(சுகு-ஸ்ரீதரன்)
ஆயுட் பரியந்தம் அதிகாரத்தில் ஒருவர் இருக்க முயல்வது ஒருநாட்டுக்கோ அல்லது சமூகத்திற்கோ ஏன் கட்சிக்கோ எமது இதர சமூக நிறுவனங்களுக்கோ நல்லதல்ல. பொருத்தமானதுமல்ல. இதனால் நிகழ்ந்த விபரீதங்கள் உலகவரலாறு ழுமுவதும் காணப்படுக்கிறது. அதேபோல் மரபு வழி வாரிசு அரசியலும் பிரபுத்துவ மரபும் ஜனநாயக விழுமியங்களுக்கு முரணானது. இலங்கையில் விசேட அதிகாரம் கொண்ட ஜனாதிபதி முறை எவ்வாறு இலங்கையர்களுக்கான ஜனநாயக இடைவெளியை பொது வெளியில் அரித்தழித்து வந்திருக்கிறது. இந்த விசேட அதிகாரம் கொண்ட ஜனாதிபதி முறையை கொண்டு வந்ததன் பின் ஆணைப்பெண்ணாக்க அல்லது பெண்ணை ஆணாக்க முடியாதே தவிர வேறு அனைத்து காரியங்களையும் செய்யமுடியும் என்று ஜே. ஆர் சொன்னது பிரபலமான கதை.

இந்த விசேட அதிகாரம் கொண்ட ஜனாதிபதி முறையின் மறுவடிவாக தமிழ்மக்கள் மத்தியில் அதன் பிரதி விம்பமாக ஏகபிரதிநிதித்துவ அதிகாரம் பற்றிய விபரீத எண்ணங்களுடன் ஜனநாயக சிதைவியக்கம் உருவாகியது. அவ்வாறு அவர்கள் கூறாவிட்டாலும் 2 வது கிளர்ச்சிக்கால ஜேவிபியும் அவ்வாறு தான் நடந்து கொண்டது. எப்போதும் சமூகத்தின் அதி உயர் மட்டத்தில் உருவாகும் இயல்புகள் சமூகத்தினுள்ளும் ஊடுருவிச் செல்லும். இந்த ஏக பிரதிநிதித்துவ ஜனநாயக விரோத சொற்பிரயோகம் புலிகளால் மாத்திரமல்ல தமிழ் தேசிய கூட்டமைப்பு மற்றும் முஸ்லீம் காங்கிரசினாலும் அவ்வப்போது உபயோகிக்கப்பட்டன.

முன்னேறிய நாடுகளில் இந்த சொற்பிரயோகம் பிரயோகிக்கப்படுவதில்லை.
மக்களின் அறிவு மற்றும் சமூக வளர்ச்சி மட்டம் உயர்வானதென்பதால் அதனை அதிகாரசக்திகள் பிரயோகிப்பதில்லை. இந்த விசேட அதிகாரம் கொண்ட ஜனாதிபதிமுறை நாடு முழுவதும் எவ்வாறு ஜனநாயக இடைவெளிபற்றிய கேள்வியை எழுப்பியதோ
அதேபோல் ஏகபிரதிநிதித்துவ அதிகாரம் தமிழ் மக்கள் மத்தியில் ஜனநாயக இடைவெளியை பாரதூரமாக இல்லாமல் செய்தது. விசேட அதிகாரம் கொண்ட ஜனாதிபதி முறை வந்த பின்னர் நாட்டில் நிகழ்ந்த ஜனநாயக விரோத நிகழ்வுகளைப்பட்டியலிடுவோமானால் அது முடிவற்றதும் நீண்டதுமாகும்.

உதாரணத்திற்கு சில.

