நிறைவேற்று அதிகாரம்கொண்ட ஜனாதிபதி முறை இலங்கையில் இனி மேலும் நீடித்திருக்க வேண்டுமா?

(சுகு-ஸ்ரீதரன்)

ஜனாதிபதி தேர்தல் 2015 முற்பகுதியில் அனேகமாக நடைபெறும் என்பது போல் செய்திகள் வந்து கொண்டிருக்கின்றன.மகிந்த ராஜபக்ச 3 வது தடவையாக தேர்தலில் நிற்கப் போகிறார். 2 தடவைக்கு மேல் ஒருவர் ஜனாதிபதியாக இருக்கமுடியாது என்றிருந்த நிலை இப்போது எத்தனை தடவைகள் வேண்டுமானாலும் என்று 18 வது திருத்தச்சட்ட மூலத்தின் மூலம் வழி வகுக்கப்பட்டிருக்கிறது.

ஊவா மாகாண சபைத் தேர்தலில் ஆளும் தரப்பிற்கு கடந்த காலத்தை விட வாக்குகள் குறைந்தது எதிர்க்கட்சி வட்டாரங்களில் பரபரப்பான சூழ்நிலையை உருவாக்கியுள்ளது. ஜனநாயகம் பற்றி அதன் எதிர்காலம் பற்றி அக்கறைப்படுபவர்கள் விசேட அதிகாரம் கொண்ட கொண்ட ஜனாதிபதி முறையை நீக்கவேண்டியதன் அவசியத்தை வலியுறுத்துகிறார்கள்.

1978 அரசியல் யாப்பினால் உருவாக்கப்பட்ட விசேட அதிகாரம் கொண்ட ஜனாதிபதி முறை பயங்கரவாத தடைச்சட்டம் போன்றவை இலங்கையில் ஜனநாயக இடைவெளியை அரித்தழித்து வந்திருக்கிறது. அது வந்த கையோடு பயங்கரவாத தடைச்சட்டமும் வந்தது. 1980களில் வேலைநிறுத்தத்தில் ஈடுபட்ட தொழிலாளர்கள் 40 ஆயிரம்பேர் வேலையில் இருந்து நீக்கப்பட்டு வீதிக்கு விரட்டபட்டனர். .முன்னாள் பிரதமர் ஸ்ரீமாவோ பண்டாரநாயகாவின் குடியியல் உரிமையைப் பறித்தது.

1981 , 1983 இல் நிகழ்ந்த தமிழ்மக்களுக்கெதிரான வன்முறைகள் சமூகங்களிடையே விரோதங்களை வளர்ப்பதற்கு இது பயன்படுத்தபட்டிருக்கிறது. 1980களின் நடுப்பகுதியல் தெற்கில் நடந்த கிளர்ச்சிகளை அடக்குவதில் நிகழ்ந்த மனித உரிமை மீறல்கள் கடந்து வந்த 30 வருடகால யுத்தம் ,மனித உரிமை மீறல்கள் ஜனநாயக இடைவெளி குறுகிச் சென்றதில் இது பெரும் வரலாற்று பங்கை வகித்துள்ளது.13 வதன் கீழான அதிகாராப்பரலாக்கல் மற்றும் ஜனநாயக கட்டமைப்புக்களை அது சிதைத்தழித்து வந்திருக்கிறது.

இந்த விசேட அதிகாரம் கொண்ட ஜனாதிபதி முறை ஜனநாயக வளர்ச்சிக்கான எந்த நெகிழ்வுத்தன்மைகளையும் கொண்டிருக்கவில்லை. நவதாராளவாத பொருளாதார முறைமைகளுடன் நிலமானிய சாயல் மற்றும் வம்சம் இராணுவமேலாதிக் நிலைமைகளை நோக்கி நிலைமைகள் மோசமடைந்துள்ளன. ஊழல், விரயம் ,தொழிற்சங்க உரிமைகள் மீதான அன்றாட தாக்குதல்கள் ,சிறுபான்மை சமூகங்களின் மீதான நிர்ப்பந்தங்கள்,; ,சமூக அமைதியன்மை ,அராஜகநிலை அதிகரித்து செல்வதில் இந்த விசேட அதிகாரம் கொண்ட ஜனாதிபதி முறைமை ஒரு பிரதான பாத்திரத்தை வழங்கியது.

