வடக்கு மாகாண சபைத் தேர்தலின் பின்னர் இழந்து விட்ட இன்னொரு சந்தர்ப்பம்.

(சுகு-ஸ்ரீதரன்)

13 வது தின் கீழான அதிகாரப்பரவலாக்கல்; வடக்கு கிழக்கில் பலப்படுவதற்கு அர்த்தமுள்ளதாக்குவதற்கு பாரதப்பிரதமரின் வருகை உதவிகரமாக இருந்திருக்கும். இந்தியா ஏற்கனவே இலங்கையில் குறிப்பாக வடக்கு கிழக்கில் தொடங்கியுள்ள வீடமைப்பு, வீதி, தண்டவாளம் முதலீடுகளுக்கான கட்டமைப்புக்கள் துரித கதியில் அபிவிருத்தி திட்டங்களை முன்னெடுப்பதற்கு உபயோகமாக இருந்திருக்கும். 22 ஆண்டுகளாக இடம்பெயர்ந்து வாழும் மக்களின் மீள்குடியேற்றம், மற்றும் கடல்வளப்பாதுகாப்பு  இருதரப்பு மீனவர்களின் வாழ்வாதாரப்பிரச்சனைகள் பற்றியும் ஆக்கபூர்வமான பிரச்சனைகள் பற்றிய ஆக்க பூர்வமான பேச்சுவார்த்தைகள் செயலுருவாக்குவதற்கும்  வழிவகுத்திருக்கும்.

பிரதானமாக இலங்கை பல்லினங்களின் நாடு என்ற வகையில் அனைத்து மக்கள் பிரிவினரின் நலன்கள் பொறுப்புணர்ச்சியான அணுகுமுறையே தேவைப்பட்டது. தற்போதைய நிலையில் ஒருதரப்பினரை மறுதரப்பார் பீதியூட்டி பிரச்சனைகளுக்குத் தீர்வு காணமுடியாது. இலங்கையை ஜனநாயக மயப்படுத்துவதற்கான காரியசாத்தியமான அக்கறைகள் வெளிப்படுத்தப்பட்டிருக்கும்.

என்னதான் சொன்னாலும் பொதுநலவாயம் உடப்ட பல சாவதேச அவயங்களில்  இந்தியாவிற்கென பிரத்தியேக மரியாதை இருக்கிறது. நிகழ்ந்திருந்தால் இந்தியப்பிரதமரின் பிரசன்னமே முக்கியத்துவம் பெற்றிருக்கும். கமரோன் கூறியபடி 2014 மார்ச்சின் பின்னர்  வழமையை விட வேறொன்றும் நிகழப்போவதில்லை. அவரின் யாழ் பிரசன்னம் சிங்கள மக்களை இலங்கை அதிகாரத்தை சுற்றி அணிதிரள வைத்திருக்கிறது. அவ்வளவுதான்.

அதிசயங்கள் ஏதும் நிகழ்ந்தால் தவிர ராஜபக்ஸக்களின் ஆட்சி   இன்னுமொரு 15 ஆணடுகாலம் ஆட்சியில் நிலைப்பதற்கான சாத்தியமே இருக்கிறது. அவர்கள் தற்போது சிங்கள மக்களின் ஏக பிரதிநிதிகள்?

இந்தியப்பிரதமரின் வருகையை தமிழ் தேசியக் கூட்டமைப்பு வலியுறுத்தவில்லை. பகிஸ்கரிப்பு அரசியல் சமூகத்திற்கு ஆக்கபூர்வமானதாக இருந்ததில்லை. அது எமது சமூக வரலாற்று அனுபவமும் கூட. பொதுவாக நாட்டிலும் குறிப்பாக வடக்கு கிழக்கில் இரண்டு விடயங்கள்   செயற்படுத்த வேண்டியிருக்கின்றன. இராணுவமயமாக்கல் நிலையிலிருந்து விடுவித்தல், அதிகாரப்பரவலாக்கல் கட்டமைப்பை பலப்படுத்துவது.

மனித உரிமைகள் என்னும்போது கடந்த 30  ஆண்டுகளில் இலங்கை அரசு, புலிகள் உட்பட போராட்டத்தில் கிளர்ச்சியில் ஈடுபட்ட சகல தரப்பினராலும் மேற்கொள்ளப்பட்டவை பற்றி திறந்த மனதுடன் ஆராய வேண்டும். விவாதிக்கப்படவேண்டும். கண்டறியப்படவேண்டும். யுத்தத்தின் இறுதிக்கால பிரத்தியேகமானதும் பெருமளவிலானதுமான நிலையும் கருத்திற்கெடுக்கப்படவேண்டும்.

