இந்திய பன்முக வாழ்வியலின் மீதான தாக்குதல்

(சுகு-ஸ்ரீதரன்)

சென்னை மத்திய ரயில் நிலையம். தென்னகத்தின் ஆத்மா ஒருவரலாற்றுக் குறியீடு. பல இன மத மொழி மானிடர்களின்  சங்கமம் அது. இந்தியாவின் 8 திசையிலும் இருந்தும்  மனிதர்கள் வருவதும் -போவதும்- காத்திருப்பதும் உறங்குவதுமாக வண்ணங்களின் கலவையாக அது எப்போதும் இருந்த கொண்டிருக்கும். மனிதர்கள் நாம் ஒன்றாக வாழலாம் என்ற பெருநம்பிக்கையை ஏற்படுத்தும் ஸ்தலம் அது. உலகளாவிய மானிடம் எப்படி இருக்கும் என்பதற்கு அது ஒரு மாதிரி. இத்தகைய இடங்கள் உலகில் பேணிப்பாதுகாக்கபடவேண்டிவை. மகத்தான வாழ்வின் ஆதார சுருதி. மனித குலத்தின் உயிர்ப்பு- ஜீவன் இங்கு இரவு பகலாக இருக்கும். இந்த ரயில்நிலையங்கள் பயணங்கள் பற்றி அற்புதமான பதிவுகள் இந்திய உன்னத இலக்கியங்கள் சினிமாக்களில் இடம்பெற்றிருக்கின்றன. தேசிய ஒருமைப்பாட்டின் சின்னம் இது. வாழ்வின் மீதானபிடிப்பை ஏற்படுத்தும் இடம்.

இந்த இடங்களில் குண்டுகளை வெடிக்கவைப்பவர்கள் மனித குலத்தின்மீது -வாழ்வின் மீது தீராத வெறுப்பை கொண்டவர்கள். 'சமரசம் உலாவும் இடம்' என்று சீர்காழி கோவிந்தராஜனின் குரலில் நெஞ்சை விட்டு நீங்காத பாடல் ஒன்றிருக்கிறது. ஆனால் அது மறைந்தவர்கள் உறங்கும் பூமி பற்றியது. ஆனால் 24 மணி நேரமும் இயங்கிக் கொண்டிருக்கும் இந்த ரயில் நிலையம் நிஜத்தில் ஒரு சமரசம் உலாவும் இடம். இந்தியாவில், உலகில் வெ'வ்வேறிடங்களில் மானிடர்கள் வண்ணங்களின் கலவையாக கூடும் மகத்தான இடங்கள் இருக்கின்றன. இந்த இடங்கள் மானிட தரிசனத்திற்கான மகத்துவம் பெற்றவை. மானிட கம்பீரத்தை வாழ்வின்  மகத்துவத்தை எடுத்தியம்புபவை.

இந்திய சுதந்திர இயக்கம்- இந்திய தொழிலாளவர்க்க இயக்க வரலாறு தொடர்பிலும் இந்த ரயில் நிலையம் முக்கியத்துவம் வாய்ந்தது. ரயில்வே துறைமுகம் தொழில்துறை தொழிலாளர்கள் சமூக மாற்றத்திற்கான முன்னணிப்பிரிவினராக இருக்கின்றனர். அதுவும் மே முதல் நாளில் தொழிலாளர் தினத்தில் இந்த அனர்த்தம் நிகழ்த்தப்பட்டிருக்கிறது. மனித குலத்தின் மீது வெறுப்பை உமிழ்பவர்கள் இந்த உலகில் வாழ்வதற்கு இடமில்லை என்ற நிலை உருவாக்கப்படவேண்டும். சாதாரண மக்களின் இரத்தத்தில் மகிழ்ச்சிகாணச் சொல்லி எந்த அறக் கோட்பாடும் சொல்லவில்லை.

குரூர இருண்ட மனம் கொண்டவர்களே இத்தகைய காரியங்களில் ஈடுபடுகிறார்கள். இந்த குரூர வழிமுறைகளை மானிட வாழ்விலிருந்து அகற்றுவதற்கு அறப்பேரியக்கங்கள நடத்தப்படவேண்டும். சுற்றாடல் பேரழிவுக்கெதிரான இயக்கம் போன்றே மனிதர்களை நேரடியாக அழிக்கும் அதில் குரூர இன்பங்காணும் செயற்பாடுகளுக்கெதிராகவும் இயக்கம் வேண்டும். இத்தகைய சம்பவங்கள் வெகுஜனங்கள் மத்தியில் விரக்தியையும் அவநமபிக்யையும் பாதுகாப்பற்ற உணர்வையும் ஏற்படுத்தும் சகல சமூக பொருளாதார செயற்பாடுகளை ஸ்தம்பிக்கச்செய்யும். எல்லோரும் இன்புற்றிருக்கவே இவ்வுலகு.

(சுகு-ஸ்ரீதரன்)