1964-1987
1964 ஆம் ஆண்டு மார்ச் 30 ஆம் நாள் நடராசா இரத்தினம்மா தம்பதியினரின் புதல்வராகப் பிறந்தார். சிறு வயதிலிருந்தே அமைதி ,ஆழ்ந்த சிந்தனை, பொறுப்புணர்வு, நிதானம், துடிப்பு ,செயலாற்றல், இயல்பாக அமைந்திருந்தன. பலராலும் விரும்பப்படும் வசீகரம் இருந்தது.
உரும்பிராய் சைவத்தமிழ் ,மகாஜனா கல்லூரிகளில் பயின்றவர். தமது பள்ளிநாட்களிலேயே தோட்டம் வீடு என எல்லாவிதமான வேலைகளிலும் ஈடுபட்டார். கவிதை மற்றும் இலக்கிய ஈடுபாடு, நேர்மை சமூக அக்கறை கொண்டவர். 1983 இன்முற்பகுதியில் புலம்பெயர்ந்து சுவிற்சலாந்து சென்றவர் சில மாதங்களிலேயே இலங்கையில் நிகழந்த இனவன்முறை கலவரங்கள் - நிகழ்ந்த சம்பவங்களின் பாதிப்புக்கள் தாக்கங்களால் மீண்டும் நாடு திரும்பி ஈழப்புரட்சி அமைப்புடன் தன்னை இணைந்து சமூக அரசியல் செயற்பாடுகளில் ஈடுபட்டார்.

ஒரு சமூக மாற்றத்திற்காக தன்னுடைய இளமைக்கால- மற்றும் குடும்ப வாழ்க்கை- அரவணைப்பு எல்லாவற்றையும் துறந்து தன்னை முழுமையாக அர்ப்பணித்தவர்.
ஆடம்பரம் , போலித்தனம், மூடத்தனம் ,அடிமைத்தனம் இவற்றை அடியோடு வெறுத்தார்.
சமத்துவமான ஏற்றத்தாழ்வற்ற ஒரு சமூகத்தை உருவாக்கவேண்டும் என்ற கனவிருந்தது .
இவர் போன்ற எத்தனையோ போராளிகளை நாம் இழந்திருக்கிறோம்.
இந்த மக்களின் வாழ்வை நேசித்து -இச் சமூகத்தின் நல்வாழ்விற்காக தமது இளமைக்காலத்தையும், உறவுகளையும் தியாகம்செய்து முகம்தெரியாமலேயே மறைந்து போய்விட்டார்கள். அவர்கள் நினைவு கூரப்படவுமில்லை. அவர்கள் தியாகம் செய்ததற்கான அர்த்தமும் பெறுமானமும் இந்த சமூகத்தில் நிறுவப்படவுமில்லை.
ஆனால் இவர்களை போராட்டத்திற்கு வழிநடத்தியவர்கள் ??அவர்களின் வாழ்க்கைத் துறவறத்திற்கு தூண்டுகோலாக இருந்த பலர் வெளிநாடுகளில் சௌகரியமான வாழ்க்கையை தமக்கு அமைத்துக் கொண்டிருக்கிறார்கள் என்பது கசப்பான உண்மையாகும்.
புரட்சி --சமூகமாற்றம், பகுத்தறிவு என்றவர்கள் இன்று அத்தனை பத்தாம்பசலி- படுபிற்போக்கு -சம்பிருதாயங்கள் சடங்குகளுடன்- பகட்டு -ஆடம்பரங்களுடன் தாமும் தமது குடும்பமும் என்று வாழ்க்கையை சுருக்கியிருக்கிறார்கள். தம்மால் வழிநடத்தப்பட்டு இறந்து போனவர்கள் பற்றி எந்த மனக்கிலேசமும் இல்லை.
"இன்று இந்த சமூகத்திற்காக எதையும் இழக்கவோ, தியாகம் செய்யவோ முன்வராத பெரிய பிரளயங்கள் நிகழ்ந்த காலங்களிலெல்லாம் எந்த பிரக்ஞையும் இல்லாமல் இருந்தவர்கள் சுய நலமிகளாக தாங்களும் ,தங்கள் குடும்பமும் என, தங்கள் சொந்த வாழ்க்கைக்காக கல்வி -தொழில்- பணம் பதவி தங்களுடைய காலத்தை தமது சொந்த முன்னேற்றத்திற்காக மாத்திரம் பயன் படுத்தியவர்கள் இன்று மக்களின் தலைவிதியைத் தீர்மானிக்கின்ற முக்கியஸ்தர்களாகவும் அரசியல் பிரமுகர்களாகவும் இழந்த போராளிகளையும் அப்பாவி மக்களையும் அவர்களின் இழப்புக்களையும் -அவலங்களையும்- கண்ணீரையும் தமது சொந்த நலன்களுக்கு மூலதனம் ஆக்குபவர்களாக இன்று மக்கள் மத்தியில் வலம் வருகிறார்கள்".மக்களால் தெரிவு செய்யபட்டவர்களும் பெரும்பாலும் அவர்களே.
கடந்த காலத்தில் ஏற்பட்ட இழப்புக்களோ -மரணங்களோ- மனக்காயங்களோ அத்தனையும் அவற்றை சந்தித்த மக்களால் மட்டுமே உணரவோ அனுபவிக்கவோ முடியும்.
தொடர்ந்தும் ஏமாறுபவர்களாக மக்கள் இருக்குவரை ஒரு கூட்டம் இதை வைத்து பிழைப்பு நடத்திக் கொண்டே இருக்கும்.

(Gnanasakthy Sritharan)

அமைதி சமாதானம் ஜனநாயகம்

www.sooddram.com