• 1979 பயங்கரவாத தடைச்சட்டம் கொண்டு வரப்பட்டதும், உடனடியாகவே 8 போர் காணாமல் போனார்கள் . இன்பம் செல்வம் ஆகியோரின் பிணங்கள் பண்ணைக்கடலில் மிதந்தன. சித்திரவதைக் கூடங்கள் பரவலாக நிறுவப்பட்டன.
• முன்னாள் பிரதமர் ஸ்ரீமாவோ பண்டாரநாயக்காவின் சிவில் உரிமைகள் பறிக்கப்பட்டன.
• 1981 இல் சம்பள உயர்வு கோரி போராட்டம் நடத்திய தொழிலாளர்கள் 40 ஆயிரம் பேர் வீதிக்கு துரத்தப்பட்டார்கள்.
•  யாழ்நூலகம் ஈழநாடு பத்திரிகை காரியாலயம் எரிக்கப்பட்டது.
• 1981 1983 குறுகிய கால இடைவெளியில் தமிழர்கள் முஸ்லீம்களுக்கெதிரான தாக்குதல்கள் அடுத்தடுத்து நடத்தப்பட்டன.
• தமிழ் ஆயுதம் ஏந்திய எழுச்சி உருவாவதில் இந்த விசேட அதிகாரம் தன்னளவில் பங்களிப்பை வழங்கியிருக்கிறது.
• தொழிலாளர் விரோத மக்கள் விரோத இனவிரோத நடவடிக்கைகளுக்கெதிராக வீதியிலிறங்கி போராடியவர்கள் மூர்க்கமாக தாக்கபட்டார்கள். செல்வாக்கு மிகுந்த லங்காசமசமாஜகட்சியின் தலைவர்களில் ஒருவரான விவியன் குணவர்த்தனா கூட தாக்கப்பட்டார். வடக்கு கிழக்கில் வீதியிலும் வீடுகளிலும் பிணங்கள் விழுந்து கொண்டிருந்தன.
• மறுதலையான ஏகபிரதிநிதித்துவ அதிகாரமும் அனுராதபுரம் புனித போதி மரதின் கீழ் வரை சென்று மக்களைப் படுகொலை செய்தது.
• வடக்கின் முஸ்லீம் மக்களை சொந்த நிலத்திலிருந்து வெளியேற்றியது .
• தமிழ் மக்களின் சகல அரசியல் ஜனநாயக சமூக சக்திகளும் துடைத்தளிக்கப்பட்டன. தெற்கில் உருவான ஆயுதமேந்திய கிளர்ச்சியும் ஜனநாய உள்ளடக்கத்தை கொண்டிருக்கவில்லை.
• 1983 இனவன்முறை “நக்சலைட் சதி” என பழிசுமத்தி இடதுசாரிகள் மற்றும் ஜனநாயக செயற்பாட்டாளர்கள் கைது செய்யப்பட்டார்கள். இலங்கையை பல்தேசிய கம்பனிகளுக்கு திறந்து விட்ட ஜே.ஆருக்கு அவ்வாறு செய்வது அவசியப்பட்டது.
• 1981 இல் மாவட்ட அபிவிருத்தி சபை தேர்தல் மோசடியும் இந்த அதிகார அகங்கார அரசியலின் பகுதியே.
• 1978 இல் பொதுமன்னிப்பளிக்கப்பட்டு விடுதலை செய்யப்பட்ட ஜேவிபியினர் 1980களில் மீண்டும் ஆயுதமேந்திய கிளர்ச்சியில் ஈடுபடுவதற்கான நிலைமைக்கு செல்வதற்கான நிலைமையை உருவாக்கியதும் இந்த ஜனநாயக இடைவெளி இன்மையே.
• தெற்கில் 60 ஆயிரத்திற்குமேலான சிங்கள இளைஞர்களின் அழிவுக்கும் வடக்கு கிழக்கில் ஒன்றரைலட்சத்திற்கு மேற்பட்ட மக்களின் அழிவு மற்றும் இலங்கை சமூகங்கள் நம்பிக்கை இழந்து அமைதியிழந்து போவதற்கும் இந்த விசேட அதிகாரம் அப கீர்த்தி மிக்க பங்களிப்பை வழங்கியிருக்கிறது. உலகத்திற்கு தெரியாத விஜயதுங்க ஜனாதிபதியாகிய கையுடன் சிறுபான்மைச் சமூகங்கள் பெரும்பான்மைச் சமூகத்தைபற்றிப்படரும் கொடி செடி போன்றவர்கள் என்றார்.
