மார்கழி 24 தோழர் றொபேட் 55 வது பிறந்தநாள்

(தோழர் சுகு)

எமது சமூகத்தின் வாழ்வைச் சீராக்குவதற்கு பலபேர் முயற்சித்திருக்கிறார்கள். சமூக அநீதிகள் ,பாரபட்சங்கள் ஒடுக்குமுறைகள், மூடநம்பிக்கைகளுக்கெதிராக பலரும் போராடி இருக்கிறார்கள் . தன்னலமற்ற பெருந்திரளானவர்கள் எமது சமூகத்தில் இருந்திருக்கிறார்கள். இன்றும் வாழ்கிறார்கள். மக்களின் வாழ்வை செம்மையாக்குவதற்கு சீராக்குவதற்கு இன்று வாழ்பவர்கள் பங்களிக்கமுடியும். பங்களிக்க வேண்டும். ஆனால் அவநம்பிக்கைகள்  அதிகரித்துள்ளன. மிகவும் நெருக்கடியான ஒரு வரலாற்றுக் காலகட்டத்தில் தோழர் சுபத்திரன் -றஞ்சன்- றொபேட்டின் பங்களிப்பு வரலாற்று முக்கியத்துவம் வாய்ந்தது. சகலவிதமான சமூகத் தழைகளிலிருந்தும் விடுதலை, அறிவு, நியாயத்தின் வெளிச்சத்தில் விடயங்களை அவர் நோக்கினார். தேசிய ஒடுக்கமுறைக்கெதிரான போராட்டத்திற்கப்பால் சமூக சமத்துவத்திற்கான அக்கறைகள்  அவரிடமிருந்தன.

யோன் ரீட்டின் உலகைக்குலுக்கிய 10 நாட்களை பாடசாலை நாட்களிலேயே வாசித்தருந்தார். அது சோவியத் புரட்சியின் மகத்தான தருணங்கள் பற்றிய அமெரிக்க பத்திரகையாளரின் அனுபவம் உள்ளுரில் சமூகத் தழைகளை அறுத்தெறிந்த  ஆளுமை கொண்டவராக நண்பர்களையும் பெருமளவு ஊர் மக்களின் நேசத்திற்குரியவராகவும் காணப்பட்டார்.

தான் வாழும் சமூகம் பற்றிய கூர்மையான அவதானிப்பு அக்கறை அவரிடமிருந்தது. சோசலிச சமூகத்தின் சாத்தியத்திற்கான வழிகள் பற்றிய தேடல் அவரிடமிருந்தது. 1990 களின் மத்தியில் சோசலிச முகாமில் ஏற்பட்ட தகர்வு பல கேள்விகளையும் வாதப்பிரதிவாதங்களையம் ஏற்படுத்தியிருந்தது. தோழர் றொபேட் இதில் ஆர்வத்துடன் பங்கு பற்றினார். இன்று “வரலாறு பின்னோக்கி இயங்குவதில்லை” என்ற விதி இன்று நிரூபிக்கப்பட்டு வருகிறது

அமெரிக்கா, கிரேக்கம், மத்திய கிழக்கிலும், மியன்மாரிலும,; வேறுபல நாடுகளிலும் ஏற்பட்டு வரும்  மாற்றங்கள் இதனைத்தான் நிரூபிக்கின்றன தோழர் றொபேட் கனவில் மிதப்பவரல்ல. நிஜத்திலே காலூன்றி நின்ற ஒரு யதார்த்தவாதி.  ஈழமாணவர் பொதுமன்றத்தினூடாக தனது அரசியல் பயணத்தை தொடங்கிய தோழர் றொபேட் உடனடி நேரடிச் செயற்பாட்டாளராக விளங்கினார்

“கூட்டத்தில் கூடிநின்று கூடிப்பிதற்றலன்றி நாட்டதில் கொள்ளாரடி கிளியே நாளில் மறப்பாரடி”- பாரதி

அவர் சொற் சிலம்பக்காரர் அல்ல. அவர் இயக்க செயற்பாடுகளுடன் சம்பந்தப்படுவதற்கு முன்னரே பரவலான வாசிப்பு சமூக அனுபவம் அவரிடமிருந்தது.  கவித்துவ உள்ளமும் இலக்கிய ஈடுபாடும் கொண்டவர். சர்வதேச திரைப்படவிழாக்கள் ,இலக்கிய கூட்டங்கள், நாடகப் பட்டறைகளை அவர் தவற விடுவதில்லை. அர்ப்பணத்துடனும் துணிச்சலுடனும் செயற்பட்ட தோழர் றொபேட் தாம் யாருடைய நம்பிக்கைக்குரியவரோ அந்த நம்பிக்கைகளை எப்போதும் அதனைப் பராமரிப்பதில் சிரத்தை கொண்டிருந்தார். தான் மக்களுக்குரைத்த விடயங்களில் தான் முன்னுதாரணமாக இருக்கவேண்டும் என்று  கருதியவர். ஜனநாயக அரசியல் சூழல் ஒன்றை ஸ்தாபிப்பதில் அர்ப்பண உணர்வுடன் செயற்பட்டார். அவலங்களுக்குள்ளான மக்களுக்கு உதவுதல், தோழர்களுக்கு தலைமைதாங்கி வழிநடத்துதல்  தனித்துவமாக மிளிர்ந்தார். இயக்கம் ,தோழர்கள் சொந்தக்காலில் நிற்பதற்கான பொருளாதார முயற்சிகளையும் பல அபாயங்கள் மத்தியில் முன்னெடுத்தார்.

