யாழ்தேவி வந்தபோது…..

யாழ்தேவி பரீட்சார்த்தமாக யாழ் வந்தபோது புகையிரத -நீராவி யந்திரத்தை கண்டு பிடித்த -ஜோர்ஜ் ஸ்ரீபன்சனுக்கு ஏற்பட்ட அனுபவம் இங்கும் கிட்டத்தட்ட 3 நூற்றாண்டுகளுக்குப் பின்னர் ஏற்பட்டது. ரயிலில் எதேச்சசையாக மாடு ஒன்று அடிபட்டிறந்தது. ரயிலை வேடிக்கை பார்க்க தந்தையுடன் வந்த சிறுவனைப் பாம்பு தீண்டியது. இந்த சம்பவங்கள் துரதிஸ்டமானவை. ஆனால் இவையெல்லாம் நாசமாய்ப்போன சைத்தான் ரயிலால் வந்த வினை என்று யாழப்;பாணத்து “வைபவக் குறைவான ஊடகங்கள்” பிரச்சாரம் செய்தன.
 

அறிவைப்பாருங்கள்! இடம்பெயாந்த பெண்ணொருவர் கடந்தகால்நூற்றாணடுகளாக சொந்த ஊர்திரும்பமுடியவில்லை. அதற்குள் ரயில் வேறயா என்று ரயிலைச் சபிக்குமாப் போல் பேட்டி வேறு. இருவேறுவிடயங்களுக்கிடையே முடிச்சு .இந்த பத்திரிகை உரிமையாளர்களில் ஒருவர் அமெரிக்கா கனடா லண்டன் என பறந்து திரபவர். தமது வியாபார விடயமாக அரசின் அமைச்சர்கள் அதிகாரிகளை சந்திக்கத் தவறுவதில்லை.

ஆனால் பாழாய்ப்போன சனத்தின்ர தேவைக்கு ரயில் வரக் கூடாது. அது வரும்போது எரிச்சல் வருகிறது. எப்போதும் சமூகத்திற்கு “மூளி அலங்காரப்பந்தல்” கட்டுவதிலேயே இந்த மக்கள் விரோத -கிறிமினல் பேர்வழிகள் குறியாக இருக்கிறார்கள்.  இங்கு மக்கள் பாமரராய் வாழவேண்டும். துன்பத்துடன் வாழவேண்டும். தவறியும் முன்னேறி விடக் கூடாது. வாழ்க்கை கொஞ்சமும் இலகுவாகிவிடக் கூடாது பாருங்கள். ஸ்ரீபன்சன் -புகையிரத நீராவி யந்திரத்தை கண்டு பிடித்து இயக்கிய போது சைத்தான் ஒன்றை மந்திரித்து விட்டிருப்பதாக அறிவிலிகளால் வாந்தி பரப்பப்பட்டது.

சமூகத்தை உருப்படவிடாத குட்டிச்சுவராக்கும் இந்த அரசியலை என்னவென்பது.
பெண்கள், குழந்தைகள், வயோதிபர்கள், நோயாளிகளுக்கு ரயில் ஒரு வரப்பிரசாதம். தூரப்பிரயாணங்களில் மலசல கூடம் செல்ல முடியாமல் சுகாதாரமான உணவை உட்கொள்ளமுடியாமல் அன்றாடம் படும் அவலம் யாருக்கும் தெரியாததா? காலாற நடக்கலாம். சற்று எழுந்து நிற்கலாம்.

தண்டவாளம், ரயில், 50 ஆயிரம் வீடு என முழுமூச்சாக எமது அண்டை நாடு இந்தியா உதவிகளைப்புரிய முனைந்தாலும் எமது ஆட்களின் நையாண்டிகளும்- நக்கலுக்கும்- புரளிகளும் சகிக்கமுடியாதவையாகவும் ஆத்திரமூட்டுபவையாகவும் இருக்கின்றன.
எமது பரரோபகாரத்தை நினைத்துப்பாருங்கள். அண்டைக் கிராமத்திற்கு குடிநீர் கொடுப்பதையே அரசியலாக்கியிருக்கிறோம். இந்த லட்சணத்தில் வடக்கு-கிழக்கு தமிழ் பேசும் மக்களின் ஒற்றுமை, பாரம்பரிய பிரதேசம், ஈழம் பற்றிய ஆலாபரணம் வேறு.
எந்த நல்லகாரியத்திற்கு தான் நாம் உடன் பட்டோம். அரசியல் தீர்வாயினும் சரி மக்களின் அன்றாட ஜீவாதாரநலன்களாயினும் சரி.
(சுகு- ஸ்ரீதரன்)