• இலங்கையின் வலுமிக்க தொழிற்சங்க விவசாயிகள் இயக்கங்கள் காணாமல் போவதற்கும் இந்த விசேட அதிகாரம் கொண்ட ஜனாதிபதி முறை நேரடியாகவோ மறைமுகமாகவோ பங்களித்திருக்கிறது. மக்கள் தமது தலைவிதியை ஒரேயடியாக தனிமனிதர்களிடம் வழங்குவது மிகவும் ஆபத்தான நடைமுறையாகும். “ஜனநாயகம் மக்களால் மக்களுக்காக என்றவாறில்லை. தன்னால் தனக்காக என்று சிதைவடைகிறது”  ஜே.ஆர் பாராளுமன்றித்தில் ஐதேக விற்கு இருந்த 5இல் 4 பலத்தை தனது வரம்பற்ற அதிகார அபிலாசைகளுக்காக பயன்படுத்திக் கொண்டார்.
• இன்று விசேட அதிகாரம் ஜனநாயக இடைவெளிகளை அரித்தழித்து ராணுவ மற்றும் குடும்ப உற்ற சுற்ற அதிகாரமாக சிதைவடைந்துள்ளது. அதிகாரம் மையத்தை நோக்கி குவிக்கப்பட்டுள்ளது. சுயாதீன நீதிச் சேவை ஆணைக்குழு,சுயாதீன பொதுச்சேவை ஆணைக்குழு, சுயாதீன பொலிஸ் சேவை ஆணைக்குழு ,சுயாதீன தேர்தல் ஆணைக்குழு என்பன உருவாவதற்கான சாத்தியப்பாடுகள் தகர்க்கப்பட்டுள்ளன.
• இலங்கையின் நீதித்துறை பாரதூரமாக ஈடாட்டம் கண்டுள்ளது.
• சட்டம் ஒழுங்கு பாதுகாப்பு துறையின் பகுதியாக மாற்றப்பட்டுள்ளது
• 1978 விசேட அதிகாரம் கொண்ட ஜனாதிபதிமுறை 1978 இல் கொண்டு வரப்பட்டதன்பின் இலங்கையில் நிகழ்ந்த முக்கிய ஜனநாயக அரசியல் மாற்றம் என்னவென்றால் 13வதன்கீழான அதிகாரப்பரலாக்கல் மாத்திரம் தான்.
  அதுவும் இன்று நலிவடையச் செய்யப்பட்டுள்ளது.
• மலையகத் தொழிலாளர்களின் நிலை பாரதூரமாக மோசமடைந்துள்ளது. எது வித சமூக பாதுகாப்பும் கிடையாது. பதுளை மண்சரிவும் இத்தகைய சம்பவங்கள் பற்றிய அக்கறையீனமும் தெளிவாக நிலைமைகளைப் புலப்படுத்துகின்றன.
  தொழிலாளர்களின் நலன்களை விட தோட்டக்கம்பனிகளின் நலன்களே முன்நிறுத்தப்படுகிறது. தேயிலைத்தொழில் நட்டம் என மூர்க்கத்தனமான பிரச்சாரம் செய்யப்படுகிறது.
• இலங்கையின் கீர்த்;தி வாய்ந்த இலவசக் கல்வி, இலவச வைத்தியம் ஆகிய துறைகள் மெதுவாக தனியாரிடம் காப்பிரேட்டுக்களிடம் தாரைவார்க்கப்படுகிறது.
• பல்கலைக்கழகங்கள் தமது சுயாதீனத்தை இழந்துள்ளன.
• தேசிய உற்பத்தி ,வருமானம் என்பன காப்பிரேட்டுக்களின் ஏகபோகமாக மாறியிருக்கிறது. சாதாரண மககளின் விடிவென்பது காப்பிரேட்டுக்களின் சுரண்டலுக்குள்ளாவதும் இதனை அண்டிவாழ்வதும் என்றாக்கப்பட்டிருக்கிறது. காப்பிரேட்டுகளுக்கு முன் மக்களின் முகம் அழிக்கபட்டுள்ளது.
• காப்பிரேட்டுக்களின் வளர்ச்சியில் மக்கள் பிழைத்துக் கொள்ள வேண்டும் என்றாக்கபட்டிருக்கிறது. எமது விவசாயம் மீன் பிடித்தொழில்கள் நலிவடைந்துள்ளன.
  சமூகப்பாதுகாப்பு உத்தரவாதங்கள் எதுவும் கிடையாது. சமூக ஏற்றத்தாழ்வு மலையும் பள்ளத்தாக்குமாகியுள்ளது.
   

