இலங்கையில் ஆட்சி மாற்றம் ஏற்பட்டு ஆறு வாரங்கள் கடந்த நிலையில் வட மாகாணசபை யுத்தத்தின் இறுதி நாட்களில் நடந்த பேரழிவு இனப்படுகொலை. ஜெனிவா அறிக்கை உரியகாலத்தில் - வரும் மார்ச் மாதத்தில் வெளியிடப்படவேண்டும் என்று தீர்மானம் நிறைவேற்றியுள்ளது. முன்னாள் உயர்நீதிமன்ற நீதியரசரும் வடக்கு முதலமைச்சருமான விக்னேஸ்வரன் அவர்கள் வழமையான இலங்கையின் சுதந்திரத்திற்கு பின்னரான வரலாற்றை சொல்லி யுத்தத்தின் இறுதி நாட்களில் நிகழ்ந்த அனர்த்தங்கள் வரையும் குறிப்பிட்டு இதனை வலியுறுத்தினார்.

புதிய அரசாங்கம் விசேட அதிகாரம் கொண்ட ஜனாதிபதி முறைமையை நீக்குவது ஊழலற்ற நிர்வாகம், நிர்வாகத்தில் அரசியல் தலையீடுகளை தவிர்ப்பது சமூகங்களிடையே புரிந்துணர்வை ஏற்படுத்துவது, ஜனநாயகத்தை மேம்படுத்துவது, மலையகத்தின் வீடமைப்புத் திட்டங்களை உருவாக்குவது, அரச, தனியார் துறை ஊழியர்களின் ஊதியத்தை அதிகரிப்பது, சாதாரண மக்கள் மீதான விலைவாசி சுமைகளை குறைப்பது, சிவில் நிர்வாகத்தை பலப்படுத்துவது, மக்களுக்கு நேசமானதாக அதனை உருவாக்குவது உள்ளிட்ட பல்வேறு விடயங்களை தனது 100 நாள் வேலைத்திட்டத்தில் உள்ளடக்கியுள்ளது. சுற்றாடல் பாதிப்புக்களை ஏற்படுத்தாத விதமாக பேண்தகவு கட்டமைப்புக்களை உருவாக்குவது என்பவற்றை தேர்தல் வாக்குறுதியாக அளித்துள்ளது.

தவிர உயர்பாதுகாப்பு வலயங்களை அகற்றுவது, பல ஆண்டுகளாக இடம்பெயர்ந்து வாழும் மக்களை தமது சொந்த இடங்களில் குடியேற்றுவது, அரசியல் கைதிகளை விடுதலை செய்வது, பயங்கரவாதத் தடைச்சட்டத்தை நீக்குவது உள்ளிட்ட விடயங்களை சாத்தியமாக்குவது அரசியலமைப்பில் பாரிய சீர்திருத்தங்களை செய்வது இலங்கையின் பல்லின பாங்கை உறுதி செய்வது உள்ளிட்ட பல விடயங்கள் நிகழலாம் என்ற எதிர்பார்ப்பையும் உருவாக்கியுள்ளது.

நடக்குமோ நடக்காதோ போதிய அவகாசத்தை அளிக்காமல் வடக்கு மாகாணசபை எடுத்தேன் கவிழ்த்தேன் என்றவாறு தீர்மானங்களை சபையில் நிறைவேற்றுவது, நீண்டகால நோக்கில் தமிழ் மக்களுக்கு நன்மை பயக்குமா என்பது முக்கியமான கேள்வியாகும். தேவையில்லாமல் சம்பந்தா சம்பந்தமில்லாமல் மோதல் நிலைமைகளை தோற்றுவிப்பது மாகாணசபை ஆக்கபூர்வமான முறையில் இலகுவாக செயற்படுவதற்கு உதவுமா? என்பதெல்லாம் தவிர்க்க முடியாத கேள்வியாகும்.

உண்மையில் இவர்களுக்கு பிரச்சினைகளுக்கு தீர்வு காண்பதில் அக்கறை இருக்கிறதா? என்ற கேள்வி எழுகிறது.  தமிழ் மக்களின் நீண்டகால அன்றாட விடயங்களுடன் இவர்கள் விளையாடுகிறார்களா என்ற ஐயத்தை தோற்றுவித்துள்ளது. மனித உரிமை மீறல்கள் தொடர்பில் ஐ.நா வின் அணுசரனையுடன் உள்நாட்டில் நியாயமான விசாரணைகள் மேற்கொள்ளப்படும் என இந்த அரசு உறுதியளித்துள்ளது. இந்த சூழ்நிலையில் வடக்கு மாகாணசபை இப்படியொரு தீhமானத்தை கொண்டுவந்ததன் மூலம் பேரினவாத சக்திகளை பலப்படுத்தும் மூலோபாய தவறொன்று விடப்பட்டிருக்கிறது.

