2013 இல் கேதாரிநாத்- பத்திரிநாத் பகுதிகளில் ஏற்பட்ட பெருவெள்ளம் மக்களின் வாழ்வையும், வரலாற்றையும் அழித்தது. 2004 இல் தெற்கு தென்கிழக்காசிய கரையோர மக்களின் வாழ்வும் பண்பாடும் சுனாமியால் அழிந்தது. இடையே சீனாவில், பிலிப்பைன்சில், யப்பான், புக்குசீமாவில் சுனாமி பூகம்ப பேரனர்த்தங்கள். காஸ்மீரில், வங்கத்தில், ஒரிசாவில், நமது பதுளை மிரியா பெத்தையில் பெருவெள்ள மண் சரிவு அழிவுகள் இன்னும் பல.....
இப்போது நேபாளத்தில் மரணம் வரலாற்றின் சிதைவு எவரெஸ்ட் அசைந்தது என உலகப் பத்திரிகைகள் தலையங்கம் தீட்டுகின்றன.
 

இதுவரை 8000 இற்கு மேற்பட்டவர்கள் உயிரிழந்திருக்கிறார்கள். இடிபாடுகள் அகற்றப்பட்டுக் கொண்டிருக்கின்றன. இந்தியாவும் உலகமும் நேபாளத்திற்கு அரவணைப்புக் கரத்தை நீட்டியுள்ளன. ஆனால் இயற்கையின் கோரத்தாண்டவத்தின் முன்னே வாழ்வு ஸ்தம்பிதமடையும் நிலையும், கையறுநிலையும், தனித்து அனாதரவாக விடப்பட்டதான மனநிலையும் மனித குலத்தின் ஒரு பகுதியனருக்கு ஏற்பட்டுக் கொண்டிருக்கிறது.
உள்ளககட்டமைப்பு போக்குவரத்து வசதி சுகாதார வசதி அவசர சேவைகளுகான வாய்ப்புக்கள் இல்லாத பகுதிகளில் நிராதரவாக மனிதர்கள் மரணிக்கிறார்கள்.

நேபாள புவி அதிர்வு சுற்றிவர உள்ள நாடுகளில் இந்திய பிகார், வங்கதேசம், தீபேத்,  பாகிஸ்தான், சீனா என வௌ;வேறளவுகளில் பாதிப்புக்களை ஏற்படுத்தியுள்ளது.ஊக வாணிபமும், பங்கு சந்தையும் ஏனைய காப்பிரேட் தொழிற்பாடுகளும் களைகட்டி நிற்க இயற்கை கோரத் தாண்டவம் ஆடுகிறது. கேதாரிநாத, பத்திரிநாத்தில் வெள்ளம் கரைபுரண்டு ஓடிய போது உருத்திரதாண்டவம் என இந்திய ஊடகங்கள் வர்ணித்தன. இப்போது வரலாற்றின் சிதைவு ,எவரெஸ்ட அசைந்தது என தலையங்கங்கள் தீட்டப்பட்டிருக்கின்றன.

சில வருடங்களுக்கு முன்னர் தான் நேபாளத்தில் முடியாட்சி வீழ்ச்சியும் ஜனநாயக மீட்பும் நிகழ்ந்தது. வெகுஜன எழுச்சி ஜனநாயகத்தின் நர்த்தனம் என்று அழைக்கப்பட்டது. தற்போது எவரெஸ்ட அசைகிறது.  சமூக வாழ்க்கையில் உள்ள முரண்பாடுகள், இயற்கையின் முரண்பாடுகள், இயற்கைக்கும் மனிதர்கள் மற்றும் ஜீவிராசிகளுக்கிடையே யான முரண்பாடுகள் தீவிரமடைந்துள்ளன. சுனாமி, பூகம்பம், பெருவெள்ள அனர்த்தங்கள் மக்கள் பாதுகாப்பான இடங்களுக்கு அகற்றப்படல் உட்பட உடனடியாகச் செயற்படுவதற்குமான தொழில் நுட்பங்கள் தொடர்பாக தீவிர கவனம் செலுத்தப்படவேண்டும். மனித குலம் எதிர் நோக்கும் பிரமாண்டமான சவால்கள் தொடர்பில் இது மிகவும் முக்கியதுவம் வாய்ந்தது.
சுனாமி அனர்த்தங்களிலிருந்து மீள ஒரு தசாப்தத்திற்கு மேல் சென்றது. குஜராத் பூகம்ப அனர்த்தத்தில் லட்சம் பேரை இழந்த பின்னரும் சில வருடங்களில் மீண்டது.
ஆனால் மனிதப்பேரழிவுகள் முழுதாக தடுக்கப்படக் கூடியதாக இல்லை.