இலங்கையின் அரசியல் கட்டமைப்பை ஜனநாயகமயப்படுத்துவதும் இதிலிருந்து மீள்வதற்கான ஒரு பாதையே.  விசேட அதிகாரம் கொண்ட ஜனாதிபதி முறை நீக்கப்படுவதும் பாராளுமன்றம் மாகாண சபைகளின் அதிகாரங்கள் அதிகரிக்கப்படுவதும் காலத்தின் கட்டாயமாகும். தமது பிரதிநிதிகள் யார் என்று மககளுக்கு தெரியவேண்டும். அதற்கான தேர்தல் முறை சீர்திருத்தங்கள் அவசியப்படுகின்றன. பிராந்திய ,கிராம மட்டங்களில் மக்களின் பங்கேற்புக்கு முக்கியத்துவம் அளிக்கப்படவேண்டும்.

மக்கள் பிரதிநிதிகளின் தனிப்பட்ட சொத்து விபரங்கள் மக்களுக்குத் தெரிய வேண்டும்.
மக்களின் தகவல் அறியும் உரிமை உறுதிப்படுத்தப்படவேண்டும். இலங்கையின் தொழிலாளர்கள் ,விவசாயிகள் ,கல்வியாளர்கள் ,தொழில் நுட்பவியலாளர்கள் மற்றும் பின்தங்கிய பிரதேசங்களின் மக்களை முன்நிறுத்திய இடையறாத ஜனநாயக புரட்சி இயக்கம் முன்னெடுத்துச் செல்லப்படவேண்டும். அதற்கு நிரந்தரமான அதிகார இருப்புக்கள் தகர வேண்டும். மாற்றம் என்பதே இங்கு நிரந்தரமானது. இலங்கையின் அரசியல் வரலாற்றில் பல விதி விலக்குகள் இருந்தாலும் இந்த இயக்கவியல் நிகழ்ந்து கொண்டு தான் இருக்கிறது.

17 வருட ஐதேக ஆட்சியும் காலாவதியானது .சந்திரிகா அவர்களின் ஆட்சி 10 வருடத்துடன் முடிவிற்கு வந்தது. எனவே தற்போதை நிலைமையும் கடக்கப்படும். சந்திரிகா அவர்களின் ஆட்சிக்காலத்தில் சில முக்கியமான ஜனநாயக மறு சீரமைப்புகள் நிகழ்த்த முயற்சிக்கப்பட்டது. ஒரு சமஸ்டி அரசமுறைமை பரிந்துரைக்கப்பட்டது. மலையகமக்களுக்கு வீடுகள் கிராமசேவகர் முறை அறிமுகம் செய்யபட்டது. தொழிலாளர் நல சட்டங்கள் யாப்பு ரீதியாக உறுதி செய்யப்பட்டன. சந்திரகாவின் சமஸ்டி முறை பரிந்துரையை பேரினவாத மற்றும் தமிழ் ஆதிக்க அரசியலும் சேர்ந்து தான் தோற்கடித்தன.

ஜனநாயக அரசியிலமைப்பு மறு சீரமைப்புகள் பாரிய அளவில் நிகழும் என எதிர்பார்க்கப்பட்ட அவரது காலத்திலும் -தனது பதவிக்காலம் முடியும் வரை நிறைவேற்று அதிகாரம் கொண்ட ஜனாதிபதி முறையை நீக்க முயலவில்லை. ராஜபக்சேக்களின் ஆட்சியில் தமிழ் பாசிசம் முடிவுக்கு கொண்டுவரப்பட்டது. வடக்கு கிழக்கில் தேர்தல்கள் நடந்து ஜனநாயக இடைவெளி ஒன்று தோற்றுவிக்கப்பட்டது. ஆனால் ஒரே தேசம் ஒரேமக்கள் என்ற கோசம் மக்களின் பன்முகத்தன்மையை ஜனநாயகத்தை மறுதலிப்பது. இராணுவமயமாக்கல் சகல அதிகாரங்களையும் மையத்தை நோக்கி நகர்த்துவது மக்களுக்கான ஜனநாயக இடைவெளியை அரித்தழிக்கும் கைங்கரியங்கள் என்பதைச் சொல்லத்தேவையில்லை!
எனவே இந்த முறை மாறியே ஆகவேண்டும்.
(சுகு-ஸ்ரீதரன்)

அமைதி சமாதானம் ஜனநாயகம்

www.sooddram.com