தமிழ் கட்சிகளின் அரங்கம்,தமிழ் தேசிய கூட்டமைப்பு இனரிடையே உள்ள உறவு இனி என்னவாகும்?

(அ. விஜயன்)

தமிழ் கட்சிகளின் அரங்கம் உருவானபோது ஒற்றுமையை விரும்பும் பலர் சந்தோசமைடந்தனர், அதிலும் தமிழ் தேசிய கூட்டமைப்பிற்கும் அரங்கத்தினருக்கும் உறவு வளர்ந்த போது அந்த சந்தோசம் இரட்டிப்பாகி, சந்தேகங்களும் இனி அகன்று விடும் என்ற எண்ணமும் உருவானது. தமிழ் தேசிய கூட்டமைப்பினரில் பாராளுமன்ற உறுப்பினர்கள் 14 பேர் இருப்பதனால் தமிழ் மக்களின் அரசியல் தீர்வு தொடர்பான பேச்சுவார்த்தைகளில் இலங்கை அரசு மறுதலிக்க முடியாத ஒரு தீர்வை தமிழ் மக்களுக்கு வைப்தற்கு அழுத்தங்களை பிரயோகிக்க முடியும் என்ற நம்பிக்கை இருந்தது. அந்த நம்பிக்கை இன்று அவநம்பிக்கையாக மாறியது, அனைவரையும் கவலையடைய செய்துள்ளது. இதற்கு உள்ளுராட்சி சபை தேர்தல் எனும் அஸ்திரம் எய்தப்பட்டுள்ளது.

தேர்தல்கள் வரும்,போகும் ஆனால் ஒற்றுமையின் பலம் ஒன்றே எமது இனத்துக்கு ஒரு நிரந்தர தீர்வை பெற்றுக் கொடுக்க வழிவகுக்கும். தமிழ் கட்சிகளிடையே ஒற்றுமை இல்லை என்பது தமிழ் இளைஞர்கள் இயக்கங்களாக செயல்பட்ட காலம் முதலும் அதற்கு முன்னரும் இருந்து வந்த ஒரு சாபக்கேடாகும். இந்த ஒற்றுமையை சில சக்திகள் விரும்பாத காரரங்களால் அவை ஏதோ ஒரு வடிவில் சிதறடிக்கப்பட்டிருக்கிறது. அந்த வகையில் தற்போதைய இழுபறி நிலையும் அடக்கம்.

தமிழ் கட்சிகளின் அரங்கத்தில் இருந்து வந்த தமிழர் விடுதலைக் கூட்டணியும்,புளொட் அமைப்பினரையும் தமிழ் தேசிய கூட்டமைப்பு தங்களுடன் இணைத்து எதிர்வரும் உள்ளுராட்சி சபை தேர்தலில் தமிழரசு கட்சியின் வீட்டு சின்னத்தில் போட்டியிடப் போவதாக அறிவிப்புகள் வெளியாகியுள்ளன. இதன் மூலம் தமிழ் கட்சிகளின் அரங்கம் தொடர்ந்து செயல்படுமா? தமிழ் தேசிய கூட்டமைப்பு இனி தமிழ் கட்சிகளின் அரங்கத்துடன் தமிழ் மக்களின் அரசியல் தீர்வு தொடர்பான பேச்சு வார்த்தைகளின் ஈடுபடுமா? ஏன்ற சந்தேகங்கள் உலாவரத் தொடங்கிவிட்டன. பிரிந்தாலென்ன, சோந்தாலென்ன தமிழ் மக்களின் அரசியல் தீர்வு தொடர்பாக வழக்கமான செயல்பாடுகள் இருக்கும் என்ற நல்லதொரு முடிவை இவர்கள் எடுத்தார்களானால், சகலருக்கும் நல்லது என்றே நினைக்கவுள்ளது.

நடைபெறவிருக்கும் உள்ளுராட்சி சபை தேர்தலில் தமிழ் கட்சிகளின் அரங்கத்தில் இருந்த ஈ.பி.டி.பி அரசுடன் இணைந்து போட்டியிடும் சாத்தியங்கள் அதிகமாவுள்ளது. தமிழ் மக்கள் விடுதலைப் புலிகள் யாருடனும் ஒட்டும் இல்லாமல் உறவும் இல்லாமல் போட்டியிடும் நிலைமையே உள்ளது. புளொட், ரி. யு.எல்.எப் தமிரசு கட்சியின் சின்னத்தில் போட்டியிடப் போவதாக அறிவித்துள்ளது. தமிழ் தேசிய விடுதலைக் கூட்டமைப்பு இடது சாரி முன்னணியுடன் இணைந்து போட்டியிடப் போவதாக அறிவித்துள்ளது. புதிய ரெலோ அரசுக்கு ஆதரவை தெரிவிக்கும் சாத்தியங்கள் உள்ளன பத்மநாபா ஈ.பி.ஆர்.எல் எப் இனரின் நிலைப்பாடு விரைவில் தெரியவரவுள்ளது.

இக் கட்சிகள் பிரிந்து கிடப்பதால் தேர்தலில் மக்களிடம் வைக்கும் கோரிக்கைள்.ஒன்றாக மட்டும் இருக்காது 'ஒன்றாக  இருக்கும், ஆனால் ஒன்றாக இருக்காது' அனைத்து தமிழ் கட்சிகளும் ஒன்றாக கேட்டிருந்தால் இந்த உலகிற்கே பல விடங்களை அது சொல்லியிருக்கும்.

(அ. விஜயன்) (தை 22, 2011)