தோழர் பத்மநாபா இன்
வரலாறு மறைப்பதும் இல்லை! மறுப்பதும் இல்லை!!
(தோழர் ஜேம்ஸ்)

தோழர் பத்மநாபாவின் பிறந்த தினம் இன்று. உலகில் பல மனிதர்கள் தோன்றுகின்றனர், வாழுகின்றனர், மறைந்து போகின்றனர், மறந்து போகப்படுகின்றனர். மிகச் சிலரே மறக்கப்படுவதும் இல்லை, மறைக்கப்படுவதும் இல்லை. இந்த வரிசையில் தன்னை இணைத்துக் கொண்டவர் தோழர் பத்மநாபா. தாம் வாழும் காலத்தில் இந்த மனித குலத்திற்காக என் செய்தார்கள் என்பதிலேயே இந்த மறத்தலும் மறுத்தலும் தங்கியிருக்கின்றது.

தனது இளமைக் காலத்திலேயே இலங்கையில் வாழும் சிறுபான்மை இனங்களில் ஒன்றான தமிழ் பேசும் மக்கள் சந்தித்த ஒடுக்குமுறைகளுக்கு தானும் முகம் கொடுத்து இதற்கான மூலகாரணங்கள் என்ன? இதற்கான போராட்ட வழிமுறைகள் என்ன? என்பதை அறிந்து தெளிந்த நிலையிலேயே தேசிய விடுதலைப் போராட்டத்தில் இணைத்துக்கொண்டார் தோழர் நாபா. இந்த தேசிய விடுதலைப் போராட்டத்தில் சிங்கள மக்கள் எமது நேச சக்திகள் என்பதில் மிகவும் தெளிவாகவே இருந்தார். இலங்கையில் உள்ள தேசிய இனங்கள் சேர்ந்து வாழுதல் என்பது இலங்கையில் ஒரு பாட்டாளி வர்க்கப் புரட்சி மூலமே சாத்தியம் என்பதை முழுமையாக உணர்ந்தவர்களில் இவரும் ஒருவர்.

இலங்கையில் வாழும் உழைக்கும் வர்க்கம் இணைந்து போராட முடியாத அளவிற்கு பேரினவாதம் மேலோங்கி தலைதூக்கி இருந்தமையினால் தமிழ் பேசும் மக்களின் சுய நிர்ணய உரிமைகளின் அடிப்படையில் பிரிந்து செல்வதற்கான போராட்டங்களை முதலில் முன்னெடுப்பது என்ற முடிவிற்கு வந்த இவர் இதற்கான தலமை சக்தி தமிழ் பேசும் மக்கள் மத்தியில் இருந்த உழைக்கும் வர்க்கமே என்று விடாப்பிடியாக நம்பினார். இதற்கான அணிதிரட்டல்களை செய்வதற்காக ஈபிஆர்எல்எவ் என்ற விடுதலை அமைப்பை உருவாக்கி இதன் தலமைப் பொறுப்பையும் ஏற்றுக் கொண்டார்.

கூட்டுத் தலமையில் என்றுமே அசைக்க முடியாத நம்பிக்கை கொண்டிருந்த இவர் தனது விடுதலை அமைப்பிற்குள்ளும், வெளியேயும் கூட்டுத் தலமையிற்காக கடுமையாக உழைத்தார். இவர் எப்போதும் தலமைப் பதவியை நோக்கி ஓடியவர் அல்ல என்பது இவருடன் இணைந்து வேலை செய்தவர்களுக்கு அப்பால் பல்வேறு மட்டத் மக்களுக்கும் தெரியும். இவரின் செயற்பாடுகள், உழைப்புக்கள், அர்பணிப்புக்கள், தான் கொண்ட இலட்சியத்தில் விடாப்பிடியானதன்மை போன்றவையே இவரை தலமைப் பதவியை நோக்கி நகர்த்தியது என்றே கூறவேண்டும்.

