என் மனவலையிலிருந்து……

யதீந்திரா போன்றவர்களுக்கு ஒரு பகிரங்க மடல்

(சாகரன்)

‘……சம்பந்தன் ஐயா கூட தன்னுடைய நாடாளுமன்ற உரையில் (ஆங்கிலத்தில்) விடுதலைப் புலிகளின் போட்டுத் தள்ளும் பட்டியிலில் தான் இருந்ததாக குறிப்பிட்டிருக்கின்றார். ஆனால் அப்படிப்பட்ட ஐயாவையே பின்னர் பிரபாகரன் தனது அரசியல் காய்நகர்த்தலுக்குள் உள்வாங்கிக் கொண்டார். நான் கிளிநொச்சியில் சில அரசியல் கலந்துரையாடல்களின் பங்குகொண்ட சந்தர்ப்பங்களில் அங்கிருந்த சில மூத்த போராளிகள், ஐயாவை “ஆள் பெறுமதியானவர் தான்”, என்று சொல்லியதை கேட்டிருக்கிறேன். ஏன் பிரபாகரன் மிகவும் பலம் குன்றியிருந்தவர்களை அரவணைத்துச் செல்ல வேண்டும்?.........’ - யதீந்திரா,

இவர் கருத்தில் பல முரண் நகையிருக்கின்றது. தமிழ் தேசியக் கூட்டமைப்பு மேலெழுந்தவாரியாக பார்த்தால் ‘கூட்டமைப்பு’ அல்லது பல கட்சிகளின் ‘இணைப்பு’ ஏன் ‘ஐக்கியம்’ என்று கூட்டமைப்பினரால் கூறப்படுவது போல் தோன்றும். முதலில் இதற்கு வெளியில் கூட பல ‘பலம்’ வாய்ந்த கட்சிகள், அமைப்புக்கள் இருக்கின்றன. இவற்றை உள்வாங்க, இணைத்துக் கொள்ள  தமிழத் தேசியக் கூட்டமைப்பினர் எப்போதும் தயாராக இருக்கவில்லை.

மற்றது தமிழ்த் தேசியக் கூட்டமைப்பில்  தமிழரசுக் கட்சியின் ஏகபோகமே நிலவுகின்றது. இன்னும் சிறப்பாக ஆயுதம் கையில் இல்லாத பிரபாகரனாகவே சம்மந்தர் செயற்படுகின்றார். இதனை தமிழ்த் தேசியக் கூட்டமைப்பில் உள்ள பலரும் பயத்தின் காரணமாக வெளியில் சொல்லாமல் தவிர்த்து வருகின்றனர். தமிழ்த் தேசியக் கூட்டமைப்பு ஒரு ‘ஐக்கிய முன்னணி’ என்பதற்கான எந்த அடிப்படைகளையும், தார்பரியங்களையும் தன்னகத்தே கொண்டிருக்கவில்லை. மற்றது இதில் இணைந்திருக்கும் ஏனையவர்கள் இதனை விட்டால் பதவி கிடைக்காது என்பதற்காக தொங்கிக்கொண்டு நிற்பவர்களே ஒழிய கொள்கையை விட இவர்கள் கொள்ளைக்காக அரசியலில் ஈடுபடுபவர்கள். சாராம்சத்தில் தேர்தல் என்றும், பதவி என்றும் ஒன்று இல்லாவிட்டால் இவர்கள் சாக்கில் கட்டிய உருளைக் கிழங்கு போல் அவிழ்த்து விட்டதும் தனித் தனியாக போய்விடுவார்கள்.

தமிழ் தேசியக் கூட்டமைப்பிடம் இருப்பது தமிழ் இனப் பற்று அல்ல தமிழ் தேசிய வெறி. தமிழ்த் தேசியம் என்ற அடையாளம், தமிழ்த் தேசியத்தின்பால் பற்று உறுதி என்பவை வேறு தமிழ் இன வெறி என்பது வேறு. செந்தமிழர் இயக்கத்தின் வி.பொன்னம்பலம் செந்தமிழர் இயக்கத்திலிருந்து தமிழர் விடுதலைக் கூட்டணியில் கலந்தபோது கூறிய நியாயங்களை ஒத்ததாகவே யதீந்திராவின் கருத்துக்கள் இருக்கின்றனர். சகல தரப்பினரையும் அணைத்து, இணைத்து உண்மையான ஐக்கியத்தை ஏற்படுத்தி செயற்படுதல் என்பது தமிழ் காங்கிரஸில் இருந்து இன்று தமிழ் தேசியக் கூட்டமைப்பு வரைக்கும் ஒரேமாதிரியான அணுகு முறையை, செயற்பாட்டையே கொண்டிருக்கின்றது. இங்கு ஏகபோகம் என்ற கருத்தியல் செயற்பாடே முன்னிலை பெற்றிருக்கின்றது.

இதுவே பிரபாகரன் புலிகளைத் தவிர ஏனையவர்களை இல்லாமல் செய்ய முயற்சித்ததன் அரசியல் காரணம். வட்டுக் கோட்டைத் தீர்மானத்திலிருந்து (இதற்கு முன்பும் கூறலாம்)இன்று வரை இதுதான் ‘கடைசி பஸ்’ என்று மக்களை நம்பவைத்து வாக்குகள் பெற்று பின்பு தேர்தலில் வென்ற பின்பு மக்களுக்கு வேட்டு வைத்ததைத் தவிர வேறு எதையும் இந்தத் தமிழரசுக் கட்சியின் பாராளுமன்ற வழித் தோன்றல்கள் செய்யவிலலை என்பதை யதீந்தரா போன்றவர்கள் கவனிக்கத் தவறிவிட்டனர் அல்லது தெரிந்தும் தெரியாதது போல் நடிக்கின்றனரோ தெரியவில்லை. வி. பொன்னம்பலம் தமிழர் விடுதலைக் கூட்டணியில் கற்ற பாடத்தை தேர்தலின் பின்பு யதீந்திரா கற்கப் போகின்றார் என்பதே என்பார்வை.

