வெனிசுலாவின் ஹியூகோ சாவேஸ்

(தி.ஸ்ரீதரன்)

வரலாறு அவ்வப்போது புரட்சியாளர்களை, சுதந்திர போராட்ட வீரர்களை, அற உணர்வு வாய்ந்த உன்னதமான மனிதர்களை உருவாக்கிக் கொண்டுதான் இருக்கிறது. தனது 58வது வயதில் புற்று நோயுடன் போராடி மரணித்த தோழர் சாவேஸ் லத்தின் அமெரிக்காவின் ஒரு புதிய இளம் விடிவெள்ளியாக உருவாகியிருந்தார்.  சாவேஸ் வெனிசுலாவினதும், லத்தின் அமெரிக்காவினதும் ஏழை மக்களின் விடிவுக்காக தன்னை அர்ப்பணித்தார்.

கேட்பதற்கு நாதியின்றி எண்ணெய் வளம் ஏகாதிபத்தியவாதிக சூறையாடப்பட்டுக் கொண்டிருந்தது. எண்ணெய் வயல்களையும் ,தொழில் துறைகளையும்  தேசிய மயமாக்கி லத்தின் அமெரிக்காவின் சகோதர நாடுகளுடன்  அதனை பகிர்ந்து கொண்டு சாதாரண வெனிசூலா மக்களின் வாழ்க்கையை மேம்படுத்துவதற்கு தனை பயன்படுத்தினார்.

உணவு, இருப்பிடம், கல்வி, சுகாதாரம், மின்சாரம் உள்ளிட்ட சேவை துறைகள் வளர்ச்சியடைவதற்கு சாவேஸ் பாரிய பங்களிப்பை வழங்கினார். எங்கள் செல்வம் கொள்ளை கொண்டு போவதோ நாங்கள் சாவதோ என்ற வெனிசூலாவின் அவல நிலையை மாற்றினார். 1990 களின் நடுப்பகுதியில் அவர் வெனிசுலா மக்களின் மகத்தான தலைவராகத் திகழ்ந்தார். வெனிசுலா மக்களின் வாழ்விலும் அவர் பாரிய மாற்றங்களை கொண்டு வந்தார். தோழர் பிடலை நண்பராக, வழிகாட்டியாக ஏற்றுக்கொண்டிருந்தார்.

அவர் சமூக மாற்றத்தின் மீது அபார நம்பிக்கை கொண்டிருந்தார். அவர் மரணமடைந்தபோது லட்சோபலட்சம் வெனிசூலாவின் மக்கள் கண்ணீர் விட்டார்கள். தங்கள் குடும்பத்தில் உற்ற சுற்றத்தில் ஒருவர் இறந்ததைவிட அழுத்தமான துயரம்.

‘மனதினில் ஒளி உண்டானால் வாக்கினில் ஒளியுண்டாம்’ என்பார்கள் சாவேஸ் ஒரு பிரகாசமான தோற்றம் கொண்ட மனிதர். கருணை, அன்பு அவரின் கண்களில் தேங்கியிருந்தது. அவரைப் பற்றி மேற்கத்திய, வட அமெரிக்க ஊடகங்கள் என்ன தெரிவித்தாலும் சாவேஸின் சாதனைகளை அவர்களால் மூடி மறைத்துவிட முடியவில்லை.

இவ்வாறான வரலாற்று இயங்கியலின் தவிர்க்க முடியாத விளைவு சாவேஸ் இப்படியான மனிதர்கள் வரலாறு பூராவும் உருவாகிக் கொண்டேயிருப்பார்கள். அவர் வெனிசூலாவிற்கு பொலிவேறியா என்ற பெயர் மாற்ற விரும்பினார்., ஸ்பானிய காலனியாதிக்கத்திற்கு எதிராக போராடிய முதிய தலைமுறைதலைமுறை தலைவர் சீமோன் பொலிவர் (1783 –  1830) அவர் மிகுந்த பற்றுக் கொண்டிருந்தார்.

தோழர் பிடல் கஸ்ரோ தனது எழுத்துக்களிலும், பேச்சுகளிலும் 1930 களில் காலனியாதிக்கத்திலிருந்து விடுதலையடைய முன் ஜனநாயக புரட்சிக்காகவும், புரட்சி இயக்கத்துக்கும் தலைமை தாங்கிய ஜோஸ் மார்ட்டியை எப்போதும் நினைவு கூருவார்.