எல்லோரையும் அணைத்து, இணைத்துச் செல்லும் மனித நேயமும் தலமைத்துவ கவர்ச்சியும் இவரிடம் இருந்தே வந்தது. இவரின் எதிரிகள் கூட இவரின் மனித நேயத்தை மதித்தே பேசினர். இவரின் எளிமையான நடைமுறை வேறு எந்த ஈழவிடுதலைத் தலைவர்களிடமும் காண முடியாது. விளம்பரங்கள். துதிபாடுதல், பந்தாவாக காட்டிக் கொள்ளுதல் என்பவற்றை சமரசம் இன்றி வெறுத்த இவர் மக்களில் மக்களாக இருக்கவே விரும்பினார். அப்படியே வாழ்ந்தும் காட்டினார் ஒரு சோடி உடுப்பும், படுந்துறங்க ஒரு சாறமும், முகம் துடைக் ஒரு துவாய் (இதுவே இரவு நேரத் தூக்கத்திற்கான தலையணையும் கூட) நேரம் பார்க்க ஒரு எளிமையான கை கடிகாரம் தனது காலத்தை கழித்தார். மாலையானது தனது உடைகளையும். காலையில் தோழர்கள் பாவிக்கும் கழிவறை, குளிப்பறைகளை நேரத்துடன் நித்திரியால் எழும்பி தப்பரவு செய்யும் பழங்கங்களும் இவரிடத்து காணப்பட்டது.

ஈழவிடுதலை அமைப்புக்களில் மனித நேயத்தின் விளைநிலமாக திகழ்ந்தவர் என்றால் அது பத்மநாபாதான். எமது மக்களின் எதிரியின் பலம் பலவீனம் என்பனவற்றை நன்கு அறிந்திருந்தார.; என்றுமே ஆயுதத்தில் மோகம் கொண்ட மன நோயாளியாக இவர் இருந்ததில்லை. எதிரிக்கு எதிராக தவிர்க்க முடியாமல் ஆயதம் ஏந்த வேண்டி நிலமையை தனக்குள் உள்வாங்கிக் கொண்டவர். ஆயுதங்கள் மீது மோகம் கொண்ட மனநோயாளியாக இவர் காட்சி தரவும் இல்லை செயற்படவும் இல்லை, தனது சகாக்களை வளரக்;கவும் இல்லை. இதனால்தான் இவர் வாழ்ந்த காலத்தில் எதிரியுடன் தேவை ஏற்படும் போது ஆயுதங்களால் பேசவும், ஏனைய நேரங்களில் பேச்சுவார்த்தைகள் மூலம் எதிரிகளை அம்பலப்படுத்தவும் மக்களின் உரிமைகளை வென்றெடுத்து நிலை நாட்டவும் தயாராக இருந்தார்.

இதன் வெற்றிகள்தான் திம்பு பேச்சுவார்தையில் இலங்கை அரசு அம்பலப்பட்டுப் போனதும், ஈழவிடுதலை அமைப்புக்களிடையேயான பலமான காலகட்டமான ஈழத் தேசிய விடுதலை முன்னணி அமைத்து முன்னோக்கி நகர்த்திச் சென்றதும். இறுதியில் இந்திய அரசின் அனுசரணையுடன் உருவான மகாண சபையும். இதன் இடைக்கால அரசு அமைந்து அது முழுமையாக புலிகளிடம் ஏகபோகமாக தாரை வார்க்கப்பட்டபோது பரவாய் இல்லை அவர்களே நடத்தட்டும் இடைக்கால அரசை நமக்கு எதிர்கட்சி பாராளுமன்ற அரசியலே நல்லது என்று ஒதுங்கி நின்று இலங்கை இந்திய ஒப்பந்தத்தில் அமைந்த வடக்கு கிழக்கு மாகாண சபையின் இடைக்கால நிர்வாகத்தை புலிகளே கொண்டு நடத்த அனுமதித்து என்று அடுக்கிக் கொண்டே போகலாம்.

இறுதியில் புலிகள் வழமைபோல் தமது நம்பிக்கைத் துரோகத்தை இந்திய அரசுக்கு கொடுத்து அவர்களுக்கு எதிராக போர் தொடுத்தார்கள். இந்நிலையில் வடக்கு கிழக்கு மகாண சபையை எந்த வழங்களும் அற்ற நிலையில் அமைத்து இதனை நிலைநிறுத்த முற்பட்டதும் இன்று மறைக்க முற்படும் வரலாறு ஆகும். ஆனால் இவரின் சீரிய பார்வை அன்று பிரேமதாஸ, தமிழீழ விடுதலைப் புலிகள், கருணாநிதி போன்றவர்களின் கூட்டு முயற்சியினால் குலைக்கப்பட்டு, கலைக்கப்பட்டது துர்பாக்கிய நிலையே ஆகும். இதனைத் தொடர்ந்து வடக்கும், கிழக்கும் பிரித்தெடுக்கப்பட்டு, மகாண சபையின் அதிகாரமும் பறித்தெடுக்கப்பட்டு அதிகாரம் குறைந்த ஒரு மகாணசபையே போதும் என் நிலைக்கு முள்ளிவாய்கால் போன்ற பாரிய மனிதப் படுகொலையின் இறுதியில் தமிழ் பேசும் சமூகம் வந்திருக்கின்றது.

