மலையக மக்கள் வரலாற்றில் குறிப்பிடத்தக்க ஆளுமையாக திகழ்ந்தவர் சி.வி

மக்கள் பண்பாட்டுக்கழகம் சி.வி. வேலுப்பிள்ளையின் நூறாவது ஜனன தினத்தையொட்டி நடத்திய ஆய்வரங்கு கடந்த 08ஆம் திகதி ஹட்டன் சமூகநல நிறுவன மண்டபத்தில் நடைபெற்றது. மக்கள் பண்பாட்டுக்கழக அமைப்பாளர் பா. மகேந்திரன் தலைமையில் நடைபெற்ற இந்நிகழ்வில் சட்டத்தரணி எல். ஜோதிகுமார், “சி.வி பதித்துச் சென்ற இலக்கிய தடங்கள்” என்ற தலைப்பிலும் பேராதனைப் பல்கலைக்கழக தமிழ்த்துறை விரிவுரையாளர் எம். எம். ஜெயசீலன் சமகால இலக்கியத்தின் சி.வி. என்ற படைப்பிலக்கியத் தாக்கம் எனும் தலைப்பிலும் “மலையக மக்களின் வரலாற்று அசைவியக்கத்தில் சி.வியின் அரசியல் தொழிற்சங்க பணிகள்” என்ற தலைப்பில் மக்கள் பண்பாட்டுக்கழக செயற்பாட்டாளர். சு. விஜயகுமாரும் ஆய்வுக் கட்டுரைகளை சமர்ப்பித்தனர்.

இந்நிகழ்விற்கு தலைமை வகித்த மக்கள் பண்பாட்டுக்கழக அமைப்பாளர் தனதுரையில் மலையக இலக்கியத்திலும், அரசியல் தொழிற்சங்கத் தளத்திலும் மறைக்க முடியாத பங்களிப்பினை சி.வி. வேலுப்பிள்ளையவர்கள் செலுத்தினார்.

அவரின் நூறாவது ஜனன தினத்தையொட்டி ஏற்பாடு செய்யப்பட்ட இவ் ஆய்வரங்கு சி.வி பற்றிய மதிப்பீடுகளுக்கான முன்னோடி நிகழ்ச்சியாகும். இவ் ஆய்வரங்கானது மலையக இலக்கியத்தளத்தில் மாத்திரம் வைத்து அவரது பங்களிப்புகளை சிலாகித்துக்கொள்கின்ற நிலைப்பாட்டிலிருந்து விலகி இலக்கியம், அரசியல், தொழிற்சங்க செயற்பாடுகளில் சி.வியின் மக்கள் சார் பங்களிப்பு எத்தகையது என்ற மதிப்பீட்டுக்கு வருவதற்கான முயற்சியாகும்.

அதாவது, பண்பாட்டுத்தளத்தில் சி.வி அறம் சார்ந்த மனிதாபிமான நோக்கிலா, தேசிய அடிப்படையிலா, முற்போக்கு தளத்திலா, மக்கள் பண்பாட்டுத்தளத்திலா செயற்பட்டார் என்ற மதிப்பீட்டுக்கு வருவதற்கான முயற்சியாகும். இதற்கு அவர் பற்றிய புறவயமான ஆய்வு அவசியமாகின்றது.

எனவே இவ்வாய்வரங்கு சி .வியின் பங்களிப்புகளை மிகைப்படுத்துவதையோ குறைத்து மதிப்பிடுவதையோ நோக்கமாக கொண்டதல்ல. அவரின் சரியான தளத்தில் ஆய்வு செய்து அவர் பற்றி உண்மையான விடயங்களை இளந்தலைமுறையினருக்கு அறிவிப்பது காலத்தின் தேவையாகும். எனவே இன்றைய ஆய்வு தலைப்புகளில் சி.வி பண்பாட்டுத்தளத்தில் பல துறைகளிலும் ஆற்றிய பங்களிப்பினை வெளிப்படுத்தும் வகையிலும் அமையும் என்றார்.

‘சமகால இலக்கியத்தின் சி.வியின் படைப்பிலக்கியத் தாக்கம்’ என்ற தலைப்பில் உரையாற்றிய பேராதனைப் பல்கலைக்கழக தமிழ்த்துறை விரிவுரையாளர் எம். எம். ஜெயசீலன், சி.வியின் கவிதைகள் அவரது காலச் சூழலைப் பிரதிபலித்தன. சமகால கவிதை படைப்புகளில் பொருளாதார சூழலோடு மேற்கிளம் பியுள்ள பெருந்தோட்டத் தொழிற்துறைக்கு வெளியிலும் உழைப்பவர்களது பிரச்சினைகள் கவிதைகளின் உள்ளடக்கத்தில் இல்லை. கவிஞர்களின் பங்களிப்பு கணிசமாக வளர்ந்த போதிலும் அவை படைப்புக்களாக வெளிவரவில்லையென்றார்.