மிகவும் கடினமான காலத்தில் ஒரு உறுப்பினராக இருந்துகொண்டு மாநகரசபை செம்மையாகச் செயற்படுவதற்கும் மக்களுக்கு இயன்றவரை காரியங்கள் ஆற்றப்படுவதற்கும் அவர் உதவினார். யாழ் நூலகம் மீண்டும் திறக்;கப்பட்டபோது அதனை திறக்கக் கூடாது என பலரும் ஆர்பாட்டம் பண்ணி அது ஞாபகச்சின்னமாக இருக்கவேண்டும் ,யாழ்ப்பாணம் என்றென்றும் சுடலைபோல் இருக்கவேண்டும் என்று அந்த மானிட விரோதிகள் அழிச்சாட்டியம் பண்ணிய வேளையில் அதனை புதுமெருகுடன் திறந்து வைப்பதில் மேயர் செல்லன் கந்தையன் -தமிழர் விடுலைக் கூட்டணி ,புளொட், ஈபிடிபி ஆகிய கட்சிகளுடன் இணைந்து செயற்பட்டவர்

அதிகாரப்பகிர்வு கட்டமைப்பொன்று ஏற்படவேண்டும், ஜனநயக அரசியல் பேணப்படவேண்டும்.. ஒடுக்கப்பட்ட மக்களின வாழ்வில் விடிவு வேண்டும் ,இன சமூகங்களிடையே நல்லுறவு வேண்டும் என்று நடைமுறையில் செயற்பட்டவர். மாற்று கருத்துடையவர்களால் பெரிதும் மதிக்கப்பட்டவர். இராணுவ முகாம்களிலும் சிறையிலும் சக தமிழ் கைதிகளால் பெரிதும் மதிக்கப்பட்டார். இயக்கத்திற்கப்பால் அவருக்கு தோழர்கள் நண்பர்கள் அதிகமாக இருந்தார்கள் . நகைச்சுவை யுடன் கலந்த இனிமையான நட்புணர்வு அவரிடமிருந்தது யாழ்ப்பாணக்காரியாலயத்தில் அவரை சந்திப்பதற்கு பாரபட்சம் இல்லாமல் அனைவருமே அவருடன் உறவு பாராட்டினார்கள.; சாமானியர்கள், ஊடகவியலாளர்கள், கல்விமான்கள் என பலரும் அவரது நண்பர்களாக இருந்தார்கள்.

2002-2003 முற்பகுதி பெருமளவு தென்னிலங்கை நண்பர்கள் அவரிருந்த யாழ்ப்பாண காரியாலயத்தில் வந்து தங்கிச் செல்வார்கள். தமிழகத்தில் முகாம்களில் வாழும் தோழர்களின் நலன்களில் இடையறாது அக்கறை செலுத்தி வந்தவர். எங்கு துன்பங்கள் நெருக்கடிகள் நிலவியதோ அங்கெல்லாம் அவர் நின்றார். பாராளுமன்ற உறுப்பினர்கள், மாகாண சபை உறுப்பினர்களது தார்மீகம் அல்ல. அவையெதையும் எதிர்பாக்காத இயக்கத் தார்மீகம் .

எந்த பிரதிபலனையும் எதிர்பாராது மக்கள் நலனில் அக்கறை செலுத்துவது. அவரது ஊர் மேற்கு நுணாவில் கிராமம். அதனுள் நுழையும் போது இனம் புரியாத சோகம் நெஞ்சை நெருடுகிறது. பாழடைந்த அவருடைய வீடு, தாய்தந்தையரின் மரணம், சுற்றாடலில் அவரது தோழர்கள் நண்பர்களின் மரணங்கள் எல்லாம் மனக்கண்முன் வந்து போகின்றன. கிராமத்தின் ஆன்மா கலகலப்பு தொலைந்து போய்விட்டதைப்போல. வடக்கு கிழக்கில் பலகிராமங்கள் அப்படித்தான்.

துர்கோனிவன் “தந்தையரும் தனயரும்” நாவலின் தனயின் கல்லறைக்கு வயோதிப்பெற்றோர்கள் செல்லும் போது ஏற்படும் துயரத்தை ஓத்த ஆழ்ந்த வெறுமையின் அமைதி கலந்த துயரம் மேற்கு நுணாவிலில் ஏற்படுகிறது. எமது மக்களுக்கு எழிலார்ந்த வாழ்க்கையை கனவு கண்ட தோழர் றொபேட் தமது 45 வது வயதில்  புலிகளால் படுகொலைசெய்யப்பட்டார்.

