கொழும்பு, யாழ் பல்கலைக்கழகத்திலும் பின்னர் ரோக்கியோ பல்கலைக்கழகங்களிலும் நவீன வரலாறு மற்றும் சர்வதேச அரசியல் கற்கைப் பேராசிரியராக பணியாற்றியவர்.
முற்போக்கு ஜனநாயகவாதியாகவாதியும் - உரிமைச் செயற்பாட்டாளருமான சீலன் கதிர்காமர்  25.07.2015 இல் தனது 81வது வயதில் காலமானார். அவர் 1930 களில் யாழ்ப்பாணத்தில் ஸ்தாபிதமான இளைஞர் காங்கிரஸ் பற்றிய விவரணத்தை புதிய தலைமுறைக்கும் எதிர்காலத்திற்குமாக மும் மொழிகளிலும் பதிவு செய்தார். நாடு தழுவிய சமூக ஜனநாயக அக்கறைகளை அவர் கொண்டிருந்தார். இலங்கையின் உண்மையான சுதந்திரத்தை நேசித்த யாழ்ப்பாணத்தின் தீண்டாமை, அநீதிகளை எதிர்த்த ஒரு இயக்கம் யாழ்ப்பாணத்தில் உருவானது பற்றியும், இந்திய சுதந்திர இயக்கத்துடன் அதற்கிருந்த தொடர்பு பற்றியும் முக்கியமான வரலாற்றுப்பதிவை மேற்கொண்டவர்.

வழமையாகப் பேசப்படும் அலுப்புக்கொள்ள வைக்கும் வரலாற்றை விட வித்தியாசமான ஆர்வமூட்டும் ஒன்றது. எமது பகுதிகளில் முற்போக்கு இயக்கத்தின் வேர் எது என்பதை அறிவார்ந்த முறையில் அடையாளம் காட்டினார். இன சமூகங்களிடையே நல்லுறவுக்காகவும் தீண்டாமை சமூக அநீதிகளுக்கு எதிராகவும் அவர் கரிசனை கொண்டிருந்தார். சமூகத்துடன் தொடர்புபட்டு செயற்படுவது பற்றிய பிரக்ஞை அவரிடம் இருந்தது. எமது கிராமங்களில் ஆங்கில அறிவை விருத்தி செய்வது கல்வியின் தரத்தை உயர்த்துவது -உயர் கல்விச் சீர்திருத்தம் பற்றிய அக்கறைகள் இருந்தன.

நீதிக்கும் சமத்துவத்துக்குமான இயக்கத்தில் மிக நெருக்கடியான காலத்தில் காலஞ்சென்ற தோழர் பரராசசிங்கம், வண பிதா ஜெயசீலன் போன்றவர்களுடன் இணைந்து வட பகுதியில் பணியாற்றினார். 1981 இல் யாழில் நேர்ந்த அனர்த்தங்கள் பற்றி விரிவான முக்கியத்துவம் வாய்ந்த பதிவுகளை ஆங்கில- தமிழ் மொழிகளில் மேற்கொண்டவர். குறிப்பாக யாழ் பொது நூலகம், ஈழநாடு பத்திரகை காரியாலயம், புதிய சந்தை எரிக்கப்பட்டது- படுகொலைகள் அராஜகங்களை ஆதாரபூர்வமாக சிறப்பாக பதிவு செய்தார்.

இந்த இருண்ட நாட்களில் யாழ்ப்பாணத்தில் அரச பயங்கரவாதம் என்ற பிரசுரத்துடன் தென்னிலங்கையில் இருந்து சமூக நல்லெண்ணம் இன சமூக அக்கறைகளை நாடுவோர் வந்திருந்தனர். இவர்கள் இங்கு வந்து பாதிக்கப்பட்ட தமிழ் மக்களுக்கு ஆதரவைத் தெரிவித்ததில்,இங்கு அரங்கேற்றப்பட்ட அராஜகங்களை நாடும் உலகும் அறியச் செய்ததில் சீலனின் பங்கு முக்கியமானது. நாம் ஈழமாணவர் பொதுமன்றமாக செயற்பட்ட காலத்தில் எமக்கு நம்பிக்கை அளிப்பவராக சீலன் விளங்கினார். முற்போக்கான மாணவர் இளைஞர் இயக்கங்களின் உருவாக்கம் எப்போதும் அவருக்கு ஆர்வமூட்டுவதாக இருந்தது.

1982 இல் ஜே.ஆர் பாராளுமன்றத்தின் ஆட்சிக்காலத்தை அடுத்த 6 ஆண்டுகளுக்கு நீட்டிக்கும் ஜனநாயக விரோத சர்வசன வாக்கெடுப்பை நடத்த ஆயத்தமாகியிருந்தார். வழமையான தேர்தல் பகிஸ்கார எண்ணத்திலேயே ஈழமாணவர் பொதுமன்றமாக செயற்பட்ட நாம் இருந்தோம். சீலன் இத்தேர்தலில் பாராளுமன்றக்காலத்தை நீட்டிப்பதற்கெதிராக மக்கள் வாக்களிக்குமாறு செயற்படுங்கள் என்று எமக்கு ஆலோசனை கூறினார்.

1980களின் முற்பகுதியில் யாழ்பல்கலைக்கழகத்தின் மறுமலர்ச்சிக்கால பேராசிரியர் அவர்.
அக்காலத்தின் சிறப்பு வாய்ந்த முற்போக்கு புத்திஜீவிகள் குழாம் என்ற மரபைச் சாந்தவர். தேடலும் சமூகப்பிரக்ஞையும் உள்ள மாணவர்களாலும் முற்போக்கு ஜனநாயக முகாமைச் சோந்தவர்களாலும் அறியப்பட்டவர். பெரிதும் நேசிக்கப்பட்டவர். அவரின் மறைவு அறிவுலகத்தில் ஒரு சமூகம் சார் வெற்றிடமே.

அறிவார்ந்த இணக்கமான சமூக வாழ்வை ஏற்படுத்துவதற்கான அவரின் கனவுகள் நிகழ்காலத்திற்கும் எதிர்காலத்திற்கும் அவசியமானவை. அவரின் புதல்வர்களில் ஒருவரான அகிலன் கதிர்காமரும் தனது தந்தையின் பிரக்ஞைகளின் செல்வாக்கிற்கு உட்பட்டவர்.
ஆங்கில விரிவுரையாளரான அவரது துணைவியார் புதல்வர்கள் எல்லோருமே பேராசிரியர் சீலனின் இடையறாத செயலூக்கமான சமூக அக்கறைகளுக்கு உறுதுணையாக இருந்தார்கள்.
“வையத்துள் வாழ்வாங்கு வாழ்வது” எவ்வாறு என்பதை சீலன் உணர்த்திச் சென்றார்.

(சுகு- ஸ்ரீதரன்)

அமைதி சமாதானம் ஜனநாயகம்

www.sooddram.com