புக்குசீமா அனர்த்தங்களில் சேதமடைந்த அணு உலைகளின் கதிர் வீச்சு தாக்கங்கள் இன்னும் தொடர்கின்றன. இந்த அனர்த்தங்களுள் வாழ மனித குலம் பழக்கப்டடிருக்கிறபோலும்.
எனவே கடந்தகாலத்தை விட உலகம் நெருக்கமாக செயற்பட வேண்டியிருக்கிறது.
இது வரை கண்டிராத மனித குல இயற்கை வரலாற்று விபரீதங்கள் இதனை கோரி நிற்கின்றன. நாம் மனித குலத்தைச் சேர்ந்தவர்கள் ஒன்றாக கரங்கோர்த்து ஒருவருக் கொருவர் உதவியாக இருக்கவேண்டும் என்ற நிலை உலகளாவிய அளவில் ஏற்படுத்தப்படவேண்டும்.
இயற்கை விடுத்துள்ள சவால் மனித குலம் ஒன்றாக நிற்கவேண்டியதன் அவசியத்தை நிர்பந்திக்கிறது.

ஆனால் காப்பிரேட் உலகமும் யுத்தவாதிகளும் இதனை அனுமதியார். எல்லைகள் தாண்டி உலகம் ஒன்றாக வேண்டும். இயற்கை விடுக்கும் செய்தி இது. இயற்கையின் சவால்களை எதிர் கொள்வதற்காகவே ஆதி மனிதர்கள் ஒன்றாக இயங்கவேண்டியிருந்தது. வர்க்கங்களாக பிளவுண்டு மனிதன் இயற்கையை வென்று விட்டான் என்று இறுமாந்திருந்த நேரத்தில் இப்புவிக்கோளின் இருப்பு எதிர்காலம் பற்றிய கேள்விகள் எழுந்துள்ளன. மனித குலம் ஒன்றாக சமத்துவமாக இயற்கையுடன் அனுசரித்து வாழ்வதையே இயற்கையின் வரலாறும் மனித குல வரலாறும் வலியுறுத்துகின்றன.

புவிக்கோளின் இயல்பான அனர்த்தங்களுக்கான தன்மைகளுக்கப்பால் வளச்சூறையாடல்- யுத்தம் என்பன இயற்கையையும் மனித குலத்தையும் அழிவின் விழிம்பில் நிறுத்தியுள்ளது.
மனித குல நாகரிகங்கள் வரலாறுகள் ஜீவராசிகள் இருப்பு என்பன அழிவடைவதை தடுப்பதற்கான உலகளாவிய இணைவும் உலகளாவிய சூறையாடல் சமூக அமைப்பின் தகர்வும் அவசியப்படுகின்றன. 3 வாரங்களின் பின் மீண்டும் நில அதிர்வு 50 இற்கு மேற்பட்டோர் உயரிழப்பு 1200 பேருக்மேல் காயம்  3 வாரங்களுக்குள் அடுத்தடுத்து அதிர்வுகளும் அழிவுகளும்  நேபாளமும், தென்னாசியாவும் பாதுகாப்பாக வாழ்வது முன்னெச்சரிக்கை நடவடிக்கைகள் பற்றி ஒருங்கிணைந்து சிந்திக்கவேண்டிய தருணம் இது.
(சுகு-ஸ்ரீதரன்)

அமைதி சமாதானம் ஜனநாயகம்

www.sooddram.com