்கு மாதம் லட்சக் கணக்கான பணம் செலவு இந்த லக்சறி வாழ்வை எளிமையாக்கினால் இந்தப் பணமே போதும் மாகாண அபிவிருத்திக்கு! இனியாவது சிந்தித்துச் செயற்பட்டால் நன்று!

ஆடு வளங்கும் நிகழ்வில் காலாவதி திகதி அற்ற பால் பைக்கெற்

வடக்கு மாகாண விவசாய அமைச்சரால் ஏற்பாடு செய்யப்பட்ட ஆடு வழங்கும் நிகழ்வில் அங்கு வந்திருந்தோருக்கு நல்லூர் பால் சங்கத்தில் தயாரிக்கப்பட்ட காலாவதி திகதிகள் எதுவும் அச்சிடப்படாத பால்பைக்கெற் வழங்கப்பட்டுள்ளமை பலரையும் விசனத்தில் ஆழ்த்தியுள்ளது. அமைச்சருடைய நிகழ்வு என்பதால் சுகாதாரம் தொடர்பில் அக்கறைகொள்ளத் தேவையில்லை. அமைச்சர் காலாவதியான பால் பைக்கெற்றை ஒருகாலமும் எங்களுக்கு வழங்கமாட்டார் நம்பிக்கையுடன் அருந்துவோம் என்று அமைச்சர் மீதுள்ள அதீத நம்பிக்கை காரணமாக ஒருவருக்கொருவர் பேசியபடி மக்கள் அந்தப் பாலை அருந்தியமையும் குறிப்பிடத்தக்கது.