மீள் இணக்கம்

இலங்கையில் சிறுபான்மைச் சமூகங்கள் பரந்து கலந்து வாழ்ந்தாலும் பெரும்பான்மையினர் சிறுபான்மையினர் என்று இந்த நாடு மனோரீதியாக பிளவு பட்டுப் போய்க் கிடக்கிறது. பிளவு படுத்தப்பட்டிருக்கிறது. இலங்கை சமூகங்களை ஜனநாய அடிப்படையில் மனோரீதியாக ஒன்றிணப்பதில் பாரிய அலட்சியம் காட்டப்படுகிறது. சிறுபான்மையினரை கண்காணிப்பில் வைத்திருத்தல் அவர்களுடைய அன்றாட நடவடிக்கைகளை கூர்ந்து அவதானித்தல் என்பன யுத்தத்திற்குப் பிந்திய பெரும் போக்காக காணப்படுகிறது.

அதிகாரப்பரவலாக்கலை நடைமுறைப்படுத்துவதிலும் சரி இராணுவப்பிரசன்னத்தை குறைப்பதிலும் சரி சமகால உலகின் முன்னேறிய நாடுகளின் விடயங்களை இங்கு கருத்திற்கெடுக்கவோ புரிந்து கொள்ளவோ தவறுகிறார்கள். கனடாவில் கியூபெக் மாநிலம் இணைந்திருக்கவேண்டுமா பிரிந்திருக்க வேண்டுமா என்ற வாக்கெடுப்பில் கியூபெக்கியர்கள் இணைந்து வாழ்வதற்கு வாக்களித்தார்கள்.

பிரித்தானிய ஸ்கொட்லாந்து அரசாங்கமாக பாராளுமன்றத்தையே கொண்டிருக்கிறது. சுவிற்சலாந்து போன்ற நாடுகள் பல்வேறு மொழிப்பிரவினருக்குமான கன்டோன்களைக் கொண்டிருப்பதோடு மிகச்சிறிய இராணுவத்தையும் கொண்டுள்ளது. இந்தியா பல்வேறு இனமொழி பண்பாட்டுசமூகங்களை ஜனநாயக வழியில் இணைத்து வைத்திருக்கிறது.

இந்தியாவின் மாநில அதிகார பகிர்வின் பரிணாமம் மாநிலக்கட்சிகளே இந்திய ஆட்சியினைத்  தீர்மானிக்கும் அளவிற்கு முன்னேறியிருக்கின்றன.சேர்ந்து வாழ்வதற்கான மன நிலையைக் கட்டியெழுப்பாமல் பிரிவினைவாதம் மதங்களின் செல்வாக்கு பற்றி இனவாதக் கூச்சல்களைக் கிளப்புகிறார்கள். சிறுபான்மைச் சமூகங்களை அடக்கி ஒடுக்கி வைத்திருத்தல் என்பது தமிழர்கள் முஸ்லிம்கள் கிறிஸ்தவர்கள் என்றவாறு நடைபெறுகின்றன.

170 வருடங்களுக்கு இந்த நாட்டில் வாழ்ந்த மலையக மக்களுக்கு அவர்கள் வாழும் லயன் அறைகள் கூடச் சொந்தமில்லை. இந்த நாட்டில் ஆகக் குறைந்த ஊதியம் பெறும் தொழிலாளர்கள் அவர்களே. மதநல்லிணக்கத்தை அறத்தைப் போதிக்க வேண்டிய துறவிகள் பலசேனாக்களை உருவாக்கி முஸ்டியை உயர்த்தி நிற்கிறார்கள். சிறுபான்மைச் சமூகங்கள் இந்த நாட்டில் அந்நியர்கள் என்ற கருத்துருவை எல்லா வழிகளிலும் பலவந்தப்படுத்துகிறார்கள்.130 வருடங்களுக்கு மேலாக இந்த அரசியல் இன்றளவில் தொடர்ந்து கொண்டு தான் இருக்கிறது.

இந்த நாட்டின்  முன்னேற்றத்திற்கு பெரும் பங்கு வகிக்கப்போவது இந்த நாட்டின் மனித வளமே. இந்த வளம் தனது முழு சக்தியையும் பிரயோகிக்க கூடிய வகையில் தன்னம்பிக்கையையும் சுதந்திரத்தையும் கொண்டதாக இருந்தால் தான் உருப்பட முடியும். இந்த நாட்டில் இருந்து ஒன்றரை மில்லியன் மக்கள் புலம்பெயர்ந்து போனது ஒன்றும் தற்செயல் நிகழ்ச்சி அல்ல. மனிதர்களால் மேற்கொள்ளப்பட்ட நடவடிக்கைகளே இதற்கு காரணமாக இருந்தன. வெறுப்பும் பகையும் வறுமையும் இவ்வளவு பெருந்தொகையில் ஆட்களை நாட்டை விட்டு விரட்டியது. என்னதான் சொன்னாலும் இந்த நாட்டில் ஜனநாயகம் மோசமாகப் பழுதடைந்திருக்கிறது.

கண்ணுக்குத் தெரிந்த தெரியாத அச்சுறுத்தல்கள் இருந்து கொண்டிருக்கின்றன. இராணுவமயமாக்கல் பயங்கரவாத தடைச்சட்டம் போன்றன உடனடியாக காலாவதியாக வேண்டும். இந்த நாட்டின் சகல மக்கள் தொடர்பிலும் அபகீர்த்தி மிக்க இரத்தம் தோய்ந்த சட்டம் அது. சக சமூகங்கள் மீது வெறுப்பு உமிழும் சக்திகள் அரசினால் போசிக்கப்படக் கூடாது. சமூகங்கள் நெருங்கி வருவதற்கு பீதி கொள்ளாமல் ஒன்றையொன்று அனுசரித்து வாழ்வதற்கான நிலை கட்டியமைக்கப்படவேண்டும்.

சுகு-ஸ்ரீதரன்

07-01-2014