தோழர் றொபேட் ஒரு மகத்தான மானிடன்

தோழர் றொபேட் சம காலத்தின் முக்கியமான தலைவர். அவர் சமுதாயத்தில் மறுமலர்ச்சி என்ற எழிலார்ந்த கனவை கொண்டிருந்தார். தமிழ் மக்களின் சுயமரியாதை, கௌரவமான வாழ்வு என்பதும் தமிழ் சமுதாயத்தில் ஜனநாயகம் மனித உரிமை என்பனவும் அவரின் உயிர் மூச்சாக இருந்தன. இலங்கையின் சகல இன மக்களுடனும் ஐக்கியப்பட்ட வாழ்வு என்பதிலும் அவர் அசைக்க முடியாத நம்பிக்கை கொண்டிருந்தார்.

உண்மை, நேர்மை, கண்ணியம், துரதிருஷ்டி என்பன அவரின் அருங் குணங்களாக இருந்தன. அவர் எப்போதும் போலித்தனங்களை வெறுத்தார். உண்மையை யதார்த்தத்தை அவர் திடசித்தத்துடன் எதிர் கொண்டார். அவர் இற்றைக்கு கால் நூற்றாண்டுகளுக்கு முன்னர் ஈழ மக்கள் புரட்சிகர விடுதலை முன்னணியின் மாணவர் அமைப்பான ஈழ மாணவர் பொது மன்றத்தினூடாக தனது சமூக அரசியல் பிரவேசத்தை மேற்கொண்டார். அவர் தனது 45வது வயதில் தனது மரணத்தை எதிர் கொள்ளும் வரை தனது வாழ்வு முழுவதையும் தனது சமூகத்திற்காக அர்ப்பணித்திருந்தார். வசீகரமான தோற்றம் கொண்ட தோழர் றொபேட் வசீகரமான மனத்தையும் கொண்டிருந்தார்;. இது யாழ்ப்பாணத்தைச் சேர்ந்த ஒரு அனுபவம் வாய்ந்த பத்திரிகையாளரின் கூற்று. சமகாலத்தில் படுகொலை செய்யப்பட்ட தமிழ் தலைவர்களில் தோழர் றொபேட் முக்கியமானவர். நம்பிக்கைகள் தகர்ந்து சவால்கள் சூழ்ந்த போதெல்லாம் அவர் மனம் கலங்கியதில்லை. தாம் வழி நடத்திய தோழர்களை தான் எந்த மக்களுக்காக செயற்பட தனது வாழ்வின் பெரும் பகுதியை அர்ப்பணித்தாரோ அவர்களை அவர் மரணிக்கும் வரை கைவிடவில்லை. ஒரு இலட்சியவாதியாக நடைமுறைவாதியாக அவர் செயற்பட்டார். எந்தவிதமான மூடநம்பிக்கைக்கும் துதிபாடல்களுக்கும் அவர் இடமளித்ததில்லை. தன்னுடன் பழகிய பத்திரிகையாளர்கள் கல்விமான்கள், பொதுமக்கள் ஆகியோரின் மனங்களில் அவர் ஒரு உயர்ந்த ஸ்தானத்தைப் பெற்றிருந்தார்.

ரஷ்யாவின் புகழ் பெற்ற நாவல் ஆசிரியன் ஒஸ்துரொவ்ஸ்கி தனது வீரம் விளைந்தது நாவலி;ல் 'திடீர் நோயோ சோக விபத்தோ ஒரு மனிதனின் வாழ்விற்கு உலை வைக்கலாம். ஆனால் அவன் இந்த சமூகத்திற்காக அர்ப்பணித்து வாழ்ந்தான் என்ற உரிமை பெற்றவனாக மரணிக்க வேண்டும்' என்று குறிப்பிட்டிருந்தார். ஒஸ்திரோவ்ஸ்கி குறிப்பிட்ட அந்த இலட்சிய மனிதனாக தோழர் றொபேட் வாழ்ந்து காட்டினார். மிகவும் நெருக்கடியான ஒரு கால கட்டத்தில் அவர் யாழ் மாநகர சபையில் ஒரு சரித்திரம் முக்கியத்துவம் வாய்ந்த பங்கை ஆற்றினார். ஜனநாயகத்திற்கும், மனித உரிமைகளுக்கும் அவர் உறுதியாக குரல் கொடுத்தார். யாழ்ப்பாணத்தின் அறிவு கருவூலமான யாழ் நூலகத்தை திறந்து வைக்க வேண்டும் என்பதில் அவர் உறுதியுடன் நின்றிருந்தார். பேயரசு செய்தால் பிணம் தின்னும் சாத்திரங்கள் என்றான் பாரதி. ஆனால் எமது சமூகத்தில் அது நிஜ உண்மையாக அமைந்திருந்தது. அடக்குமுறைக்குள் புதைந்து போயிருந்த சமுதாயத்தில் அவர் ஒரு ஒளிக்கீற்றாக தென்பட்டார். தனது சொந்த வாழ்க்கையில் அவர் பிரமச்சரியத்தை கடைபிடித்தார்;. தமது இளம் பராயத்தில் திருமணம் செய்யாமல் மரணித்துப் Nபுhன தோழர்களுக்காக அவர் அவ்வாறு நடந்து கொண்டார்.

அவரது வரலாறு மிக நீண்ட ஒரு நூலாக எழுதப்பட வேண்டியது. அங்கொன்றும் இங்கொன்றுமாக இதனை குறிப்பிட்டு விட்டு செல்ல முடியாது.

சமூகத்தின் இக்கட்டான ஒரு காலகட்டத்தில் எல்லோரும் தலை தப்பி ஓடிக்கொண்டிருக்கையில் தமிழ் மக்களின் உரிமைகளுக்காகவும் ஜனநாயகத்திற்காகவும் அவர் போராடியவர். அவருடன் பழகிய சக இயக்கத் தோழர்கள் நண்பர்கள் மாநகர சபை உறுப்பினர்கள் அரசியல் தலைவர்கள் அவர் மீது பேரபிமானம் கொண்டிருந்தனர்.

தோழர் றொபேட்டை படுகொலை செய்ததன் மூலம்  பாசிச வாதிகள் வெற்றிபெற வில்லை. அவர்கள் தோற்றுத்தான் போனார்கள். நாகரீகமான தமிழர்களும் நாகரீகமான மானிட சமூகமும் தனது உணர்வுகளை வெளிப்படுத்தியது. தோழர் றொபேட்டிற்கு தனது இறுதி மரியாதையை செலுத்தியது. இவ்விடத்தில் பாசிசவாதிகள் தோற்றுத்தான் போனார்கள்.

இன்று சமாதானம், மனித உரிமை தமிழ் மக்களின் அபிலாஷை  என்று யாரும் பேசலாம் ஆனால் அவற்றின் பொருள் பொதிந்த அர்த்தத்திற்காக போராடிய தோழர் றொபேட்டும் அவர் போன்ற தலைவர்களும், தோழர்களும் போராட்டக்காரர்களும் வரலாற்றால் சுமந்துவரப்படுவார்கள்.

சுகு-ஸ்ரீதரன்.

முன்னர் ஒருதடவை அவரது நினவு தினத்தில் பிரசுரமானது. இன்று அவரது 56 ஆவது பிறந்த தினம்.