சம்பந்தரின் நிதானம்

(சுகு ஸ்ரீதரன்)

தமிழரசுக்கட்சியின் தலைவர் திரு இரஜவரோதயம் சம்பந்தர் அண்மையில் பாராளுமன்றத்தில் ஆற்றிய உரை நீக்குப்போக்குகள் இருந்தாலும் யதார்த்தமும் பொறுப்புணர்வும் புத்திசாலித்தனமும் அதில் வெளிப்படுத்தப்பட்டிருக்கிறது. இன்றைய இலங்கையின் நிலையில் சமூகத்தின் எதிர் காலம் இருப்பு கருதி பேசவேண்டியிருக்கிறது. பெரும்பான்மை சமூகத்தின் நியாயமான தரப்பின் , இலங்கையின் அனைத்த சமூகங்களின், இந்தியா உள்ளிட்ட சர்வதேச சமூகத்தின் கருத்து நிலை எதிர்பார்ப்புகளுக்கு ஏற்ப எமது கோரிக்கைகளை முன் நகர்த்த வேண்டும்.

அவரது பாராளுமன்ற உரையில் மிகுந்த நிதானம் கடைப்பிடிக்கப்பட்டிருக்கிறது.

சாரம்சம் இது தான்

•புலிகளின் முடிவுடன் தமிழ் மக்களின் பிரச்சனைகளும் முடிந்து விட்டதாக அரசு கூறிவருவது

•வடக்கு கிழக்கில் இராணுவத்திற்கு கீழ்படிவுள்ள குடிமக்களாக தமிழர்கள் வாழவேண்டிய நிலை

•பாரிய அளவிலான  இராணுவ பிரசன்னம், மக்களின் நிலங்களை இராணுவத்திற்கு வழங்கியிருப்பது- புள்ளிவிபரங்களுடன், ,இராணுவ குடியேற்ற திட்டங்கள்.

•தமிழர்களின் இனப்பரம்பலை மாற்றும் முயற்சிகள்

•கார்த்திகை விழக்கீடு அன்று பல்கலைகழகத்தில் மாணவர்கள் தீபமேற்றியதற்காக  கைது செய்யப்பட்டது , இறந்தவர்களுக்கு அஞ்சலி  செலுத்துவதற்கான உரிமை

•புலிகளின் காலத்தின் பின்னர் சர்வதேச ரீதியாக ஈழத்தமிழர் பிரச்சனை தொடர்பான கரிசனைகள் உள்ளிட்ட விடயங்களை கூச்சல் குழப்பங்களுக்கு மத்தியில் அமைதியாக  வெளிப்படுத்தியுள்ளார்.

புலிகளின் காலத்தில் இருந்ததை விட பெரிய அங்கீகாரம் சர்வதேச ரீதியில் இருப்பது, இராணுவத்தை பொதுமக்களின் இருப்பிடங்களிலிருந்து விலகி யுத்தத்திற்கு முந்திய காலத்தில் இருந்தது போல் முகாம்களில் இருக்க கோரியிருப்பது

இறந்தவர்களை நினைவு கூருவது,  மக்களின் சமய நம்பிக்கைகள் வழிபாடுகள் தொடர்பாக , திட்டமிட்ட குடீயேற்றங்களை எதிர்க்கிறோம் இயல்பான மக்களின் குடியேற்றங்களை அல்ல இவை யதார்த்தமானவை எனலாம். இன்றைய காலத்தில் இத்தகைய வெளிப்படுத்தல்கள் அவசியப்படுகினறன.

“வாழு வாழ விடு” என்பதே அவரது உரையின் சாரமாக இருக்கிறது. நயம்பட எடுத்துருரைத்தல் என்பார்களே அது இந்த உரையில் இருக்கிறது.

சாத்தியமில்லாத விடயங்களுக்காக மக்களை உசுப்பேத்துவது தேவையில்லாத பிரச்சனைகளுக்கு வழிவகுக்கும். எமது கோரிக்கைகள் நியாயம் என்று ஊரும் உலகமும் ஒப்புக் கொள்ளவேண்டும். சம்பந்தரின் பேச்சு சர்வதேச சமூகத்திற்கு மாத்திரமல்ல நியாயமாகச் சிந்திக்கும் அனைத்து தரப்பினருக்கும் ஏற்புடையதாகும்

.தேசிய இனப்பிரச்சனையில் யதார்த்தமக நியாயமாக சிந்திக்கும் அனைத்து தரப்பினரையும் அரவணைத்துச் செல்ல வேண்டும்.

இத்தகைய  அணுகுமுறை இலங்கை அரசு பிரச்சனைக்கு தீhவுகாண முன் வரவேண்டும.; இல்லையேல் அம்பலப்படவேண்டும் என்ற நிலையை உருவாக்கும்.

தருணத்தில் மேற்கொள்ளப்பட்ட முயற்சி

13 வது திருத்தத்தை அரசியலமைப்பிலிருந்து நீக்கவேண்டும் என்று  அரசமட்டத்தில் திட்டமிட்ட கருத்துருவாக்கம் நடந்து வருகிறபோது.  அதற்கு மாறாக  13 வது திருத்தத்தை அரசியலமைப்பில் இருந்து அகற்றக் கூடாது என்று  இடதுசாரிக்கட்சிகளின் தலைவர்கள் உட்பட 30 பா.உக்களை இணைத்து பாராளுமன்ற கட்டிடத்தில் கூட்டத்தை கூட்டிய ஈபிடிபியின் தலைவர் திரு டக்ளஸ் தேவானந்தாவின் முயற்சிகள் பாராட்டுக்குரியதாகும் தருணத்தில் மேற்கொள்ளப்பட்டதுமாகும் .

 உண்மையில் இந்த முன்னெடுப்பை இடதுசாரி;, தமிழ் ,முஸ்லீம,  மலையக கட்சிகள் இணைந்து முன்னெடுத்திருக்கவேண்டும்.

அதிகாரப்பரவலாக்கலுக்கெதிரான போக்கிற்கெதிராக இத்தகைய எதிர்ப்பினை காட்டவேண்டிய தேவை இருக்கிறது .

பல்லாயிரக்கணக்கான தமிழர்களின் அர்ப்பணிப்பிலேயே 13 வது உருவாகியது என்பதை மனதில் இருத்தியாகவேண்டும்

அதிகார பரவலாக்கலுக்கு ஆதரவான சத்திகள் நாடு முழுவதும் இருக்கின்றன. இந்த சத்திகள் ஒருங்கிணைக்கப்படவேண்டும்.

இதே போன்ற முன்னெடுப்புக்கள் பிரதம நீதியரசரை பதவியிறக்கும் முயற்சிகளுக்கெதிராகவும் முன்னெடுக்கபடவேண்டும்.

 ஏனெனில் அது தனி மனிதர் சார்ந்த பிரச்சனை அல்ல. நாட்டின் நீதித்துறைச் சுயாதீனம்  ,ஜனநாயகம், மனித உரிமை, அதிகாரப்ரவலாக்கல் உள்ளிட்ட பல விடயங்கள் சார்ந்த பிரச்சனையாகும் .

சிறுபான்மை சமூகங்களின் கட்சிகளுக்கு இது விடயத்தில் பொறுப்பும் கடமைகளும் இருக்கின்றன.