ஒரு தேசிய இனத்தை வலிந்து மௌனமாக்கி

ஈழப் போரட்டத்தை தோல்வியடைச் செய்த சகோதரப் படுகொலை மிகச் சாதாரணமானதா....?

(சாகரன்)

மிக இயல்பாக சகோதரப்படுகொலையைப் பற்றியும் சகபோராளிகளின் விடுதலை உணர்வைப் பற்றியும் பேசிவிட்டு சென்று இருக்கின்றனர். என்று சகோதரப்படுகொலை ஆரம்பமானதோ அன்றுதான் ஈழ விடுதலைப் போராட்டத்தின் தோல்வியிற்கான வித்து போடப்பட்டது. இன்று ஒரு தேசிய இனத்தை படு குழியில் தள்ளி, ஏதும் அற்ற, பேசவல்ல பலவீனமான நிலையில் கொண்டு வந்து நிறுத்தியிருக்கின்றது. ஒரு சமூகத்தை அழிவுப்பாதைக்கு இழுத்துச் சென்ற சகோதரப் படுகொலையைப் பற்றி இவ்வளவு சாதாரணமாக கூறிச் சென்று விட்டனர்.

1980 களுக்கு முன்பு நாட்டைவிட்டே ஓடிய ‘ஸ்கந்தா’ போன்றவர்களுக்கு சகோதரப்படுகொலை மிகச்சாதாரணமாக இருக்கும், இருக்கலாம்.  அதன் வலி இவருக்கு புரியாது அது எங்களுக்குத்தான் புரியும் ஒரு தேசிய இனத்தின் வீழ்ச்சியின் ஆரம்ப வலிகளும், அதனைத் தொடர்ந்து இழப்புக்கும். இறுதியில் பல ஆயிரம் மக்களை வலிந்து பலி கொடுத்த இழப்புக்களின் வலிகளும் எமக்கே புரியும். ‘ஸ்கந்தா’ களுக்க புரியாது. யாழ் இந்து ‘பிளே போய்’ போன்றவர்களுக்கு இது வெறும் விளம்பர விளையாட்டு. தொடர்ந்தும் விளம்பரத்திற்காக செய்யும் ‘ஸ்ரண்ட்’ இவைகள். ஆனால் இதற்கு தமிழ் பேசும் மக்கள் கொடுத்த விலை மிகப் பெரிதாகும்.

இன்று தமிழ் பேசும் மக்கள் கொடுப்பதை வாங்கிக் கொண்டு அல்லது கொடுக்காவிட்டால் வாய் மூடி மௌனியாக இருக்க வேண்டிய நிலமைகளை ஏற்படுத்திய சகோதரப்படு கொலைக்கு எண்ணை ஊற்றி வளர்த்தெடுத்த இன்னாள் தமிழ்பிரித்தானிய தமிழர் பேரவையும், நாடுகடந்த தமிழீழ அரசியின் பிரதிநிதிகளும் முதலில் மக்கள் மன்றங்களில் தமக்கான தண்டனைகளை ஏற்று பொது வாழ்விலிருந்து ஒதுங்கியிருத்து உடல் உழைப்பில் ஈடுபட்டு தமது குடும்பத்தை அந்தப் பணத்தில் காப்பாற்ற வேண்டும். இதுவே அவர்கள் முதலில் செய்யவேண்டிய வேலைகள்.

இதனை உறுதி செய்ய இராமராஜ் போன்றவர்கள் வழி வகைகள் செய்ய வேண்டும். அதனை விடுத்து இமாலயத் தவறுகளை சும்மா சமாளித்து விட்டு போகும் மேடைப் பேச்சுக்களுக்கு இடம் தராதீர்கள் ‘இராமராஜ்’ களே. எங்களுக்கு புரிகின்றது உங்கள் ' தேசிய’ உணர்வுகள். மீண்டும் பொன்னம்பலத்தார், செல்வநாயகத்தார் காலத்து 'தேசிய' உணர்வைத்தான் நாம் அண்மையில் நடைபெற்ற உள்ளூராட்சித் தேர்தல் பிரச்சாரத்தில் நாம் பார்தோம். இப்படியே போனால் இன்னுமொரு முள்ளிவாய்காலுக்கு நாம் 30 வருடங்கள் காத்திருக்க வேண்டியதில்லை. வெறும் 3 வருடங்கள் போதும். இதனைச் செய்து முடிக்க இன்னமும்இலங்கை அரசில் பலர் உள்ளனர். இதனைச் செய்து முடிக்க எம்வர் தரப்பில் ' தேசியம்' என்ற பெயரில் செய்ய முயலுகின்றார்கள்  இன்றும் பலர். பாவம் மக்கள்......?

(சாகரன்) (சித்திரை 12, 2011)