இணைந்த வடக்கு கிழக்கு மகாணசபை கலைக்கப்பட்டமை தவிர்க்கப்பட்டிருந்தால், தோழர் நபாவின் மரணம் தவிர்க்கப்பட்டிருந்தால் இன்று ‘தேவையான’ அதிகாரங்கள் பெற்ற ஒரு பலமிக்க மாகாணசபை ஆட்சிப் பீடத்தில் இருந்திருக்க முடியும் என்பது உலகில் உள்ள பல நாடுகளின் வரலாறுகள் கூறும் செய்திகள். எவை எப்படி இருப்பினும் இன்று கிடைத்திருக்கும் மகாணசபையும் அதன் ஆட்சிப் பொறுப்பும் தோழர் பத்மநாபா போன்ற பல்லாயிரக் கணக்கான போராளிகளின் செங்குருதிலிருந்து பிறந்தைவையே. இது ஒன்றும் சும்மா தாம்பாளத்தில்; வைத்து பெறப்பட்டவை அல்ல.

தமிழ் பேசும் மக்களுக்கு அப்பால் மலையக மக்கள், முஸ்லீம் மக்கள், சிங்கள மக்கள் என்று தான் பிறந்த இலங்கை தேசத்திலிருக்கும் பல இனங்களின் விடுதலைப்பற்றி சிந்தித்து செயற்பட்ட தலைவர்களின் இவரும் ஒருவராக நிமிர்ந்து நிற்கின்றார். இதற்கு அப்பால் ஈழவிடுதலைப் போராட்டத்தின் பின்புலமாக அமைந்த இந்தியாவின் முற்போக்கு சக்திகளுடன் தனது உறவுகளை வளர்த்து இந்திய மக்களின் வர்க்க விடுதலைக்கான முன்னெடுப்புக்களுக்கு தனது ஆதரவை வழங்கியே வந்தார.; கூடவே பாலஸ்தீன மக்களின் போராட்டத்திற்கான தனது ஆதரவுக்கரங்களை வழங்கி இவர்களுடன் தோழமைப் பாலமும் அமைந்திருந்தார். நிக்கரகுவாவின் டானியல் ஒடேகாவின் புரட்சிகர அரசுடனும், ஏனைய தென் அமெரிக்க புரட்சிகர அமைப்புக்களுடனும் தமது உறவை வளர்த்து கொண்டார் ஈழவிடுலை அமைப்புக்களின் தலைவர்களிடையே நிலவிய தமிழ் தேசியம் என்ற குறுதேசியவாதத்திற்கு அப்பால் ஒரு சர்வதேசியவாதியாகவும் திகழ்ந்தார்.
இதனாலேயே அமெரிக்க ஏகாதிபத்தியமும் இதன் அடிவருடிகளும் ஈபிஆர்எல்எவ் என்ற அமைப்பை இல்லாமல் செய்ய புலிகள் என்ற தமது கூலிகள் மூலம் நிறுவி நிற்க இன்றுவரை ஆவன செய்து வருகின்றனர்.

47 வருடங்களின் பின்பும் தோழர் சேகுவாரா வின் மரணம் மறுக்கப்படவும் இல்லை, மறக்கவும் முடியவில்லை. அது போலவே தமிழ்நாட்டின் கோடம்பாக்கம் சூளைமேட்டில் புலிகளின் சதிவலையினால் கொல்லப்பட்ட பத்மநாபாவும் மறக்கப்படவும் இல்லை மறுக்கப்படவும் இல்லை. சேகுவாரா அன்றை அமெரிக்க அடிவருடி இராணுவத்தினால் கொல்லப்பட்டது போல் தோழர் பத்மநாபாவும் பொது எதிரியான அமெரிக்கா அல்லது இலங்கை இராணுவத்தினால் அல்லாது இவர்களின் கைகூலி தமிழ்ப் புலி இராணுவத்தினாலேயே கொலப்பட்டார்.

தோழர் சேகுவாரா போல் உங்களையும் வரலாறு விடுதலை செய்திருக்கின்றது. நீங்கள் மறுக்கப்பட்டவரும் இல்லை, மறக்கப்பட்டவரும் இல்லை.
(தோழர் ஜேம்ஸ்) (நவம்பர் 19, 2014)

அமைதி சமாதானம் ஜனநாயகம்

www.sooddram.com