தோழர் றொபேட் அவரைப்போன்ற பலரின் படுகொலை ஈழப்போராட்டத்தின் வங்குறோத்தை அம்பலப்படுத்தியிருக்கிறது. இத்தகைய மனிதர்களின் உழைப்பு சமூகத்தேவை என்பன இங்கு நிராசையாக்கபட்டுள்ளன. 30 வருட யுத்தம் முடிவடைந்த பின்னராவது இவை பற்றி யாரும் கேள்வி எழுப்பி உள்ளனரா? நடந்த பிழைகள் பற்றி பேசப்பட்டதா? இந்த பிழைகளால் பல ஆயிரக்கணக்கானவர்கள் மடிந்திருக்கிறார்கள். அதை பற்றி சொரணை- சூடு எம்மிடம் இருக்கிறதா? இந்த சமூகத்தில அர்ப்பணத்துடன்  பணியாற்றி மரணித்த மனிதர்கள்; மதிக்கப்படாவிட்டால் எமது கோரிக்கைளுக்கு என்ன தார்மிக வலு இருக்கும். செத்தவர்கள் போகட்டும் . இருப்பவர்கள் சமூகத்தை ஏமாற்றும் மட்டரக அரசியலை மேற்கொள்வோம் என்ற போக்கு இன்று பிரதானமாக இழையோடுகிறது.

இத்தகைய மனிதர்கள் வாழ்ந்ததற்கும் இன்று நிகழ்பவற்றிற்கும்  என்ன சம்பந்தம். சுய நலமும்- ஏமாற்றும்- மோசடியும் தானே ஆதிக்கம் பெற்றிருக்கின்றன. அர்ப்பணிப்புக்களை திரிபு படுத்துவதற்கும,; கொச்சைப்படுத்துவதற்கும் முயற்சிகள் நிகழ்கின்றன. இயக்கங்களில் இருந்து எஞ்சியவர்கள், சமூக நியாய உணர்வு கொண்டவர்களும் தான் இந்த அர்ப்பணிப்புக்களின் தார்மீக வலுவை நிலைநாட்டவேண்டும் எதிலுமே சம்பந்தப்படாதவர்கள்,சுத்தமானவர்கள், மாண்டவர்களும் எஞ்சியவர்களும் தீண்டத்தகாதவர்கள் என்று கருதும் கயமைகள் பற்றி எச்சரிக்கையாய் இருப்போம். அவர்கள் ஏற்கனவே தமிழ் அரசியலில் ஆதிக்கம் பெற்றுவிட்டார்கள்.

தவறுகளை மூடி மறைக்கமுடியாது. அவை உண்மையின் வெளிச்சத்தில் துருவப்படவேண்டும். ஆனால் எல்லாவற்றையும் இழக்கத்தயாராக இருந்தவர்களை என்றென்றும் எம் இதயத்தில் இருத்தி வைப்போம். இவர்களின் மரணத்தின் நிகரற்ற பெறுமதியை நாம் வரலாற்றில் நிலைநாட்டியாகவேண்டும்

குறிப்பு1 :

தோழர் றொபேட்டின் 9 வது ஞாபகார்த்த தினத்திற்கு எமுதப்பட்டது. இன்று அவரது 55வது பிறந்த தினத்திற்கு மறுபிரசுரம் செய்யப்படுகிறது.

குறிப்பு2:

1995  யாழ் இடம்பெயர்விற்கு பின்னரான சூழ்நிலையில் ஜனநாயக சூழலை உருவாக்குவதில பல பேர் பங்களித்திருக்கிறார்கள். திரு வல்லி சுந்தரம் , ,திருமதி சரோஜினி யோகேஸ்வரன், திரு .சிவபாலன், திரு ரவிராஜ் ,திரு கிருபா மாஸ்டர், ஊடகவியலாளர் நிமலராசன் ,திரு  சிவதாசன், முன்னாள் யாழ் மத்திய கல்லூரியின்  அதிபர் இராசதுரை மாஸ்டர், திரு செபஸ்ரியன் இருதயராஜன், கிராமசேவகர் ஆனந்தராசா ,திரு பாலநடராச ஐயர், திருமதி மகேஸ்வரி வேலாயுதம், திரு மதிமுகராசா, திரு தங்கவடிவேல்,  திரு ரவீந்திரன் இளங்கோ மாநகரசபையின் ஊழியர்கள்  அதிகாரிகள் இயக்கங்களின் அங்கத்தவர்கள் மனித உரிமைவாதிகள் ஆசிரியர்கள்  அரச ஊழியர்கள் சாதாரண பொதுமக்கள் என பலரும் இதில் முன்நின்று பங்களித்தவர்கள்.

 யாழில் ஒரு இயல்புநிலையை ஜனநாயகத்தை ஏற்படுத்துவதற்கு தமது உயிரையும் பொருட்படுத்தாது பாடுபட்டவர்கள் .

தோழர் சுகு