(சாகரன்)

போர் முடிந்து விட்டது. ஆயுதங்கள் களையப்பட்டுவிட்டன. தேர்தல் நடத்தபட்டது. தேர்தலில் மக்கள் தமது தீர்பையும் வழங்கிவிட்டனர். மூன்றில் இரண்டு பெரும்பான்மை பலமும் பெற்றாகிவிட்டது மத்தியிலும், மகாணத்திலும். அதிகாரங்கள் மறுக்கப்படுகின்றன. இராணுவம் இன்னமும் இருக்கின்றது. பணம் தருகின்றார்கள் இல்லை. இணக்க அரசியல் மூலமே அதிகாரங்களை சிறுக சிறு பெறமுடியும். கிடைத்த அதிகாரங்களை சரியாக பயன்படுத்துகின்றார்கள் இல்லை. ஒதுக்கப்பட்ட நிதியினை முழுமையாக பயன்படுத்தாமையினால் மீண்டும் திறைசேரிக்கு திரும்பி செல்கின்றது ஒதுக்கப்பட்ட பணம். மக்களிடம் பொய் வாக்குறுதிகளை வழங்கி தேர்தலில் வென்றிருக்கின்றனர். வாக்குறுதிகளை நிறைவேற்றுவதற்கு பொருத்தமான போராட்டங்களை, இராஜதந்திர அணுகுமுறைகளை கையாளுகின்றனர் இல்லை. சொகுசு வாகனங்களை மட்டும் தமக்கு மத்திய அரசிடம் இருந்து பெற இணக்க அரசியல், உறவுகள் செய்கின்றனர். ஆயுதங்களுடன் நடமாடுகின்றனர் என்று இரு தரப்பும் பல குற்றச்சாட்டுக்களை முன்வைக்கின்றன.

இவற்றில் உண்மைகளும் இல்லாமல் இல்லை. ஆனால் மக்களால் தெரிவு செய்யப்பட்ட இவர்கள், ஆயுதங்களை களைந்து ஜனநாயகப் பாதைக்கு திரும்பிய இவர்களின் செயற்பாடுகளில் வன்முறையும், காழ்ப்புணர்ச்சியும் மேலோங்கி இருக்கினறன. மக்கள் இவற்றைத் தவிர்த்த பக்குவப்பட்ட பிரதிநிதிகளை இனம் கண்டு தெரிவதில் தோற்றுப் போய்விட்டார்கள் என்றே எண்ணத் தோன்றுகின்றது. சாமி வேடம் போடும் முதல் அமைச்சராலோ அல்லது மக்கள் சேவை செய்கின்றேன் என்று கூறும் தேவானந்தாவாலோ தனது அமைப்பினரை, கட்சியினரை, அமைச்சர்களை, பாராளுமன்ற, மகாணசபை உறுப்பினர்களை கட்டுப்படுத்த முடியவில்லை. ஏதிர்? துரப்பினரை கையாளத் தெரியவில்லை.

இவர்கள் எல்லோருக்கும் வயது இரண்டு கழுதை வயதைத் தாண்டி விட்டது. ஆனாலும் யாருக்கும் இந்த வயதிற்குரிய மனப்பக்குவம் இருப்பதாக தெரியவில்லை. நான் முன்னாள் புலிகளின் உறுப்பினர், அல்லது அதன் தீவிர ஆதரவாளன். நான் முன்னாள் புலிகளுக்கு எதிராக ஆயுதம் ஏந்திய ஈபிடிபி உறுப்பினர் என்பதற்கு அப்பால் சிந்திக்க இவர்களால் முடியவில்லை, செயற்பட முடியவில்லை. மக்கள் இவர்களை தமது பிரநிதிகள் என்று தெரிந்து விட்டு சும்மா பார்த்துக்கொண்டு இருக்கின்றனர். மத்திய அரசோ அடிபடும் அளவிற்கு அடிபடுங்கள், அப்போதுதான் நாம் எமது அரசிலை ஆட்சியை அதிகாரத்தை உங்கள் மீது திணிக்கலாம் என்று ஆளும் கட்சி வேட்பாளரும், எதிர்கட்சிகளின் பொது வேட்பாளரும் கொடுப்புக்கள் சிரித்த வண்ணம் உள்ளனர்.

