என் மனவலையிலிருந்து........

நீதி கேட்போம் எங்கள் மகளின் கொலைக்கு.....!

(சாகரன்)

'எனது மகள் கொல்லப்பட்டுள்ளார்' - மகள் கொன்சலிற்றா பற்றி நீதிமன்றத்தில் தந்தை சத்திய வாக்கு மூலம்.

'மருந்து வாங்கி தாருங்கள் என்று பாதிரியாருடன் தொலை பேசியில் கெஞ்சினாள்' - மகள் கொன்சலீற்றாவின் தாயின் கண்ணீர் வாக்கு மூலம்.

யாரங்கே.....! அழைத்து வாருங்கள் மன்னார் அருள் தந்தை இராயப்பு ஜோசப்பை. இசைப்பிரியா, பிரபாகரன் கொலை வகையறாக்களுக்கு உள்ளுரிலும், சர்வதேச அரங்கிலும் உரக்க குரல் எழுப்புபவரை, இக்கொலைக்கும் குரல் எழுப்ப.

யாரங்கே.....! அழைத்து  வாருங்கள் அருள் தந்தை தோமஸ் சௌந்தரநாயகத்தை. தனது கோவில் பற்றில் அவர் கண்காணிப்பு எல்லைக்குள் நடைபெற்ற கொலையைக்கு விளக்கம் கூற.

யாரங்கே......! அழைத்து வாருங்கள் சுரேஸ் பிரேமசந்திரனை. 'கோவில் பூசாரியை கொலை செய்தேன் அது கயவர்களின் கூடாரமாக மாறக் கூடாது என்பதற்காக.....' என புலம் பெயர் தேச மக்களுக்கு மயிர் கூச்செறியச் செய்யும் வீர முழக்கம் பேசும் தமிழ் பேசும் பாராளுமன்ற ஆயுள்? பிரதிநிதியை. இந்தக் கொலைக்கு சிவப்பு விளக்கம் கூற.

யாரங்கே......! அழைத்து வாருங்கள் கிளிநொச்சி மக்கள் என்று பிரதேசவாதம் பேசும் புலிகளின் ஆசீர்வாதம் பெற்ற தமிழ்த் தேசிக் கூட்டமைப்பு பாராளுமன்ற உறுப்பினர் சிறீதரனை. முள்ளிவாய்கால் கொலைகளில் குளிர் காய்ந்து பாராளுமன்ற நாற்காலியில் அமர்ந்து கொண்டு சங்கரியின் பாராளுமன்ற கனவுகளை இல்லாமல் செய்தவரை. வெள்ளைப் பாவாடைக்கு நீதிவழங்க.....?

யாரங்கே.......! அனந்தி எழிலனை ஐ கூட்;டி வாருங்கள் தனது கணவனின்; ஆள்கொணர்வு மனுவிற்காக வட மாகாண சபைக்கு அப்பால், ஐ.நா. வரை சென்று நீதி கேட்ட வீரவேங்கையின் துணைவியை. நீதி கேட்போம் இந்தக் கொலைக்கும்.

யாரங்கே....! அழைத்து வாருங்கள் எங்கள் வடமாகாண முதல் அமைச்சர் சி. விக்னேஸ்வரனை. வாழும் காலத்தில் நீதி அரசராக இலங்கை அரசிற்கு சேவகம் செய்து ஓய்வுகால பொழுது போக்கிற்காக முதல் அமைச்சர் பதவியை பரிசாக பெற்ற நவீன நீதிமானை. நீதி மன்றங்களில் வழங்கிய தீர்ப்புக்களைப் போல் அவரின் குறுநிலத்தில் நடந்த கொலைக்கும் தீர்ப்பு வழங்க.

யாரங்கே..........!  எடுத்து  வாருங்கள் டக்ளஸ் தேவானந்தாவின் இக்கொலைக்கான  தீர்ப்பை. '....இனிமேல் (மாதாக்)கோவில்களில் தோத்திரப் பாடல்கள் பாடுவதற்கு இளம் பெண்களை அனுமதிக்கக் கூடாது. முதியவர்களை மட்டுமே அனுமதிக்க வேண்டும்....' என்று பெண்களை அடுப்பங்கரைக்குள் தொடர்ந்தும் அடைத்து வைக்கும் தீர்ப்பு கூறியவரை.

சரி இவர்கள் போதவில்லை என்றால் நவீன இராமர் நரேந்தர மோடியை அழைத்து வாருங்கள். குஜராத்தில் இர்ஷாத் ஜகான் இன் மரணத்தைக் கொண்டாடி நாளைய பாரதப்பிரதமர் என்று கனவு காணும் இந்து வெறியரை. அபிவிருத்தியில் முதலிடமாக யாழ்ப்பாணத்தை(மன்னிக்கவும் ஏதோ பழக்க தோஷத்தில் ஆரம்பித்துவிட்டேன்.... தனது தள்ளாத வயதில் தற்போதுதான் தனது திருமணம் பற்றி ஒப்புக் கொண்டவரை. இந்தக்கொலைக்கு காங்கிரஸ்காரர்தான் காரணமம...? என்பதைக் கண்டறிய......?

இதுவும் முடியவில்லை என்றால் ஐநா வின் மனித உரிமை ஆணையாளர் நவநீதம்பிள்ளையிடம் முறையிடுங்கள். இவர் நேட்டோ தலைவன் அமெரிக்காவிடம் ஆலோசனை பெற்று எங்கள் மகள் கொன்சலீற்றாவின் கொலைக்கு தீர்ப்பு வழங்குமாறு.

சரி யார் இல்லாவிட்டாலும் போராட்டம் நடாத்த அழைத்துவாருங்கள் பெண்கள் விழிப்புணர்வு அரங்கத்தை சர்வதேச பெண்கள் தினத்துடன் நின்றுவிடாமல் எமது மகள் கொன்சலீற்ரா விண் மரணத்திற்கு நீதி கேட்டு போராடுவதற்கு.....!

எங்கே ஐயா....! இந்த நீதி போய்விட்டது. எங்கே ஐயா......? 

மக்களே சிந்தியுங்கள்...! நீங்கள் விழிப்படையாதவரைக்கும் வீழ்ந்து கிடக்கப்போவது நீங்கள்தான். எமக்கு சமநீதி வழங்க இலங்கை பௌத்த பேரினவாதம் முன்வரப்போவதில்லை என்ற கூக்குரலுடன் நானும் இணைந்து கொள்கின்றேன் என்றும் போல இன்றும்.

(சாகரன்) (ஏப்ரல் 25, 2014)