தெற்கில் மைதிரி தோல்வி!  வடகிழக்கில் மகிந்த தோல்வி!!

ஆனால் இலங்கையின் புதிய ஜனாதிபதியாக மைதிரி வெற்றி!!!

(சாகரன்)

நடந்து முடிந்த தேர்தலில் தென் இலங்கையில் சிறப்பாக பெரும்பான்மை சிங்கள மக்கள் மகிந்த ராஜபக்ஷவை தேர்தெடுத்து வெற்றி பெற வைத்துள்ளனர். மாறாக அத்தனகலை ஈறாக இப்பகுதிகளில் மைதிரி சிறிசேனாவை தோற்கடித்துள்ளனர். மாறாக மைதிரியை வடக்கு, கிழக்கு, மலையகம் போன்ற பகுதிகளில் சிறப்பாக சிறுபான்மை மக்கள் செறிந்து வாழும் பகுதிகளில் வெற்றியடைய வைத்துள்ளனர்.(பார்க்க அருகில் உள்ள வரைபடத்தை)(பார்க்க பெட்டிச் செய்தி) இதன் மூலம் முழு இலங்கையிலும் மைதிரி வெற்றி பெற்று புதிய 7வது ஜனாதிபதியாக வெற்றியடைந்திருக்கின்றார். இதே போன்ற செயற்பாட்டையே கடந்த ஜனாதிபதித் தேர்தலில் மகிந்தா, சரத் பொன்சேகா போன்றவர்கள் பெற்றிருந்தனர் என்பது கவனிக்கத்தக்கது.

இதற்கு முந்தைய ஜனாதிபதித் தேர்தலில் மகிந்தாவிடம் காசை வாங்கிக்கொண்டு வடக்கு, கிழக்கு மக்களை தேர்தலில் பங்குபற்றாமல் தடை செய்திருந்தனர் புலிகள். இறுதியில் இலங்கை முழுவதற்குமான தேர்தல் முடிவுகள் மகிந்தாவை இரு முறையும் வெற்றி பெற வைத்துள்ளது. இதே மாதிரியான அனுபவங்கள் சந்திரிகாவின் வெற்றிகளிலும் உண்டு. ஆக மகிந்தாவின் கடந்த கால வெற்றிகளும், தற்போதைய தோல்விகளும் சிங்கள மக்களால் மட்டுமே தீர்மானிக்கப்பட்டது. இம்முறை மைதிரியின் வெற்றிக்கு பலம் சேர்த்தது ஏன் தீர்மானகரமான சக்திகளாக இருந்தது என்னமோ சிறுபான்மையினரின் வாக்குகளே.

தனது வெற்றிக்கு முக்கிய காரணமாக அமைந்த இந்த சிறுபான்மை மக்கள் இலங்கைத் தீவில் சம உரிமை பெற்று வாழ்வதை உறுதிப்படுத்துவதிலேயே மைதிரியின் வருங்கால வெற்றிகள் அமையப்போகின்றது. உங்களின் வெற்றிக்கு நன்றிக் கடனாக நீங்கள் இதனைச் செய்யவேண்டும் என்ற எதிர்பார்புடன் இங்கு நாம் இதனை குறிப்பிடவில்லை. மாறாக சிறுபான்மை மக்கள் உங்கள் மீது எவ்வளவு நம்பிக்கை வைத்திருக்கின்றார்கள் என்பதை நீங்கள் சீர்தூக்கிப்பார்க்க வேண்டும் என்ற அடிப்படையில் மட்டுமே இங்கு இதனை பதிவு செய்கின்றோம். அன்றேல் இன்னும் ஒரு ஐந்து? வருட முடிவில் மகிந்தருக்கு இன்று ஏற்பட்ட நிலமைகளே மைதிரிக்கும் ஏற்படும். இவற்றை கருத்தில் கொண்டு புதிய ஜனாதிபதி செயற்படுவாரா? என்பதை பொறுத்திருந்துதான் பார்க்க வேண்டும்.

இவற்றுடன் கூடவே சிறுபான்மை தலமைகள் தங்கள் சமூகம் சார்ந்த இந்த வாக்கு வங்கிப் பலத்தை சரியான இராஜதந்திரத்தை பாவித்து இலங்கையில் நிலவும் அரசியல் பிரச்சனைகளுக்கு தீர்வு காண்பார்களா? அல்லது வெத்து வேட்டாக மாறி விடுவார்களா? என்பது எப்பவும் போல் இலவுகாத்த கிளிக் கதையாக முடியுமோ என்ற ஏக்கம் தமிழ் பேசும் மக்களுக்கும் எனைய இலங்கை வாழ் சிறுபான்மை மக்களுக்கும் நிறையவே உண்டு.

இவை எல்லாவற்றிற்கும் மேலாக ஜனாதிபதி முறமையை ஒழித்து பாராளுமன்றத்திடம் அதிகாரத்தை வழங்குவேன் என்று புயலெனப் புறப்பட்ட மகிந்தரும் மூன்றில் இரண்டின் பின்பு இரண்டு தவணையை ஆயுள்காலத்திற்கும் இருக்கலாம் என்று தள்ளிப்போட எத்தனித்த பதவி, அதிகார ஆசைகள் அவரைப் படுகுழியில் தள்ளியது போல் மைதிரியும் பதவி, அதிகார ஆசைகளுக்கு உட்பட்டு பொலநறுவாவிற்குள் முடங்கிப் போகக் கூடாது என்பதே இலங்கை மக்களின் எதிர்பார்ப்பு. இவ் எதிர்பார்பை நாம் ரணிலிடம் எதிர்பார்க்க முடியாது. இவர் ஜே.ஆர் இன் வாரிசாகவே செயற்படுவர். மைதிரியும் பிழைவிட்டால்? சிறுபான்மை, பெருபான்மை என்பதற்கு அப்பால் நாம் கிராமங்களை நோக்கி வகுப்பெடுக்கப் போவதை தவிர வேறு மார்க்கம் இல்லை என்பதை வரலாறு நிறுவியே நிற்கும்.
(ஜனவரி 10, 2015)

{2015 ஜனாதிபதி தேர்தலில்:

வட கிழக்குக்கு வெளியே(OUT OF NORTH-EAST)..........
மைத்ரீ(MY3) - 5,239,051
மஹிந்த(MR) - 5,444,490
வட கிழக்கில்(IN NORTH-EAST).....
மைத்ரீ (MY3) - 978,111
மஹிந்த(MR) - 323,600
மொத்தம்(TOTAL).....
மைத்ரீ(MY3) - 6,217,162
மஹிந்த (MR) - 5,768,090
வெற்றிய தந்தது தமிழனும் தமிழ் பேசுபவர்களும் தான்..........! }

அமைதி சமாதானம் ஜனநாயகம்

www.sooddram.com