உண்மையிலேயே அப்பேற்பட்ட ஒரு பொன்னான சந்தர்ப்பமானது EPRLF அமைப்பினருக்கே எட்டியது. அந்த நேரத்திலே இந்திய ராணுவம் இலங்கையிலே நிலை கொண்டிருந்தது. இலங்கை இராணுவமோ முகாம்களுக்குள் முடக்கப்பட்டிருந்தது. அபிவிருத்திக்கென இந்தியா கோடிக்கணக்கான ரூபாய்களை அள்ளிக்கொடுத்தது. EPRLF இன் செயலாளர் நாயகமாக தோழர் பத்மநாபா இருந்தபோதிலும், EPRLF  இன் வளர்ச்சியிலோ அல்லது கஷ்டங்களிலோ எந்த விதத்திலும் சம்மந்தமில்லாத வரதராஜப்பெருமாளே முதலமைச்சர் பதவியை தட்டி பறித்துக்கொண்டார். அது கூட பரவாயில்லை என்று ஏற்றுக்கொண்டாலும்,  மாகாண சபையை ஒழுங்காக நடத்தினார்களா என்றால், இல்லவேயில்லை. தாங்கள் பழைய EPRLF இல்லை என்று கூறியவர்கள், புலி வேட்டை என்று கூறி EPRLF இன் பொட்டம்மானான ஜேம்ஸின் (சிவா, சாகரன், அலம்பல் சிவா) உத்தரவுக்கிணங்க,  பொதுமக்கள், கல்விமான்கள், மாணவர்களை கொன்று குவித்தார்கள்.

இதை தொடர்ந்து மக்களின் சீற்றத்துக்கு உள்ளாகியவர்கள் சாதாரண கீழ் மட்ட தோழர்களை தவிக்க விட்டுவிட்டு இந்தியா பறந்தார்கள். அவ்வாறு பறந்த பெருமாள் இடைக்கிடை இலங்கைக்கு வந்து மீண்டும் ஏதாவது பதவிகள் கிடைக்குமா என நோட்டம் பார்த்தார். மாகாண சபை காலத்து பயங்கர யுகத்தை மக்கள் இன்னும் மறக்கவில்லை. இதனால் தான் மக்கள் திரும்ப திரும்ப நுPசுடுகு ஐ நிராகரிக்கிறார்கள் என்பதை உணர்ந்த பெருமாள் இனிமேல் திரும்பி வருவதில்லை என மீண்டும் சென்றார். தற்பொழுது புதிய அரசு உருவாகி சந்திரிக்கா அம்மையார் முக்கிய பங்கு செலுத்துகின்ற நிலையில்,  இரண்டு தசாப்தங்களுக்கு மேலாக இந்தியாவில் தங்கியிருக்கும் பெருமாள் மீண்டும் வர இருப்பதாக நம்ப தகுந்த வட்டாரங்கள் தெரிவிக்கின்றன. (நன்றி: சலசலப்பு)

மேற்படி செய்தி தொடர்பாக சில மேலதிக தகவல்கள்

(சமரன்)
வரதர் வரமாட்டார். சம்பந்தப்பட்டவர்கள் அச்சப்பட வேண்டாம். அவர் இந்தியாவில் உழைத்து வாழுகிறார். முன்பு போல் மாட்டுப் பண்ணை வைத்தாவது உழைத்துச் சாப்பிடுவார். பிள்ளையைக் கடத்தியோ, வெள்ளைவான் விளையாட்டோ இவர் செய்யப்போவது இல்லை. 1970 களிலிருந்து ஈழ மக்களின் விடுதலையுடன் தன்னை இணைத்து செயற்படும் வரதர் பற்றி அவதூறு கிளப்புவது ஒன்றும் இவர்களின் புதிய வேலை இல்லை. தமிழ் மக்கள் அரங்கத்தில் சகலரையும் இணைத்து அடுத்த கட்டத்திற்கு கொண்டு செல்ல முயன்ற நற் செயற்பாட்டை வரலாற்றில் இலகுவாக அழித்துவிடவும் முடியாது. ரெலோ மீதான புலிகளின் தாக்குதலின் போது வெள்ளைக்கொடி கட்டி கிட்டுவிற்கு சமாதான, சகபாடியாக செயற்பட்டவர்கள் யார் என்பது அன்றைய யாழ் மக்களுக்கு தெரியும். இதன் பின்பு ஈபிஆர்எல்எவ் மீதான தாக்குதலுக்கு முன்பே ஈழத்தை விட்டோடி மறைந்தார்கள். பின்பு இலங்கை இந்திய ஒப்பந்தத்தின் பின்பு ‘தம்பி’ யை முதல் அனுப்பி தாமே ஈபிஆர்எல்எவ்  என்று முந்தி உரிமைகோர யாழ்பாணம் வந்த போது புலிகளால் தம்பி கொல்லப்படும்வரை இவர்கள் கிட்டுவின் உளவாளிகள். இதன் பின்பு பிரபாகரனின் மறு அவதாரங்களாக செயற்பட்டதே வரலாறு. இணைந்த மகாண சபையை இல்லாமல் செய்ய ஒரு வளத்தில் இவர்களையும் மறுவளத்தில் புலிகளையும் பிரேமதாசாவால் ஒரே மாட்டு வண்டியில் பூட்டி வெற்றி கொள்ள ஒத்துழைத்த பெருமையும் இவர்களையே சாரும்.  மாகாணசபைக்கு எதிராக செயற்படுத்துவதற்காக பிரேமதாசாவால் இறக்குமதி செய்யப்பட்டு, ஏறத்தாள 25 வருடங்களாக சிங்கள அரசின் பாதுகாப்புடன் இருந்து கொண்டு பிழைப்பு நடத்தும் அரசியல் மேதைகளுக்கு, மைத்திரியும் ஏதாவது போடுவார். அவசரப்பட வேண்டாம்.

அமைதி சமாதானம் ஜனநாயகம்

www.sooddram.com