இனசமூகங்களின் சமத்துவத்திற்காகவும், சர்வதேச சகோதரத்திற்காகவும்,  மானிடவிடுதலைக்காகவும் தோழர் நாபா மறைந்து 24 ஆண்டுகள்!

இந்திய- இலங்கை ஒப்பந்தத்தினடிப்படையில் அமைந்த அதிகாரப்பரவலாக்கல் திட்டத்தை அதனை தீண்டுவார் யாரும் இல்லாத காலத்தில் -1987 இல்- அதுபற்றிய குழப்பங்கள் தடுமாற்றங்கள், அகத்திலும், புறத்திலும் நிலவிய காலத்தில் அதனை முன்னெடுத்து செயற்படுத்த வேண்டும் என்று சிந்தித்த யதார்த்தமான திட உறுதி கொண்ட புரட்சியாளர்.  சக போராட்ட இயக்கங்கள், முற்போக்கு சத்திகளுடன் சமூகங்களுடன் ஐக்கியம், சர்வதேச சகோதரத்துவம் எமது சமூகத்தில் நிலவும் சாதி, பால் ,பிரதேச, வர்க்க ரீதியான ஒடுக்குமுறைகள் பற்றிய ஆழமான பிரக்ஞையுடன் பிரச்சனைகளை அணுகிய மனிதநேயன். அவருடைய முயற்சிகள், கனவுகள் நனவாகியிருந்தால் அதற்கு சரியான ஒத்துழைப்பு எமது சமுதாயத்தில் கிடைத்திருந்தால் இத்தனை  பேரழிவுகளை எமது மக்கள் சந்தித்திருக்கமாட்டார்கள். வரலாறு தியாகிகளை தற்காலிகமாக மறந்தாலும் அது தன்னைச் சரிசெய்யும் என்றே கருதுகிறேன்.

இந்திய சுதந்திர  இயக்கம் -நவ இந்தியாவைக் கட்டியெழுப்புவதில் ஜவஹர்லால் நேரு போன்ற தலைவர்களின் பங்களிப்பை நிந்தனை செய்ய அல்லது இருட்டடிப்புச்  செய்ய  சில சத்திகள் இன்றளவில் முயல்கின்றன. அது முயன்றாலும் முடியாது. வரலாற்றை அழித்தல், திருத்தல் செய்ய முடியாது. அதே போலத்தான் எம்மளவில் தோழர் நாபா போன்றவர்களின் பங்களிப்பும். தற்காலிக பின்னடைவுகள் இருந்தாலும் எதிர்கால வரலாறு அதனைப் பேசும்.

சக சமூகங்களுடன் நட்புறவார்ந்த விரிந்த பார்வை கொண்ட தலைவர்கள்  அருகி விட்டார்கள். இன்று பெரும்பாலும் அதிகார அகங்காரம் கொண்டவர்களும், திருடர்களும், மத, இனவாத ஆசாட பூதிகளும்தானே ஆதிக்கம் செலுத்துகிறார்கள.  'பேயரசு செய்தால் பிணம் தின்னும் சாத்திரங்கள் என்பார்கள். இந்த ஆசாட பூதிகளின் அரசியல் காலாவதியாகும் காலம் வெகு தூரத்தில் இல்லை. தோழர் நாபாவும் வாழ்வை அர்ப்பணித்த எமது சமூகத்தின் அனைத்து தியாகிகளையும் வரலாறு ஓரு நாள் விடுதலை செய்யும்.

தோழர் நாபாவின் மறைவிற்கு படுகொலை செய்யப்பட்ட முன்னாள் பாரதப்பிரதமர் ராஜிவ் காந்தி விடுத்த இரங்கல் செய்தியில் எனது தயாரும் நாபாவும் ஓரே லட்சியங்களுக்காகவே போராடினார்கள். ஒரே மாதிரியான மரணத்தை எதிர் கொண்டார்கள் என்று தெரிவித்திருந்தார்.

நாபாவின் பாரம்பரியம் வெ'வ்வேறு வகையில் அரசியல் ,சமூக, இலக்கியத் தளங்களில் இலங்கையிலும் புலம்பெயர் தளத்திலும் இன்றளவில் எமது சமூகத்தில் நிலவுகிறது. நாம் நாபா வழியினர் என்ற பெருமித உணர்வு கொண்டவர்கள் இருக்கிறார்கள். அது இயக்க குறுகிய எல்லைகளைக் கடந்தது. அது உலகளாவியது. அதை யாரும் அழித்து விட முடியாது . அது தன்னை நிலை நிறுத்தும்.

(சுகு-ஸ்ரீதரன்)

(குறிப்பு:முன்னர் ஒரு நினைவுநாளில் எமுதப்பட்டது. மீண்டும் இங்கே காலப்பொருத்தம் கருதி)