தோழர் பாலாதம்பு ஒருவரலாறு

தோழர் பாலாதம்பு கடந்த 6 தசாப்தங்களுக்கு மேலாக இலங்கை வர்த்தக மற்றும் பொது தொழிலாளர் மனங்களில் கம்பீரமாக உட்கார்ந்திருந்தவர். தனது 90 களிலும் எழுச்சி மனநிலை கொண்டிருந்தார். இலங்கையின் அரசியல் வானில் நேர்மையாகவும், அர்ப்பண உணர்வுடனும உறுதியாகவும் தொழிலாளர் இயக்கத்திற்குப் பங்களித்தவர்களில் தோழர்பாலாதம்பு முதன்மையானவர். 1940களில் தீவிர இடது- தொழிலாளர் இயக்கத்தில் ஈடுபாடு செலுத்திய பாலா முதலாளித்துவ கட்சிகளுடன் சேர்ந்து சமூக சீர்திருத்தங்களையோ, மாற்றங்களையோ நிகழ்த்தலாம் என நம்பவில்லை.

1960களின் மத்தியில் அவர் லங்காசமசமாஜ கட்சியில் இருந்து பிரிந்து புரட்சிகர லங்காசமசமசமாஜகட்சியை உருவாக்கினார். பின்னர் தமது வர்த்தக ஊழியர்சங்க செயற்பாடுகளுடன் தனது பணியைத் தொடர்ந்தார். அவருடைய பாசறையின் வழிவந்தவர்கள் சகாக்களாக இருந்தவர்களான  “ஒருவருடைய நண்பர்களை பார்த்து அவரை அறிந்துகொள்” என்ற அரபு முதுமொழியை நினைவுறுத்துபவர்கள்.

தோழர் வாசுதேவா தோழர் பாலாதம்புவின் வாழ்க்கை காலத்தை 3 ஆகக் கூறியுள்ளார். காலனி எதிர்ப்பு - சமூக ஜனநாயக - நவதாராளவாத என வகுத்துள்ளார். அவர் ஒருவரலாறாக வாழ்ந்தார். தொழிலாளர் நலன்களுக்காக இடையறாது வீதியிலிறங்கியவர். சாதாரண தொழிலாளர்களே எப்போதும் அவருடன் கூட இருந்தார்கள். இளம் தொழிலாளர்களை அவர் உற்சாகப் படுத்தினார்.

1971 இல் கிளர்ச்சி செய்த இளைஞர்களுக்காக அவர் நீதிமன்றத்தில் வாதாடினார். அதேபோல் 1979 இன்பின்னர் பயங்கரவாத தடைச்சட்டத்தின் கீழ் கைதுசெய்யப்பட்டவாகளுக்காகவும் அவர் வாதாடினார். அவர் இனவாதம் கடந்தவர். சமகாலத்தில் அப்படியாரும் வாழ்ந்ததாக தோன்றவில்லை. எத்தரப்பிலிருந்து வந்தாலும் அவர் அதற்கு அடிபணியவில்லை. எளிமை- நேர்மை -அர்ப்பணம் -பிடிவாதமான தொழிலாளவர்க்க மனநிலை 

நேரடியாக அவர் எனக்கு அவ்வளவாக பரிச்சயம் இல்லை. நேர்மையான மனிதர்கள் பற்றிய தேடலில் அவர் மீது எனக்கு ஈடுபாடு இருந்தது. இலங்கையின் அரசியலில் தொழிலாளர் விரோத போக்கு, சர்வாதிகாரம் தொழிலாளர் நல மற்றும்  மனித உரிமைகள் தொடர்பான அவருடைய கருத்துக்கள அறிக்கைகள் ஈர்ப்பை ஏற்படுத்தியிருந்தன.

1980களில் பரந்தன் இரசாயனத்தொழிற்சாலையை  எம்பிலிப்பிடியாவிற்கு மாற்றுவதற்கான முயற்சிகள் நடந்தபோது சிஎம் யு போராட்டத்தை முன்னெடுத்தது. ஈழமாணவர்பொதுமன்றம் நவசமசமாஜகட்சி புரட்சிக்கம்யூனிஸ்ட் கழகம் இலங்கை கம்யூனிஸ்ட் கட்சி , தொழிற்சங்கங்கள் தொழிலாளர்களின் போராட்டத்திற்கு ஆதரவளித்தன. சுவரொட்டிகள் ஒட்டுவது கூட்டங்கள் நடத்துவது உட்பட விழிப்புணர்ச்சி நடவடிக்கைககள் தொடர்ந்தன.

அதன் பின்னர் தீவிர யுத்தம்- பயங்கரவாததடைச்சட்டம், கொடூர அடக்குமுறை,  ஜனநாயகவிரோத நிலைமைகள் தொழிலாளர் இயக்கத்தை மொத்தமாகவே வடக்கில் நலிவடையச் செய்தது. 1948 வேலை நிறுத்தம் ,1953 ஹர்த்தால், 1980களின் முற்பகுதியில் நிகழ்ந்த வேலை நிறுத்த போராட்டம், சுதந்திர வர்த்தக வலயம் மற்றும் நாடுபூராவும் ஆலைத்தொழிலாளர்களின் நலன்களில் தன்வாழ்நாள் பூராவும் மனம் ஒன்றித்திருந்தார். இலங்கையில் 1995 இல் தேசிய தொழிலாளார் சாசனம் உருவாக்கத்தில் காத்திரமான பங்களிப்பை நல்கியவர். அண்மையில் பல்கலைக்கழக ஆசிரியர்கள் நடத்திய போராட்டத்திற்கு வர்த்தக ஊழியர் சங்கம் உரிய ஆதரவளித்ததோடு ஆலோசனைகளையும் வழங்கினார்.

6 தசாப்தங்களுக்குமேலாக தொழிலாளவர்க்கத்திற்கான அறத்தை நிலைநாட்டப்போராடியவர். சர்வதேச தொழிலாளர் இயக்கத்தாலும் அறியப்பட்டவர். அவரது சொந்த பொதுவாழ்வு இரண்டறக்கலந்தது. பாலாதம்பு அவர்களின் வரலாறு இலங்கை இடதுசாரி இயக்கத்தின் புரட்சிகர தொழிற்சங்க இயக்க வரலாற்றின் முக்கிய பகுதி. அவர் மரணிப்பதற்கு சில மாதங்களுக்கு முன் யாழ்ப்பாணம் வந்திருந்தார். நல்லூரில் ஒரு கருத்தரங்கில் அவரது அனுபவங்கள் மிகுந்த தன்னடக்கத்துடன் பகிரப்பட்டன. தொழிலாளர்கள் புரட்சிகர இயக்கம் பற்றிய நம்பிக்கைகளை இத்தகைய மனிதர்கள் தான் தக்கவைக்கிறார்கள்.

(சுகு-ஸ்ரீதரன்)