மந்திரி சபையில் உள்ள அனேகரும் பொருள் ஈட்டும் அல்லது தற்புகழ் ஈட்டும் காரியவாதிகளாக மட்டுமே செற்படுகின்றனர். மக்களின் நலன்களை முன்னிட்டு பொது வாழ்விற்குள் புகுந்தவர்கள் அல்ல என்பது போன்ற செயற்பாட்டையே கொண்டிருப்பதை இவர்களின் செயற்பாடுகள் காட்டி நிற்கின்றன. இவர்களில் பலர் என்னுடனும் போராட்ட களத்தில் நின்ற உறுப்பினர்கள் அல்லது என் மாணவர்கள் அல்லது என் சகாகக்கள், பாடசாலை நண்பர்கள். இவர்களின் சாயம் அன்றும் தெரியும், இன்று வெளுத்த பின்பும் தெரியும். எனவே இந்த யுத்தத்தை தமிழ் மக்களே நிறுத்த முடியும், நிறுத்த வேண்டும் இதற்கான தார்மீகப் பொறுப்பு மட்டும் அல்ல வரலாற்று கடமையும் இவர்களுக்கே உள்ளது.

மக்கள் சேவையை முன்னிறுத்தும் உறுப்பினர்களை இனம் காணுங்கள். இனிமேலாவது அவர்களை உங்கள் பிரதிநிதிகளாக தெரிவு செய்யுங்கள். இணைந்த வடக்கு கிழக்கு மாகாணசபை அனுபவத்தில் நாம் இந்தக் குடும்பிப்பிடிச் சண்டையைக் காணவில்லை. உடனே வலுக்கட்டாயமாக படையில் சேர்த்ததை மிகைப்படுத்தி கூறுவீர்கள். இதில் அணுகு முறைத் தவறு உண்டு. இதற்கான வருத்தத்துடன் கூடிய சுயவிமர்சனங்களை ஏற்றுள்ளனர் சம்மந்தபட்டவர்கள். கூடவே இந்தப் படை எமது மக்களை காப்பாற்றுவதற்காக  உருவாக இருந்த மக்கள் பாதுகாப்பு படை. ஆனால் பிரேமதாசாவும், பிரபாகரனும் தங்களின் இருப்புக்காக இதனைத் திரித்து வாசித்ததே உண்மை.

மக்களும் இந்தப் படையில் இணைந்தால் தமது பிள்ளைகளை புலிகள் கொன்றுவிடுவார்கள் என்று பயந்தே இதனை விரும்பவில்லை. புலிகளின் முழுப்பிரசன்ன காலத்தில் இப்படையில் இணைந்தவர்களுக்கு புலிகள் வழங்கிய தண்டனையை யாவரும் அறிவர். இதன் சாட்சியங்கள்தான் துணுக்காய் வதை முகாமும், புலிகளின் முதல் வகை தொகையில்லா தடையங்கள் இல்லாத கொலைகளும். இனிமேலும் இவை வேண்டாம், பதவிகளை தக்கவைக்க மக்களை பணயம் வைக்கும் இந்த வேததாரிகளை மக்கள் நிராகரிக்காவிட்டால் இந்த தமிழ் இனம் செத்தேதான் போகும்? வேறு என்ன சொல்ல……?

(டிசம்பர் 16, 2014 யாழ்பாணத்தில் நடைபெற்ற யாழ்.மாவட்ட ஒருங்கிணைப்புக்குழுக் கூட்டத்தில் தமிழ்த் தேசிய கூட்டமைப்பு உறுப்பினர்களுக்கும் ஈழமக்கள் ஜனநாயகக் கட்சி உறுப்பினர்களுக்கும் இடையில் வாய்த் தர்க்கம் இறுதியில் கைகலப்பாக மாறியது. இதனால் தொடர்ந்து கூட்டத்தை நடத்த முடியாமல் நிறுத்தப்பட்டது. இச்சம்பவம் என்னை இக்கட்டுரையை வரையத் தூண்டியது)
(சாகரன்)(Dec 17, 2014)

அமைதி சமாதானம் ஜனநாயகம்

www.sooddram.com