மேலும் நாவல் இலக்கியம் தேக்க நிலையில் இன்றிருப்பதையும் சிறுகதை இலக்கியம் வளர்ச்சியுற்றிருப்பதையும் குறிப்பிட்டு அவற்றில் சி.வியின் படைப்பிலக்கியத்தின் தாக்கம் எத்தகையது என்பதையும் விரிவாக குறிப்பிட்டார்.

சட்டத்தரணி எல். ஜோதிகுமார், சி.வியின் உழைக்க பிறந்தவர்கள் என்ற தொகுப்பில் இரு அத்தியாயங்களாக எடுத்து அவற்றில் சி.வி எதிர்காலத்தில் தொழிற்சங்கம் எவ்வாறு ஏகபோகமானதாக அமைய போகின்றது. 1940களில் இலங்கையில் தோட்டத் தொழிளார் களின் எண்ணிக்கை மிகையாக இருந்தமையினால் அது இரு நாட்டு முதலாளிகளுக்கிடையிலான ஒப்பந்த அடிப்படையில் மீண்டும் பரிமாற்றம் செய்து கொள்ளப்பட்டது என்றார்.

சி.வி பெருந்தோட்டத் தொழிற்துறையைக் கடந்து மலையக மக்களுக்கான ஏனைய தொழிற்துறைகளின் தேவையை உணர்ந்திருந்தமையை குறிப்பிட்டதுடன் பேராசிரியர் கைலாசபதி சி.வியின் இலக்கியங்கள் யதார்த்தமானது என குறிப்பிடுவது தற்செயலானதல்ல என்ற கருத்தையும் முன்வைத்தார்.

“மலையக மக்களின் வரலாற்று அசைவியகத்தில் சி.வியின் அரசியல் தொழிற்சங்க பணிகள்” என்ற தலைப்பில் மக்கள் பண்பாட்டுக்கழக செயற்பாட்டாளர் சு.விஜயகுமார் ஆற்றிய உரையில், மலையக தொழிற்சங்க பிளவுகளில் வரலாற்றையும் வெவ்வேறு கருத்தியல் கொண்ட தொழிற்சங்கங்களில் சி.வி இணைந்து செயற்பட்டமை அவரது அரசியல் நிலைப்பாட்டின் ஸ்திரமின்மையை வெளிப்படுத்துவதாக அமைகின்றது.

அடிப்படையில் ஜனநாயகவாதிகளும் சாத்வீக நடை முறைகளிலும் ஈடுபாடு கொண்ட அவரது போக்கு அரசியல், தொழிற்சங்க வாழ்விலும் வெளிப்பட்டது. எனினும் சி.வி காலத்துக்கு காலம் தான் சார்ந்திருந்த அரசியல், தொழிற்சங்க அமைப்புகளில் ஆதிக்கச் சிந்தனைக்கு உட்படாது மக்களுக்காக செயற்பட்டு மலையக மக்கள் வரலாற்றில் குறிப்பிடத்தக்க ஆளுமையாகத் திகழ்ந்தார் என்றார்.

சபையோர் கருத்துரையின் போது தொழிற்சங்கவாதியும் தொ.தே.ச தலைவராக இருந்து சி.வியுடன் சேர்ந்து பணியாற்றி யவருமான டீ. ஐயாத்துரை, சி.வியுனான தனது அனுபவங்களை வெளிப்படுத்தியதுடன் சி.வி பற்றி இதுவரை வெளிவந்துள்ள தகவல்களில் உள்ள தவறுகளை சுட்டிக்காட்டி அவர் பற்றிய சரியான தகவல்கள் வெளிகொணரப்பட வேண்டும் எனவும் கேட்டுக் கொண்டார். இலக்கியவாதி அந்தனி ஜீவா, சி.வியுடனான தொடர்புகளை நினைவுகூர்ந்ததுடன் அவர் மலையகத்தின் இணையில்லா மனிதனராக திகழ்ந்தவர். அவரை இளம் சமூகத்தினர் அறிய வேண்டிய தேவை உள்ளது என்றார்.

சட்டத்தரணி இ. தம்பையா தனது உரையில், ஆய்வரங்கில் சமர்ப்பிக்கப்பட்ட மூன்று கட்டுரைகளும் மிகவும் காத்திரமான தகவல்களை கொண்டு வந்துள்ளதாக குறிப்பிட்டார். பொதுவாக இலக்கிய கூட்டங்களில் ஒருவரை ஒருவர் புகழ்பாடும் போக்கை கொண்டிருக்கும் நிலையில் இருந்து விலகி சி.வி பற்றிய சரியான மதிப்பீட்டை வெளிகொணரும் வகையில் முக்கியமான தலைப் புகளில் ஆய்வுகள் வெளிவந்துள்ளமை வரவேற்கத்தக்கது என்றார். சமர்ப்பிக்கப்பட்ட ஆய்வுக் கட்டுரைகள் விரைவில் வெளியிட நடவடிக்கை எடுக்கப்படும் என்ற செய்தியுடன் நிகழ்வுகள் இனிதே நிறைவுற்றது.

(அருணா பொன்னம்பலம்)