உலகம் தவறான பாதையிலிருந்து நல்வழிக்கு.....

(சுகு- ஸ்ரீதரன்)

இன்று உலகத் தலைவர்களை எடுத்துக் கொண்டால் சாதாரண மக்களின் சமூக பொருளாதார வாழ்வை மேம்படுத்துவது மனித உரிமை ஜனநாயகம் பற்றி அக்கறை கொண்டவர்கள் அருந்தலாகவே காணப்படுகிறார்கள். ஆனால் மானிடம் பற்றிய அக்கறை உள்ளவர்களும் அங்காங்கு உலகில் வாழத்தான் செய்கிறார்கள். உலகளாவிய அளவில் இந் தலைவர்கள் சமூக ஆர்வலர்களின் பணி முக்கியத்துவம் வாய்ந்தது. இன்று உலகம் எதிர் நோக்கும் நெருக்கடியான சவாலான பாதையிலிருந்து நல்வழியில் செல்வதற்கு இவர்களால் உதவ முடியும்.

இந்த புவிக்கோளும் மக்களும் பாதுகாக்கப்படவேண்டும். நிச்சயமற்ற நிலை பூவுலகின் மரணம் நிகழ்ந்து கொண்டிருக்கிறதா என்ற  கேள்வி திரும்பதிரும்ப எழுகிறது.எனவே அற உணர்வுள்ளவர்களின் பங்களிப்பு அதீதமாகத் தேவைப்படுகிறது.

இந்தியாவில் அப்துல் கலாம் ,கிருஸ்ணையர், மார்க்கண்டேய கட்யு, அருந்ததி ராய், அமர்த்தியா சென், தென்னாபிரிக்காவில் டெஸ்மன் டூட்டூ, அயர்லாந்தின் மேரி றொபின்சன், ஆபிரிக்காவின வங்கரி மாத்தா,  பிடல் கஸ்டரோ, நெல்சன் மண்டெலா, அமெரிக்காவின் நோம் சோம்ஸ்கி, ,மியன்மாரின் அங்சாங் சுஜி இன்னும் இந்த வரிசையில் உலகளாவிய அளவில் பல சிறந்த மனிதர்களின் ஒருங்கிணைந்த பங்களிப்பு அவசியப்படுகிறது.

மக்கள் நாடு உலகம்  பற்றிய அக்கறை உள்ளவர்கள் உலக இராணுவமயமக்கம் பேரழிவுப்பாதையிலிருந்து உலகை மீட்கப் பாடுபடவேண்டும் காந்தியடிகளின் கருத்துக்களும் போராட்ட வழிமுறைகழும் உலகளாவிய அளவில் செல்வாக்கு பெற்றது அது இந்தியாவில் மாத்திரமல்ல தென்னாபிரிக்கா வட அமெரிக்கா வரை அது வியாபித்தது.

சமத்துவமற்ற உலக ஒழுங்கு மாற வேண:டும். மாக்ஸ் ,ஏங்கல்சினால் ஆரம்பித்து வைக்கபட்ட பணி  லெனின், றோசாலக்சம்பேர்க் ,ட்ரொட்ஸ்கி ,ஸ்டாலின், மாவோ , லுமும்பா, அலன்டே இன்றைய சாவேசு வரை செயற்பட்டிருக்கிறார்கள். செயற்படுகிறார்கள்.

ஜவஹர்லால் நேரு ,ஹோசிமின் ,சேகுவேரா போன்ற ஆளுமைகள்  அறவழி உலகிற்காக பாடுபட்டார்கள். டால்ஸ்டாய் ,காந்தியடிகள் ,தாகூர் ,கான் அப்துல் கபார்கான் ஐன்ஸ்ரின் இவர்களுக்கிடையே உறவுகள் இருந்தன.

பாசிசம் காலனியாதிக்கத்திற்கெதிரான விழிப்புணர்வு காணப்பட்டது. பிரமாண்டமான அளவில் உயிரழிவுகள் நிகழ்ந்தாலும் பேரழிவுகளுக்கெதிரான சத்திகளும் தார்மீக பலம் உள்ளவையாக இருந்தன.  மானிடத்தின் நல்வாழ்வு பற்றி அவர்கள் அக்கறை கொண்டிருந்தார்கள். இன்று அற உணர்வுகள் அருகி விட்டன.

சுயநலமும் பெருவாரியான மக்களுக்கு அனர்த்தம் விழைவிக்கும் முறைகளே கடைப்பிடிக்கப்படுகின்றன. பங்கு மார்க்கட் பல்தேசிய கம்பனிகளின் வளர்ச்சி நாட்டின் வளர்ச்சி- உலகின் வளர்ச்சி என்று சொல்லப்படும் கலிகாலத்தில் நாம் வாழ்கிறோம்.

இயற்கையை சூறையாடல் உலகம் முழுவதும் ஒருவிதமான பிரக்ஞையுமற்று நிகழ்கின்றன. இராணுவவாதம் உடல் மீதியின்றி அழித்தல் என்பன மிகவும் துணிச்சலாக நடைபெறுகின்றன. இதுவும் இயல்பானதே யதார்த்தமானதே என்ற நிலை தோற்றுவிக்கப்பட்டிருக்கிறது.

அதிகாரத்திற்கெதிரான போராட்டம் என்பது அப்பாவி மக்களின் உயிரைக் குடிக்கும் பயங்கரவாதமாக இருக்கமுடியாது.

 மத இன அடிப்படைவாதங்களுக்கு எதிர்கால உலகில் இடமில்லை என்றாக வேண்டும். பூமியைப்பற்றிய பிரக்ஞை வேண்டும் .

எதிர்காலம் நிச்சயமற்றுப் போனதன் பின்னரும் பாதுகாக்கவேண்டும் என்ற அக்கறை தீவிரமாக எழவில்லை. இந்த நிலை மாற  வேண்டும். உலகின் நல்ல சத்திகள் இணைய வேண்டும்.

தீய சத்திகளின கட்டற்ற பெருக்கத்திற்கெதிராக இது நிகழவேண்டும்.  இங்கு தனிமனிதர்களின் பெயர்கள் மாதிரி இருந்தாலும் அவர்கள் உலக மக்களை ஆகர்சிக்க கூடியவர்கள். விரிந்த  பரந்த பார்வை உள்ளவர்கள்.
 இவர்களைப் போன்றவர்கள்  ஒருங்கிணைந்து உலகின் எதிர்காலம் பற்றி பேச வேண்டும். இதற்கான  முன்னெடுப்புக்கள் அவசியமானது. உலகளாவிய அளவில் தொடர்பு கொண்ட உலக மானிட சமூக அக்கறை கொண்டவர்கள் இதனை மேற் கொள்ளலாம்.

(சுகு- ஸ்ரீதரன்)