நிலைமை சீர் செய்யப்பட வேண்டும் என்பதைவிட அராஜக வழிகளில் நிலைமையை மோசமடையச் செய்யும் காரியங்களே நடைபெறுகின்றன. இவர்கள் கூறும் சர்வதேச சமூகம் இவர்களுடைய நடைமுறையை ஆதரிக்கப் போவதில்லை. எதிரான பிரதிபலிப்புக்களும் தனிமைப்படுத்தல்களுமே இங்கு மிச்சமாகும். புதிய அரசுக்கு சந்தர்ப்பத்தை வழங்காத இந்த அராஜகம் சமூகப் பொறுப்பற்ற தனத்தின் வெளிப்பாடாகும். கொஞ்சமேனும் முன்னேற்றகரமாக இருக்கும் நிலைமைகளை பின்தள்ளுவதாகவும் இது அமைந்துள்ளது.

புதிய அரசின் பிரதமர் இனப்பிரச்சனையை தீர்ப்பதற்கான தமது உறுதிப்பாட்டை வெளிப்படுத்தியுள்ளார். தமிழ் தேசிய கூட்டமைப்பின் தலைவர் இரா.சம்பந்தன் அவர்களும் இதுபற்றிய நம்பிக்கையை வெளிப்படுத்தியுள்ளார். இத்தகைய சூழ்நிலையில் இந்த தீர்மானம் இனசமூகங்களிடையே ஐக்கியத்தை விரும்பும் சக்திகளை பலவீனப்படுத்தி அதிதீவிர இனவாத சக்திகளை பலப்படுத்துவதாகவே அமையும். 70 வருடங்களுக்கு மேலாக நிலவும் பிரச்சனை இன்னும் வரம்பற்ற காலத்திற்கு நீடித்துச் செல்வதற்கே வழிவகுக்கும்.

தற்போது ஆட்சியில் இருப்பவர்கள் தமக்கு வாக்களித்த மக்களின் எதிர்பார்ப்புக்களை ஒரேயடியாக புறக்கணித்துவிட முடியாது. சமூக ஏற்றத்தாழ்வு இடைவெளி அதிகரித்த சூழ்நிலையில் அத்தியாவசியப் பொருட்களின் விலைகளை குறைக்க வேண்டிய சீர்திருத்தம் மேற்கொள்ள வேண்டியிருந்தது. அரச தனியார் துறை ஊழியர்களின் ஓய்வூதியர்களின் ஊதியத்தை அதிகரிக்க வேண்டியிருந்தது. ஒரு குறிப்பிட்ட குடும்பத்தினருக்கு விசுவாசமான இராணுவ கட்டமைப்பு, அதிகாரத்தை அனுபவித்த கட்டமைப்பு நீடித்து நிலவுவது இன்றைய ஆளும் தரப்பினருக்கும் விருப்பமான விடயமல்ல.

சிவில் வகைப்பட்ட ஜனநாயக நிலவரங்களை நோக்கி நகர வேண்டிய தேவையிருக்கிறது. அதைநோக்கி வரலாறு உந்தித் தள்ளிக்கொண்டிருக்கிறது. 1970கள் தொடக்கம் இந்த நாட்டில் நிலவும் ஜனநாயக சீர்குலைவு நிலைகளிலிருந்து மீளவேண்டியிருக்கிறது. பயமற்று ஒவ்வொரு மனிதரும் மனித சமூகமும் சுதந்திரமாக வாழ்வதற்கான நிலைமைகள் ஸ்தாபிக்கப்பட வேண்டியிருக்கிறது. அதற்கான வாய்ப்புக்களை கதவுகளை அடைத்துவிடும் அதிதீவிர நிலைப்பாடாகவே வடக்கு மாகாணசபையின் நடவடிக்கைகளை கருத முடியும்.

