(தோழர் ஜேம்ஸ்)

சாந்தி மனோராஜசிங்கம் என்று எங்களால் அறியப்பட்ட சாந்தி பிற்காலத்தில் பலராலும் சாந்தி சச்சிதானந்தம் என்று அறியப்பட்டவர். 1984ஃ85 களில் யாழ்ப்பாணத்தின் செம்மண் பிரதேசங்களில் கூலி விவசாயிகள் மட்டத்தில் அரசியல் வேலைகள், அரசியல் கருத்தரரங்குகளில் எனக்கு மிகவும் பரீட்சயமானவர். எனது சக தோழியும் தற்போது என் வாழ்கைத் துணையாக பயணிக்கும் தோழர் அஞ்சலியுடன் இணைந்து கிராமத்துப் பெண்கள் மட்டத்தில் அரசியல் வேலை செய்தபோது நானும் இணைந்து செயலாற்றியது இன்றும், இன்னமும் பசுமையாக மனத்தில் இருக்கின்றது.

கிடைக்கும் எந்த வசதிகளிலும் தன்னை இயவாக்கம் அடைய வைத்து செயற்படும் இவரின் தன்மை என்னை இவர்பால் திரும்பிப் பார்க்க வைத்தது. தைரியமான பெண் மாத்திரம் அல்ல, திறமையான பெண்ணும் கூட.
ஆணும் பெண்ணும் இணைந்து ஒரு பொது கருத்திற்காக, பொதுத் தளத்தில் வேலை செய்வதில் எந்த சங்கோஜமும் இல்லாமல் செயற்படும் பண்புமிக்கவர். அதுவும் அன்றைய யாழ்ப்பாணச் சூழலில் இதனை நான் அனுபவரீதியாக உணர்ந்தவன். மனோ இராஜசிங்கம் ஈபிஆர்எல்எவ் இன் உறுப்பினராக செயற்பட்ட காரணத்தினால் ஈபிஆர்எல்எவ் உடனும் இதன் பெண்கள் அமைப்பான ஈழப் பெணகள் விடுதலை முன்னணியுடனும் நெருக்கமாக செயற்பட்டவர். ஏன் இதன் பெண்கள் அமைப்புடன் இணைந்து செயற்பட்டவர் என்று எம்மால் பார்க்கப்பட்டவர்.

அன்னையர் முன்னணி போன்ற வெகுஜனத் தளங்களில் சிறப்பாக செயற்பட்டவர். புலிகளின் தன்னாதிக்க காலத்தில் மட்டக்களப்பை மையமாக வைத்து செயற்பட்ட இவரின் தன்னார்வ தொண்டு நிறுவனம் பற்றிய விமர்சனங்களும், புலிகளுடனான சமரசப் போக்கும் விமரசனங்களுக்குள் உள்ளானதும் இங்கு பதிவு செய்யப்பட்டே ஆக வேண்டும். மேலும் கிராமிய மட்டத்து பெண்களுடன் அரசியல் வேலைகள் செய்தாலும் தனது பிள்ளைகளைப் பெற்றெடுப்பதற்காக ஒவ்வொரு தடவையும் இலண்டன் பயணமானதை மட்டும் என்னால் புரிந்து கொள்ள முடியவில்லை.

மத்திய தர வர்க்கத்தில் பிறந்த புத்திஜீவிகளுக்குரிய ‘இயல்பான’ குணாம்சமாக இதனைப் பார்பது சரியானதோ என்பதை விவாதத்திற்கே விட்டுவிடுகின்றேன். வீட்டிற்கள் ஒடுங்கி இராமல் தொடர்ச்சியாக சூழலுக்கு ஏற்ப தன்னை மாற்றியமைத்து தொடர்ந்தும் மக்களுடன் நின்றவர் குரல் எழுப்பியர் என்றவகையில் இவரின் மரணம் இழப்புத்தான். புலிகள் மாற்றுக் கருத்தாளர்களை செயற்பட விடாமல் குரல் வளையை நெரித்த போது, வட பகுதிக்கான பயணங்கள் முற்றாக அறுபட்ட நிலையில் கொழும்பின் தனது வாழ்விடத்துடன் தொடர்பு படக் கூடிய மட்டக்களப்பை தனது பொது வேலைக்கான தளமாக தெரிவு செய்ததலிருந்து தொடர்சியாக மட்டக்களப்பில் மூவின மக்கள் மத்தியிலும் தன்னார்வுத் தொண்டர் நிறுவனங்கள் ஊடாக தனது சேவையை வழங்கியிருந்தது இங்கு கவனிக்கத்தக்கது.

 பொதுவாக தன்னார்வ நிறுவனங்கள் அமெரிக்க, மேற்கத்திய அரசுகளின் கை கூலிகள் என்ற விமர்சனங்கள் இவரை நோக்கி எழுந்ததும் இங்கு கவனிக்கத் தக்கது. கூடவே ஈழவிடுதலை அமைப்புக்களுடன் தொடர்பில் இருந்தவரகள் அல்லது ஈழவிடுதலைப் போராட்டம் நடைபெற்ற பிரதேசங்களில் இலங்கை அரசின் செயற்பாடுகளுக்கு எதிரான நிலைப்பாட்டை உடையவர்கள் காணாமல் போதல் அல்லது கைது செய்யப்படுதல், கொலை அச்சுறுத்தல்களுக்கு உள்ளாகுதல், கொலை செய்யப்படுதல் என்பனவற்றைத் தாண்டி கொழும்பு வாழ்வையும், கொழும்பை மையமாகவும் வைத்து இவரின் செயற்பாடுகள் அமைந்தது என்பது மிகுந்த சவாலானதாகும். இதற்கு இவரின் சர்வதேசத் தொடர்புகள் இவரைக் காப்பாற்றியதற்கு முக்கிய காரணியாக அமைந்தன எனலாம்.

சாதாரண பாமர மக்களுக்கு கிடைக்காத விசேட நிலமைகள் இவர் போன்றவர்களுக்கு கிடைக்கப் பெற்றது கவனத்தில் கொள்ளப்பட வேண்டிய ஒன்றாகும். இலங்கைச் சூழலில் அதுவும் யாழ்பாணத்துச் தமிழ் சூழலில் பிறந்த ஒரு பெண்.   ஒரு தாய் தனது பெரும் பகுதியை சமூகச் செயற்பாடடிற்காக அர்பணித்த தைரியத்தை, முற்போக்குத் தன்மையை பாராட்டியே ஆகவேண்டும். இந்த வகையில் இவரின் மரணம் இவரின் குடும்பத்திற்கு அப்பால் யாவருக்கும் மனத்தின்பால் சஞ்சலத்தை ஏற்படுத்தியே இருக்கின்றது.
(தோழர் ஜேம்ஸ்)

அமைதி சமாதானம் ஜனநாயகம்

www.sooddram.com