இது பாராளுமன்றம்- மாகாண சபைபோன்ற சட்டவாக்க சபைகளை மாத்திரமல்ல நீதி மற்றும் சட்டம் ஒழுங்கு துறையையும் அர்த்தமிழக்கச் செய்துள்ளது. விசேட அதிகாரம் ,நவதாராளவாத பொருளாதாரக் கொள்கை என்பன அராஜக பொருள் உற்பத்தியையும் சமூக இடைவெளியையும் அதிகரிக்கச்செய்திருக்கின்றன. அளவு கடந்த அதிகாரத்தின் பேரில் மக்கள் எதுவும் இல்லாதவர்கள் ஆக்கப்பட்டிருக்கிறார்கள்.

ஜனநாயகம் அரித்தழிக்கப்படுவது  சுதந்திர உணர்வுள்ள மனிதர்களை அரங்கில் இருந்து அகற்றி கூழைக் கும்பிடுபோடும் அணியொன்றை உருவாக்கியுள்ளது. தகுதியில்லாதவர்கள் -அரசியல் நியமனங்களாக பல அதிகாரப்பதவிகளுக்கு வந்திருக்கிறார்கள்.  அரசியல் செல்வாக்குப் பெற்ற குண்டர்கள் சமூக மட்டத்தில் உருவாகியிருக்கிறார்கள் .இவற்றின் செயற்பாடுகள் தட்டிக் கேட்க முடியாதவையாக மாறியுள்ளன. படைத்துறையினரும் சாமானிய மனிதரை விட சிறப்புமுன்னுரிமைகளைப் பெற்றிருக்கிறார்கள் .

கல்வி ,சுகாதாரம் போன்றவற்றிற்கான ஒதுக்கீடுகளை விட ஒதுக்கீடு படைத்துறைக்கான ஒதுக்கீடு பலமடங்கானது. ஓப்பிட முடியாதது. பெரும்பான்மை மக்களை யுத்த பெருமித மன நிiயில் வைத்திருப்பதும் கற்பனை எதிரிகளை உருவாக்குவதுமான போக்குகள் நிலவுகின்றன.

தற்போதைய விசேட அதிகாரம் கொண்ட முறையை நீக்குவது மாத்திரமல்ல, பாராளுமன்றம்,மாகாண சபை, நீதி மற்றும் சட்டம் ஒழுங்குத்துறைகளின் சுயாதீனம் தனித்துவம் தொடர்பாக தீவிர மறு சீரமைப்பு நிகழவேண்டியிருக்கிறது. பயங்கரவாத தடைச்சட்டம் நீக்கப்படவேண்டும். படைமுதல் நிலைக்குப் பதிலாக கல்வி, சுகாதாரம், சுற்றாடல் சமூகப் பாதுகாப்பிற்கான ஒதுக்கீடுகள் அதிகரிக்க்கபடவேண்டும். பல்லினப்பாங்கு உறுதிப்படுத்தப்படுவதும் அதிகாரப்பரலாக்கலும் ஜனநாயக மயப்படுத்தலில் பிரதான அங்கமாகும். தொழிலாளர்கள் மற்றும் தொழிற்சங்க உரிமைகள் பாதுகாக்கப்படவேண்டும். தற்போது விசேட அதிகாரம் கொண்ட  ஜனாதிபதி பதவிக்கான தேர்தலை விட அடுத்த இரண்டு வருடங்களுக்கு மேலிருந்து கீழ் தீவிரஅரசியல் யாப்பு, ஜனநாயக சீர் திருத்தங்கள் தேவைப்படுகின்றன.

(சுகு-ஸ்ரீதரன்)