நவநீதம்பிள்ளை அவர்கள் இலங்கை வந்து திரும்பும் போது அரசின் சர்வாதிகாரப்போக்குபற்றியும் புலிகளின் படுகொலைவாதம் பற்றியும் தெளிவாக குறிப்பிட்டிருந்தார். விடயங்கள் இந்த முறையில் அணுகப்படவேண்டும்.

கமரோன் வந்தார். சரி ஆனால் எதிர்பார்ப்பையும் பதட்டத்தை ஏற்படுத்தி விட்டு ஆக்க பூர்வமாக ஒன்றுமே நடக்காமல் போவதற்கு சாத்தியமே அதிகமாக இருக்கிறது. ஒரு பக்கம் முதலீடுகளுக்கான கார்ப்பரேட் பெரும் படையணிகளுடன் அவர் வந்திருந்தார். மறுபக்கம் 2014 மார்ச் மாதத்திற்கிடையில்  உண்மைகளை கண்டறியும் குழுவின் அறிக்கையின் பரிந்துரைகள் நடைமுறைக்கு வராவிட்டால் சர்வதேச விசாரணையை வலியுறுத்தப்போவதாகவும் தெரிவித்துள்ளார்.

எமது அனுபவங்களிலிருந்து பட்டறிவிலிருந்து எது சாத்தியம் என்பதையும் பார்க்கவேண்டும்.

'கூட்டத்தில் கூடி நின்று  கூவிப்பிதற்றலன்றி நாட்டத்தில் கொள்ளாரடி நாளில் மறப்பாரடி' என்பது எமக்கு அனுபவ பாடம்.

கமரோனின் நாளாந்த அவரது உள்ளூர், இங்கிலாந்து அரசியலையும் எமது நீண்டகால நலன்களையும் கணக்கிலெடுக்க வேண்டும். எமக்கு காரியசாத்திய மானவற்றை எவ்வாறு செயலுருவாக்கி முன் கொண்டு செல்வது என்பதே முக்கியம்.

வடமாகாண சபையின் செயற்பாடுகள் பல்வேறு இராணுவ அதிகாரவர்க்க செயல்பாடுகளால் முடக்கப்படுவதாக வடக்கு முதலமைச்சர் கூறுகிறார். கிழக்குமாகாண சபையின் நிலை பற்றி பேச்சு மூச்சே இல்லை. மாகாணசபை உறுப்பினர் துரைரட்ணம் அவ்வப்போது வெளிப்படுத்தும் அறிக்கைகளைத் தவிர. தமிழ் மக்களின் பிரச்சனையை யாழ்ப்பாணப்பிரச்சனையாக வேறு குறுக்கிக் கொண்டிருக்கிறார்கள்.

இந்தியப்பிரதமரின் வருகையை தமிழ் தேசிய கூட்டமைப்பு தானாக முன்வந்து தெளிவாக வலியுறுத்தியிருக்கவேண்டும். வருகை நிகழ்ந்திருக்குமானால் அர்த்தமுள்ள பல விடயங்களுக்கு சாத்தியம் இருந்திருக்கும். தமிழ்தேசிய கூட்டமைப்பின் ஒருசீர்தன்மையற்ற கதம்பத்தனமும் இன்று வட மாகாணசபையை ஆரம்ப நிலையிலேயே கலகலக்கச் செய்திருக்கிறது. உள்ளூராட்சி சபைகளின் நிலையைப்பற்றிப் பேசவே வேண்டாம்.

சம்பந்தரின் இரட்டை நாக்கு அரசியல் இந்திய நடுவண் அரசு பிரதமர் இலங்கைக்கு வரவேண்டும் என்று விரும்புகிறது தமிழ் மக்கள் அதனை விரும்பவில்லை . என்ற மாதிரியான பேச்சுக்கள் பொறுப்புணர்வின் பாற்பட்டவையல்ல. மாகாண சபையை இயங்கச் செய்ய வேண்டுமானால்  அதற்கு யதார்த்தமாக மனப்பூர்வமாக பாடுபடவேண்டும். கமரூன் மாயையை மார்ச் மாதம் வரை தான் கொண்டு  போகலாம். அதன் பின்னர் புதிய கதை தேவைப்படும் .

உள்ளூரில் அதிகாரப்பரவலாக்கலுக்கு என்ன செய்ய வேண்டும் என்பதே இப்போது முக்கியமானது. செய்ய வேண்டிய செய்யக் கூடிய காரியங்கள் ஆயிரம் இருக்கின்றன. சாட்டுச்சொல்லிக் கொண்டிருப்பது மக்களை ஏமாற்றத்தில் விரக்தியில் தள்ளுவதாகவே அமையும்