(சுகு-ஸ்ரீதரன்)

தோழர் சிறில் காலகே நேற்றைய தினம் கொழும்பில்(மாலபேயில்) விபத்தொன்றில் கொல்லப்பட்டார். அவர் மரணிக்கும் போது அவரது வயது 60களின் எல்லையைத் தொட்டிருக்கும்  கடந்து வந்த 20 வருடங்களுக்கு மேலாக எம்மோடு பணியாற்றியவர். 1980களின் இருண்டநாட்களில் தனது வேலையையும் துறந்து தமிழகத்தில் வாழ்ந்தவர். தமிழ் மொழியிலும் பரிச்சயமானவர். மொழிபெயர்ப்பு மற்றும் எழுத்தாற்றலும் அவரிடம் காணப்பட்டன. இடதுசாரி குழுக்கள், தொழிற்சங்கவாதிகள் முற்போக்கான ஊடகவியலாளர்கள் மற்றும் தனிமனிதர்களுடன் உறவைப் பேணினார். எந்த சமூப்பணியும் சிறிதோ பெரிதோ கடினமானதோ அலுப்புச் சலிப்பின்றி செய்யும் மனிதர்.
இலங்கையின் பல்லின சமூகங்கள் ஒன்றிணைந்து மாற்றத்தைக் கொண்டு வரமுடியும் என்ற நம்பிக்கை கொண்டவர்.

எப்போதும் புன்முறுவல் பூத்த முகத்துடன் ---தோழர்களால் சிறில் தோழர் பெரிதும் நேசிக்கப்பட்டார். அவர் தலைமறைவாக இருந்தகாலத்தில் அவரது குடும்பம் வறுமையில் வாடியதும் அவரது பிள்ளையின் கல்வி பாதிக்கபட்டது. ஆனால் ஐக்கியப்பட்ட சமூக மாற்றத்திற்கான கனவு எப்போதும் இருந்து கொண்டிருந்தது. பட்டினியும் மரணங்களும் எழுச்சியும் வீழ்ச்சியும் நிகழ்ந்த போதெல்லாம் அவர் எமது சகதோழராக நின்றிருந்தார்.
இலங்கையில் சமூக மாற்றம் இனசமூகங்களின் உரிமையும் சமத்துவமும் ஜனநாயக இடைவெளி என்பவற்றில் அக்கறை கொண்டிருந்தார்.

2000ஆம் ஆண்டின் முற்பகுதியல் அவரது துணைவியார் புற்றுநோய்க்கு ஆட்பட்டு இறந்தார்.
அவரும் அவரது வாழ்க்கையில் அவரது இலட்சியங்களுக்கு துணையான நல்லியல்பான பங்காளி. தமது குடும்ப நெருக்கடிகளை அவர் பகிரங்கமாக காட்டிக் கொண்டதில்லை.
கொழும்பு ஹவ்லொக் டவுன் தபால் நிலையத்தில் வேலைசெய்து 6,7 வருடங்களுககு முன்னர் தான் அவர் ஓய்வு பெற்றார். நீண்டகாலம் வேலையில்லாமல் துன்பங்களை சிரமங்களை அனுபவித்தார்.

அவர் சென்னை திருமலை கொழும்பு என எம்முடன் பணியாற்றினார். தெற்கும் வடக்கும் இணைந்து செயற்படுவதற்கான சந்தர்பங்களை உருவாக்குவது பற்றி இடையறாது வலியுறுத்தினார். அவரது ஆரம்பம் தீவிர இடதுசாரி அரசியலாகவே இருந்தது.
போர்க்குணம் மிக்க கொழும்பு தொழிலாளவர்க்க உணர்வுடன் தன்னை பிணைத்துக் கொண்டவர். கொழும்பு பிப்பிலியானவை பிறப்பிடமாக கொண்ட சிறில் தொழிற்சங்க இயக்கங்களிலும் செய்றபட்டவர். இனிய சுபாவமும் வறுமையும் அவருக்கு ஒருசேர வாய்த்திருந்தன.

சமூகமாற்றத்திற்கான இயக்கத்தை கட்டியெழுப்பும் பாரிய வேலைகள் பற்றிய கனவுகள் இருந்தன. அவர் மீண்டும் திருமணம் செய்து அமைதியாக வாழமுற்பட்டடார். நீரிழிவு நோய் அவரை அடிக்கடி வைத்திய சாலை வார்டுகளில் தஞ்சமடைய வைத்தது. இப்போது சோக விபத்து. திடீர் மரணம். அவரது வாழ்க்கை அர்த்தமுள்ளதாக நேர்மையானதாக இருந்தது.
ஆனால் அதற்கான அங்கீகாரம் எமது சமூகங்களில் மிக மிக குறைவு.

தோழர்கள் ஜோ, முத்துலிங்கம், புல்சரா, ராம் மறைந்த சாந்த போன்றவர்களுடன் இணைந்து எம்முடனும் இணந்து செயற்பட்டவர். தோழர் நபா மற்றும் தோழர்களிடம் பேரபிமானம் கொண்டிருந்தார். திடீர் விபத்தொன்றில் வீதியில் நடந்து சென்று கொண்டிருந்த சிறில் கொல்லப்பட்டார். அவரைப்போன்ற மனிதர்கள் இந்த நுகர்வுக்கலாச்சார உலகில் வாழ்வது சாதியமா என்ற கேள்வி இருக்கிறது. மது அருந்துவது அவருடைய தவிர்க்கமுடியாத பழக்கமாக இருந்தது. சிறில் போன்ற வாழ்க்கை அனுபவங்களை கொண்டவர்கள் அவ்வாறில்லாமலும் வாழமுடியாது என்பதும் உலகியல் யதார்த்தம்.

சிறில் அழகான உன்னதமான மானிட ஆன்மா. அது போன்றன விசாலித்தால் இந்த உலகம் பாரபட்சமற்ற கள்ளம் கபடமற்ற நிர்மலமான அழகிய உலகம் . சிறில் என்ற மனிதர் இவ்வாறு தான் கட்டமைக்கப்பட்டிருந்தார் என்பது எனது அனுபவம் . 'அகத்தின் அழகு முகத்தில் தெரியும்'; என்பார்களே சிறிலின் மனவசீகரம் அவரது முகத்தில் பளிச்செனத் தெரியும்.
அவரது இறுதிக்கிரியைகள் அவிசாவளையில் நிகழும்.
(சுகு-ஸ்ரீதரன்)

அமைதி சமாதானம் ஜனநாயகம்

www.sooddram.com