கிழக்கில் குறைந்து வரும் மாட்டு வண்டி பாவனை

கிழக்கு மாகாணத்தில் மாட்டு வண்டிப் பாவனை வேகமாக குறைந்துகொண்டு வருகிறது. இதனால் மாட்டு வண்டினை நம்பி தொழில் செய்து வந்தவர்கள் வேறு தொழில்களை தேட வேண்டிய ஒரு நிலமை ஏற்பட்டுள்ளது. இலங்கைக்கு ஒல்லாந்தர், போர்த்துகேயர் வந்த காலத்தில் கொழும்பு, காலி, யாழ்ப்பாணம், திருகோணமலை, மட்டக்களப்பு ஆகிய இடங்களில் கோட்டைகள் கட்டுவதற்கு அத்துறையில் திறமையான பறங்கிச் சமூகத்தைச் சேர்ந்த குழு ஒன்றை இலங்கைக்கு அழைத்து வந்து கோட்டைகள் கட்ட வேண்டிய இடங்களில் இவர்களை குடியமர்த்தினார்கள். கோட்டை கட்டி முடிந்ததும் அவர்கள் அந்தந்த இடங்களிலே நிரந்தரமாக இருந்து கொண்டு பல்வேறு தொழில்கள் செய்வதில் ஈடுபட்டு வந்தார்கள்.

முக்கியமாக கட்டிட வேலைகளில் ஈடுபடத் தொடங்கிய காலத்தில் முதல் முதல் மாட்டு வண்டியின் பாவனையையும் இவர்களே அறிமுகம் செய்து பிரமுகர்களை வேறு இடங்களுக்கு ஏற்றிச் செல்வதோடு, பொருட்களை ஏற்றி, இறக்கும் பணிகளிலும் ஈடுபட்டு வந்தனர்.

இப் பகுதியிலுள்ள வயல் நிலங்களில் நெல் விதைப்பதற்கு நிலத்தைப் பண்படுத்துவதற்கு இவர்களே மாடுகளைக் கொண்டு அவர்கள் செய்த கலப்பையைப் பூட்டி வயல் நிலங்களை விவசாயிகளுக்கு உழுது கொடுக்கும் வேலைகளை முதலில் ஆரம்பித்தவர்களும் இவர்களேதான். இக்காலகட்டத்தில் நாடு சுதந்திரம் பெற்றது. சுதந்திரம் பெற்றபோதிலும் எல்லா இடங்களிலும் வாகனப் புழக்கம் இல்லாததால் மாட்டு வண்டிகளுக்கு நல்ல கிராக்கி ஏற்பட்டது.

இதனால் மாட்டு வண்டிகளை தயாரிப்பதும், நீண்ட தூரத்திற்கு வண்டியை மாடு இழுத்துச் செல்வதால் மாடுகளின் கால்களுக்கு லாடன்கள் அடிக்கும் முறையையும் அறிமுகம் செய்துவைத்தார்கள். மாட்டு வண்டியின் சில்லு மரத்தினால் செய்யப்பட்டது, அது பழுதுபடாது இருப்பதற்கு ஏற்ற முறையில் அதனைச் சுற்றி இரும்பு கேடர்களும் அமைக்கப்பட்டு மாட்டு வண்டி மூலமான போக்குவரத்துத் தொழில் சிறப்பாகச் செயல்பட்டு வந்த காலகட்டத்தில் வெளிநாட்டு முதலீட்டாளர்கள் உழவு இயந்திரங்களை அறிமுகம் செய்ததால் மாட்டு வண்டிகளுக்கான தேவை இல்லாத ஒரு நிலமை ஏற்பட்டது.

மாட்டு வண்டிகளினால் செய்யப்பட்ட வேலைகளை உழவு இயந்திரமும், அதன் இணைப்பு பெட்டியும் வெற்றிகரமாக செயல்படுத்தி வந்தது. இந்த காலகட்டத்தில் இன்னும் சில வெளிநாட்டு முதலீட்டாளர்கள் வயல் நிலங்களை சேதனப் பசளைகளைப் போட்டு நிலத்தைப் பண்படுத்துவதோடு, வயல் விளைந்ததும் அதன் அறுவடையை கையோடு செய்து நல்ல விலையில் நெற்குத்தும் ஆலை உரிமையாளர்களுக்கு நெல்லை விற்று வயலிலேயே வைத்துப் பணத்தையும் பெறக்கூடிய ஒரு நிலமை தற்போது ஏற்பட்டுள்ளது. இதனால் உழவு இயந்திரக் காரர்களுக்கும் தொழில் குறைந்து கொண்டு வருவதையும் காணக் கூடியதாக இருக்கிறது.

(கலாசூரி வி.பி.சிவப்பிரகாசம், ஜே.பி)