வடக்கு மாகாணசபை கவனம் செலுத்த வேண்டிய விடயங்கள் ஏராளம் இருக்கின்றன. பெண்கள் தலைமை தாங்கும் குடும்பங்களின் சுதந்திரமான வாழ்வு, இடம்பெயர்ந்தவர்களின் மீள்குடியேற்றம், தண்ணீரில் எண்ணெய் கழிவுகள் கலந்ததனால் சுன்னாகம் அதன் சுற்றுப்புறங்களில் ஏற்பட்டுள்ள பாரிய சூழலியல் பிரச்சனைகள், குடிநீர் வசதிகளை அதிகரிப்பது உள்ளுர் தெருக்களை செப்பனிடுவது, கல்வி, சகாதார நிலைகளை மேம்படுத்துவது சுற்றாடல் அழிவு சவால்களை எதிர்கொள்வது இளைஞர் யுவதிகளுக்கு வேலைவாய்ப்புக்களை அதிகரிப்பது. மாகாணசபைக்குரிய அதிகாரங்களை முழுமைப்பெற செய்வது உள்ளிட்ட ஏராளம் பிரச்சனைகள் நிறைந்து கிடக்கின்றன.

இவற்றையெல்லாம் விட்டுவிட்டு போதையூட்டும் சுலோகங்களுடன் யதார்த்தத்துக்கு புறம்பாக செயற்பட முனைகின்றனர். உண்மையில் உலக உள்ளுர் யதார்த்தங்கள் இங்கு புரிந்துகொள்ளப்படவில்லை. பிரச்சனைகளுக்கு தீர்வு காண்பதற்கான தற்போதைய சந்தர்ப்பம் இழக்கப்பட்டு விடுமோ என்ற ஐயம் எழுந்துகொண்டுதான் இருக்கிறது.
நிதானமில்லாத போக்குகள் பல சந்தர்ப்பங்களில் பாரிய நட்டத்தை சேதாரத்தை எமது சமூகத்துக்கு ஏற்படுத்தியிருக்கின்றன என்பதை இவர்கள் மீண்டும் மீண்டும் உணர தலைப்படுகிறார்கள் இல்லை.

மனித உரிமைகள் பற்றிய அக்கறைகளை இங்கு யாரும் குறைகூறி விட முடியாது. ஆனால் அது 'நெஞ்சில் உரமுமின்றி நேர்மை திறனுமின்றி' செய்யும் வஞ்சனையாக இருக்கமுடியாது.
எனவே சிந்தித்து தூரநோக்கில் எமது மக்களுக்கு எவையெவை நன்மைபயக்கும் அவல வாழ்விலிருந்து விடுதலையையும் விமோசனத்தையும் பெற்றுத்தரும் என்ற நன் நோக்கிலிருந்து செயற்பட வேண்டும். அற்ப அதிகார தேர்தல் நோக்கங்களுக்காக மக்களுக்கு தீங்கு விளைவிக்கும் தீர்மானங்கள் தவிர்க்கப்படல் வேண்டும்.

வடக்கு மாகாணசபையின் தீர்மானம் இனப்பிரச்சனைக்குத் நிரந்தர தீர்வு காண விரும்பும் அண்டை நாடு மற்றும் சர்வதேச சக்திகளுக்கு அசௌகரியத்தையும் சங்கடத்தையும் ஏற்படுத்தியுள்ளது. இவ்வாறான அவ நம்பிக்கையை மக்களால் தெரிவுசெய்யப்பட்ட பிரதிநிதிகள் ஏற்படுத்துவது எமது பிரச்சனைகளை நாளடவில் யாரும் பொருட்படுத்தாத நிலைமைக்கு கொண்டு சேர்ப்பிக்கும்.

வடக்கு மாகாணசபையின் தீர்மானம் டெல்லியில் அதிருப்தியை தோற்றுவித்துள்ளதென்பதை நாம் அங்கிருந்து வரும் செய்திகளினூடாக உணர முடிகிறது. முதிர்ச்சியற்ற எல்லாவற்றையும் போட்டுடைக்கின்ற செயற்பாடாக இது பார்க்கப்படுகிறது. அதிகாரப்பரவலாக்கல் தொடர்பாக தென்னிலங்கையில் கரிசனை கொண்ட சக்திகளையும் இது பலவீனப்;படுத்துகிறது. சந்தர்ப்பங்கள் நழுவவிடப்படுகின்றன. எரிச்சலடைவதற்கான நிலைமைகள் வலுவடைவதில் தமிழ் மக்களுக்கு மேலும் மேலும் பின்னடைவையே ஏற்படுத்தும். எனவே தவறுகள் உடனடியாக சரி செய்யப்படல் வேண்டும். இதற்கான அழுத்தங்கள் மக்கள் கல்வியலாளர்கள் மத்தியிலிருந்து எழ வேண்டும்.
(சுகு-ஸ்ரீதரன்)

அமைதி சமாதானம் ஜனநாயகம்

www.sooddram.com