இணைந்த வடக்கு கிழக்கு மாகாண சபையின் தலைநகரத்தை, மகாண சபையை திருகோணமலையில் நிறுவிய தைரியமான தீர்க்கதரிசனமான நகர்வைத் தவிர வேறு எதனையும் திருகோணமலையில் எங்கள் பிரநிதித்துவத்தை, இனப் பரம்பலை தக்கவைக்க சிறந்த முடிவை இராமநாதன் காலத்திலிருந்து இன்று வரை யாரும் முன்னெடுக்கவில்லை என்பதே என்பார்வை. இதனை வைத்துக் கொண்டு நான் ஈபிஆர்எல்எவ் காரன் என்று குழுவாதத்திற்குள் என்னை மூழ்கடித்து உண்மைகளை பார்க்கத் தவறினால்  தமிழ் மக்கள் இனி யாழ்பாணத்திலும் மெல்லச் சாவதை யாராலும் தடுக்க, தவிர்க்க முடியாது. இது எற்கனவே திருமலையிலும் மட்டக்களப்பிலும் உலர்ந்து உதிரத் தொடங்கி ஒரு தசாப்பத்திற்கு மேலோகிவிட்டது. அம்பாறையைப் பற்றி பேசவே தேவையில்லை. பேரினவாத அரசு இதனையே செய்ய முற்படும் இதனைத் தடுத்து நிறுத்துவதில் நாம் தவறி விட்டோம். தோடர்ந்தும் தவற விடுகின்றோம்.

பிரபாகரன் பலமான நிலையில் இருந்து கொண்டு ஏன் சம்மந்தரை அழைத்தார் என்பதற்கூடாக சம்மந்தர் ‘பலமாக’ இருந்தார் என்பதை நிறுவ முற்படுதல் அல்லது சம்மந்தர் ‘சாணக்கியர்’ என்று கூற முற்படுவதை போன்ற நகைச்சுவையான காரணம் ஏதும் இருப்பதாக பார்க்க முடியவில்லை. இதே மாதிரியான அணுகு முறையை இலங்கை இந்திய ஒப்பந்தத்தை தொடர்ந்த பாராளுமன்றத் தேர்தலில் பிரபாகரன் பாலகுமாரின் ஈரோஸ் ஊடாக செய்தது எல்லாம் தான் புக முடியாத இடத்தில் தனது கையாளாக உளவு பார்க்க ஒருவர் தேவை என்பதற்காவே வேறு எந்த வகையிலும் அல்ல. இந்த வகையை ஒத்ததே பிரபாகரனால் படைக்கப்பட்ட தமிழ்த் தேசியக் கூட்டமைப்பின் உதயம் ஆகும்.

தமிழ்செல்வனுக்கு முன்பு மாதம் மாதம் சம்மந்தர் தொடக்கம் சுரேஷ் வரைக்கும் கை கட்டி வாய் பொத்தி ஏன் எல்லாவற்றையும் பொத்தியிருந்ததே இவர்கள் செய்தது. வாய் திறந்தால் நான் கூறத் தேவையில் சம்மந்தரிடம் அல்லது சுரேஷ் இடம் கேட்டுப்பாருங்கள் என்ன நடந்திருக்கும் என்று. எனவே யதீந்திரா விடயங்களை அலசி ஆய்ந்து பார்க்கும் பக்குவம் உள்ள உங்களுக்கும் வி. பொன்னம்பலத்தின் நிலை ஏற்பட்டு நொந்து கூனிக் குறுகி எதிர்காலத்தில் நிற்பதை முன்கூட்டியே அறியத் தருவதற்காகவே இதனை எழுதுகின்றேன் இதனை. மற்றயப்படி நான் மிகவும் சாதாரணமானவும் அறிமுகங்கள் ஏதும் அற்ற பிரபல்யம் அற்றவன். ஆனால் தீர்க்க தரிசனம் உள்வன். மகாத்மா காந்தி கூறிய முது மொழிளைவிட சிறந்து முதுமொழிகளை கூறியவர்கள் பலர் பிணம் தாக்கும் சுடலையில் வேலை செய்தவர்களாக இருக்கலாம். இந்த ‘அடையாளம்’ அற்றவர்களின் வார்த்தைகள் உலக மொழியாக வராமல் போயிருக்கலாம்;. ஆனாhல் வாய்மைகள், தீர்க்க தரிசனங்கள் அவை அவையாகவே இருந்துவிட்டு போயிருக்கின்றன. என் வார்த்தைகளும் அப்படி இருந்துவிட்டுத்தான் போகட்டுமே!

(சாகரன்) (ஆகஸ்ட் 14, 2015)

(இக்கட்டுரையில் யதீந்திரா என்ற பெயர் குறியீட்டு அடிப்படையில் என்னால் கையாளப்பட்டது)

அமைதி சமாதானம் ஜனநாயகம்

www.sooddram.com