பசில் ராஜபக்ஷ இன் ஆசீர்வாதத்துடனும்

கிழக்கு மாகாணம் திரும்பும் TNA மீண்டும் புலியிஷத்தை வளர்பார்கள்?

(இராஜ்குமார்)

பத்திரிகை செய்திகள் வாயிலாக தமிழ் தேசியக் கூட்டமைப்பு நாடாளுமன்ற உறுப்பினர்களுக்கும் ஜனாதிபதி மஹிந்த ராஜபக்ச மற்றும் அவரது ஆலோசகரான பசில் ராஜபக்சவிற்கும் இடையில் இடம் பெற்ற சந்திப்புகளின் போது தமது பாதுகாப்பு தொடர்பாக அளிக்கப்பட்ட உறுதிமொழி, உத்தரவாதம் ஆகியவற்றையடுத்து மட்டக்களப்பு மாவட்டத்திற்கு திரும்பியுள்ளதாக நாடாளுமன்ற உறுப்பினர் பா.அரியநேத்திரன் தெரிவிக்கின்றார். கடந்த மூன்று வருடங்களாக பாதுகாப்பின் நிமித்தம் கொழும்பில் தங்கியிருந்த மட்டக்களப்பு மாவட்ட தமிழ் தேசியக் கூட்டமைப்பு நாடாளுமன்ற உறுப்பினர்கள் மீண்டும் திரும்பியிருப்பது தொடர்பாக கேட்ட போதே இவ்வாறு தெரிவித்தார். இவரைத் தொடர்ந்து ஏனையோரும் இன்னும் சில தினங்களில் கிழக்கு திரும்ப உள்ளனர் என அறியமுடிகின்றது.

ஜனாதிபதியுடன் இடம் பெற்ற சந்திப்பின் போது குறிப்பாக வடக்கு கிழக்கு மாகாணங்களில் தமிழ் தேசியக் கூட்டமைப்பு சுதந்திரமான முறையில் எவ்வித அச்சுறுத்தலுமின்றி அரசியல் நடவடிக்கைகளில் ஈடுபடுவதற்கான சூழ்நிலையை ஏற்படுத்தித் தருமாறு தமது கட்சி கோரிக்கை முன் வைத்த போது அதனை ஜனாதிபதி ஏற்றுக் கொண்டதாகவும் இதன் பின்னர் ஜனாதிபதி ஆலோசகர் பசில் ராஜபக்சவுடன் இடம் பெற்ற சந்திப்பிலும் இது தொடர்பாக அவரது கவனத்திற்கு கொண்டு வந்த போது பாதுகாப்பு தொடர்பான உறுதிமொழியும், உத்தரவாதமும் வழங்கப்பட்டதாகவும் அவர் கூறுகின்றார்.

தமிழ் மக்களின் அரசியல் தீர்வு பற்றியோ அல்லது முள்ளுக்கம்பியிற்கு பின்னால் நிற்கும் 3 இலட்சம் மக்கள் எல்லாம் இவர்களுக்கு தற்போது இரண்டாம் பட்சம்தான். ஆனந்த சங்கரியாரின் அண்மைக்கால 'இணக்கமான' அணுகுமுறையும் இது போன்ற ஒரு 'அரசியல்' மாற்றத்தின் வெளிபாடாக இருக்கலாம் என அரசியல் அவதானிகள் கருதுகின்றனர். இடதுசாரியாக தனது அரசியல் வாழ்வை ஆரம்பித்த 'சங்கரி ஐயா' தனது புதுப்பாதையை சரியான தடங்களில் பயணிப்பார் என நம்புவோம்.

தமிழ் தேசிய கூட்டமைப்பினரின் மட்டக்களப்பு விஜயத்திற்கு கருணாவின் அனுமதியும், ஆசீர்வாதமும் இருப்பதாகவும் செய்திகள் வருகின்றன. ஆயுதம் அற்ற புலிகளுக்கான (அதுதான் தமிழ் தேசியக் கூட்டமைப்பு) அனுமதி, (முன்னாள்)ஆயுதம் ஏந்திய புலிகளை அனுமதிப்பதற்கான வெள்ளோட்டமாக செய்யப்படுவதாக அறிய முடிகின்றது. அடுத்து அரசுடன் சேர்ந்து இயங்க சம்மதித்த முன்னாள் புலிகள் முதல்கட்டமாக கிழக்கிற்கும், அதனைத் தொடர்ந்து வடக்கிற்கும் அனுமதிக்கப்படுவார்கள் என அரசியல் அவதானிகள் கருத்து தெரிவிக்கின்றனர். எங்கே பொறுத்திருந்து பார்ப்போம்.

மாற்று தமிழ் கட்சிகளின் 'பாதுகாப்பு' விலக்கல் இதனை அடிப்படையாகக் கொண்டே செய்யப்படுவதாவும் மேலும் அவர்கள் தெரிவிக்கின்றனர். ஆனால் ஒன்று மட்டும் உண்மை யாராக இருந்தாலும் வெற்றிலைதான் அவர்களின் சின்னம். அன்றேல் அம்பேல்தான்? புரிந்தால் சரி. மாநகரசபைத் தேர்தல் எமக்கு சில பாடங்களை தந்துள்ளது.......?

(இராஜ்குமார்) (ஐப்பசி 07, 2009) (Rajkumar)