இது லத்தின்அமெரிக்காவின் ஒரு மரபும் கூட. எல்சல்வடோரின் மார்ட்டி தேசிய விடுதலை இயக்கம், நிக்கரகுவாவின் சாண்டினிஸ்டாக்கள் தமது மூதாதையர்களின் போராட்டங்களை மனதில் இருத்தியும் அந்த பெருமித உணர்வுகளுடன்தான் போராடினார்கள்.

சீனாவில் சன்யாட்சென்னையும், இந்தோசீனத்தில் (வியட்நாம், கம்பூச்சியா, லாவோஸ்) அரசர் சிகானுக்கையும் போன்றவர்களின் காலனியாதிக்கத்திற்கு எதிரான போராட்டங்கள் பின்வந்த புரட்சியாளர்களால் பெரிதும் மதிக்கப்பட்டன.

ஆனால் தமது நாடுகளில் இத்தகையோர் பற்றிய பார்வை குறைபாடுகள் இருக்கின்றன. காலனியாதிக்கத்துக்கு எதிரான இந்திய தேசிய சுதந்திர இயக்கம் பற்றிய எந்த பிரக்ஞையும் இல்லாமல் இலங்கையில் 1930 கள் தொடக்கம் 1950 கள் வரை இலங்கையில் இடதுசாரிகளின் பங்களிப்பு பற்றிய பிரக்ஞை எதுவுமில்லாமல் ஒரு சமூக மாற்றத்துக்கான இயக்கத்தை நாம் முன்னெடுக்க முடியாது.

சாவேஸ் அவர்கள் பதவிக்கு வந்த முறை பாரம்பரியமான புரட்சி வரைவிலக்கணங்களுக்கு விதிவிலக்கானதாக இருந்தாலும் அவர் லத்தின் அமெரிக்க சூழ் நிலையில் ஒரு புரட்சியாளன் என்பதை யாரும் மறுதலித்துவிட முடியாது.

சம காலத்தில் லத்தின் அமெரிக்காவில் ஒரு விழிப்புணர்ச்சியை ஏற்படுத்தியதில் தோழர் சாவேஸின் பங்கு மகத்தானது. சிறு பொறி பெரும் காட்டுத்தீயை மூட்டும் என்பது போல் லத்தின் அமெரிக்காவில் அதிர்வலைகளை ஏற்படுத்தியிருந்தார். தோழர்கள் சே, பிடல் போன்ற எண்ணற்ற புரட்சியாளர்கள் இட்ட விதை இன்று விருட்சமாகிக் கொண்டிருக்கிறது.

சோவியத் யூனியனின் வீழ்ச்சியுடன் சோசலிசம் போய்விட்டது மக்கள் கிளர்ச்சிகளும், காலாவதியாகிவிட்டன சமூக மாற்றங்களும் சாத்தியமில்லை என்ற மாயைத் திரையை ஜனநாயக புரட்சி சமூக மாற்றங்கள் என்ற கிளர்ச்சி ஒளிக்கீற்றுக்கள் கிழித்தெறிந்துள்ளன.

லத்தின் அமெரிக்காவில் மத்திய கிழக்கில் அமெரிக்கா தொடக்கம் எதென்ஸ் வரையிலும் அமைதியின்மை தொழிலாளர், வெகுஜன கிளர்ச்சிகள் ஏற்பட்டுக் கொண்டுதான் இருக்கின்றன. மேற்கத்திய வட அமெரிக்க பத்திரிகைகள் கூட சாவேஸ்க்கான வெகுஜன ஆதரவையும், அவருடைய மக்களுக்கான பணிகளையும் மூடி மறைக்க முடியவில்லை.

புவி வெப்பமாதல் பூமியின் இயற்கை சூழலின் அழிவை, ஏகாதிபத்திய உலக ஒழுங்கு முறை இருக்கும் வரை மாற்ற முடியாது என்று கூறியவர் அவர்.

அவருக்கு எமது சிரம் தாழ்ந்த எமது அஞ்சலிகள்.

தி.ஸ்ரீதரன்
பொதுச்செயலாளர்
பத்மநாபா ஈ.பி.ஆர்.எல்.எப்